25 കിലോമീറ്റര് വേഗത്തില് കുതിക്കുന്ന കൊച്ചിക്കാരുടെ സ്വന്തം ബാബുവേട്ടന്റെ സൈക്കിള്!
കൊച്ചിക്കാരുടെ ബാബുവേട്ടന്. പ്രായം 75-ല് എത്തിയെങ്കിലും ആള് ചില്ലറക്കാരനല്ല. ജോണ് കുര്യന് എന്ന് യഥാര്ഥ പേര്. കോട്ടയം തിരുവഞ്ചൂരില് ജനിച്ച് എറണാകുളം പനമ്പിള്ളിനഗര്/ 631-ല് ഇളയമകന് ബിബിന് ജോണിനൊപ്പം താമസം. ചെറുപ്രായം മുതല് ഇലക്ട്രോണിക് രംഗത്തു പയറ്റിക്കൊണ്ടിരിക്കുന്ന ബാബുവേട്ടന് ഇന്ധനവില കൂടിയപ്പോഴാണ് ഇലക്ട്രിക് സൈക്കിളിനെക്കുറിച്ചു ചിന്തിച്ചത്. ഇതുസംബന്ധിച്ചു കിറ്റ് വാങ്ങി സ്വന്തമായി സൈക്കിള് കളത്തിലിറക്കി.
25 കിലോമീറ്റര് വരെ വേഗത്തില് പോകുന്ന സൈക്കിളാണ് കൈയിലുള്ളത്. പച്ചക്കറി വാങ്ങാനും പലചരക്ക് വാങ്ങാനും എന്തിനു പള്ളിയില് പോകാന്വരെ ബാബുവേട്ടന് സൈക്കിളിനെയാണ് ആശ്രയിക്കുന്നത്. അടുത്ത ബന്ധുക്കളും സുഹൃത്തുക്കളും അവര്ക്കു വേണ്ടി സൈക്കിള് ചോദിച്ചിരിക്കുകയാണ്.
കുറഞ്ഞത് 25,000-ത്തോളം രൂപ വേണം വന്കിട സ്ഥാപനങ്ങള് ഇറക്കുന്ന ഇലക്ട്രിക് സൈക്കിളൊന്നു വാങ്ങണമെന്ന് വിചാരിച്ചാല്. എന്നാല് 7500 മുതല് 10,000 രൂപ വരെയുണ്ടെങ്കില് ബാബുവേട്ടന്റെ സൈക്കിള് റെഡി. ഒരു മണിക്കൂര് ചാര്ജ് ചെയ്താല് 15 കിലോമീറ്റര് വരെ ലഭിക്കും. എന്നാല് 40 കിലോമീറ്റര് വരെ ലഭിക്കുന്ന ബാറ്ററിയുണ്ടെന്നാണ് ബാബുവേട്ടന് പറയുന്നത്. അലയന്മെന്റ് എല്ലാം കൃത്യമാക്കി ഇലക്ട്രിക് വയറുകളൊന്നും കാണാത്ത രീതിയില് കമ്പനി മോഡലില്തന്നെയാണ് സൈക്കിളിന്റെ രൂപകല്പന.
പത്താംക്ലാസ് കഴിഞ്ഞപ്പോള് റേഡിയോ അസംബിള് പഠിക്കാന് കോല്ക്കത്തയിലേക്കു വണ്ടികയറിയ പശ്ചാത്തലമാണ് ബാബുവേട്ടനുള്ളത്. അവിടത്തെ പഠനം തീരുന്നതിനു മുമ്പു റേഡിയോ റെഡിയാക്കി. റേഡിയോയുടെ കാലം കഴിഞ്ഞപ്പോള് സ്റ്റീരിയോയിലേക്ക് കടന്നു. കൊച്ചി കടവന്ത്രയില് കിരണ് ഇലക്ട്രോണിക്സ് എന്ന സ്ഥാപനം തുടങ്ങി. 40 വര്ഷത്തോളം ഈ സ്ഥാപനം നിലനിര്ത്തി.
ഇതിനിടയില് വിസിആര്, ടിവി ആന്റിന, എല്ഇഡി എന്നിവയിലും കൈവച്ചു. എല്ഇഡി ബോര്ഡുകള് ഡോക്ടര്മാര്ക്കും പളളികളിലേക്കും സ്ഥാപനങ്ങള്ക്കും നിര്മിച്ചു നല്കി. എല്ലാം ബാബുവേട്ടന്റെ കരവിരുതില് മാത്രം. ഇന്നും വിവിധ മേഖലകളില്നിന്നും ടോക്കണ് ബോര്ഡുകള്ക്കു വേണ്ടി വിളിവരുന്നു. ഇതൊരു ബിസിനസ് അല്ലെന്നു പറയാം. സമയം പോകാനും മക്കളെ അമിതമായി ആശ്രയിക്കാതെ മുന്നോട്ടുപോകാനുമുള്ള ബാബുവേട്ടന്റെ നിലപാടാണിത്.
ഭാര്യ വത്സല മരിച്ചശേഷം മക്കളുടെ കൂടെ കഴിയുമ്പോഴും ഇന്ന് ആരോഗ്യപ്രശ്നങ്ങളിലേക്കൊന്നും പോകാത്തത് ഈ വ്യായാമമാണെന്നു പറയാന് ബാബുവേട്ടന് നൂറു നാവാണ്. മൂത്തമകന് കിരണും കുടുംബവും കൊച്ചിയിലുണ്ട്. ബാബുവേട്ടന്റെ സൈക്കിളില് ഒരു 85 കിലോ ഭാരമൊക്കെ ഒരു പ്രശ്നവുമില്ലാതെ കൊണ്ടുപോകാം.
കയറ്റം കയറി ബാബുവേട്ടന് പോകുന്നതു നഗരവാസികള് കണ്ണുചിമ്മാതെ നോക്കി നില്ക്കും. ചാര്ജ് തീര്ന്നു പോയാലും പ്രശ്നമില്ല. സൈക്കിള് ചവിട്ടിപ്പോകാമല്ലോ, അതും ഒരു വ്യായാമമാണല്ലോയെന്ന് അദ്ദേഹം പറയുന്നു.
https://www.facebook.com/Malayalivartha