പ്രഭാതസവാരിക്കാരെ പരിഭ്രാന്തരാക്കി കാറില് യുവാവിന്റെ സാഹസിക പ്രകടനം, കാറിന്റെ ടയര് പഞ്ചറായതോടെ നാട്ടുകാര് 'പഞ്ഞിയ്ക്കിട്ടു'!
ഇന്നലെ പുലര്ച്ചെ കലൂര് രാജ്യാന്തര സ്റ്റേഡിയം റോഡിലെ പ്രഭാതസവാരിക്കാര്ക്കിടയില് കാറുമായെത്തി സാഹസിക പ്രകടനം നടത്തിയ കളമശേരി സ്വദേശി ടിനു മുരളി എന്ന യുവാവിനെ നാട്ടുകാര് പിടികൂടി 'കൈകാര്യം' ചെയ്തു. പ്രഭാതസവാരിക്കാരെ പരിഭ്രാന്തരാക്കിയ യുവാവിന്റെ കാറിന്റെ ടയര് പഞ്ചറായപ്പോള് യുവാവ് രക്ഷപ്പെടാന് ശ്രമിക്കവേയാണ് നാട്ടുകാര് ഇടപെട്ടത്.
സ്റ്റേഡിയത്തിനു ചുറ്റും നടക്കാന് ഇറങ്ങിയവര്ക്കിടയിലൂടെ വലിയ ശബ്ദമുണ്ടാക്കി അപകടകരമായി വെട്ടിച്ചൊഴിച്ചും വാഹനം ഓടിക്കുകയായിരുന്നു. ഉച്ചത്തില് പാട്ട് വച്ചു, കാറിനുള്ളില് വളര്ത്തുനായയെയും കൂട്ടിയായായിരുന്നു പ്രകടനം. ഒന്നിലേറെത്തവണ ഇതാവര്ത്തിച്ചതോടെ എല്ലാവരും പരിഭ്രാന്തരായി. എന്നാല്, പ്രകടനത്തിനിടെ ശ്രദ്ധ പാളിയപ്പോള് റോഡില് വച്ചിട്ടുള്ള ബാരിക്കേഡിലെ കമ്പിയിലിടിച്ചു കാറിന്റെ ടയര് പഞ്ചറായതോടെ ആയിരുന്നു സംഭവത്തിലെ ട്വിസ്റ്റ്.
കാറിനു പുറത്തിറങ്ങിയ യുവാവിനെ നാട്ടുകാര് വളഞ്ഞിട്ടു നന്നായി പെരുമാറി. ഇത് ഒട്ടേറെപ്പേര് വിഡിയോയില് പകര്ത്തുകയും ചെയ്തു. ചിലര് കല്ലുകൊണ്ട് എറിയുന്നതും അടിക്കുന്നതുമുള്പ്പെടെ വിഡിയോ ദൃശ്യങ്ങളിലുണ്ട്. സംഭവമറിഞ്ഞ പൊലീസ് ഉടന് സ്ഥലത്തെത്തിയതിനാല് അധികം തല്ല് വാങ്ങും മുന്പു യുവാവിനെ രക്ഷപ്പെടുത്താനായി.
ടിനു മുരളി എന്ന ഇയാള്ക്കെതിരെ അലക്ഷ്യമായി വാഹനം ഓടിച്ചതിനും പകര്ച്ചവ്യാധി നിയമപ്രകാരവും കേസെടുത്തു പാലാരിവട്ടം സ്റ്റേഷനിലെത്തിച്ചു. ആശുപത്രിയില് പോകാന് പൊലീസ് നിര്ദേശിച്ചെങ്കിലും യുവാവ് ഇതിനു തയാറായില്ല. ഒടുവില് സ്വന്തം ജാമ്യത്തില് വിട്ടയച്ചതിനെത്തുടര്ന്ന് ഇയാള് വീട്ടിലേക്കു മടങ്ങി.
https://www.facebook.com/Malayalivartha
