മെക്‌സിക്കോയിലെ ബയോപാര്‍ക്യൂ എസ്ട്രെല്ല മൃഗശാലയില്‍ എത്തിയാല്‍ കമ്പി അഴികളുടെ മറയില്ലാതെ തുറസ്സായ സ്ഥലത്തു വിഹരിക്കുന്ന രീതിയില്‍ സിംഹങ്ങളെ കാണാം. ചില ദിവസങ്ങള്‍ക്കു മുമ്പ് മൃഗശാലയില്‍ എത്തിയ വിനോദഞ്ചാരികള്‍ അത്തരത്തിലുള്ള രണ്ടു സിംഹങ്ങളെ നോക്കി ചിരിക്കുകയും ഉല്ലസിക്കുകയും ചെയ്യുകയായിരുന്നു.

അപ്പോഴാണ് ആളുകള്‍ നോക്കി നില്‍ക്കെ അവയിലൊരു സിംഹം അവരുടെ നേര്‍ക്ക് എടുത്തു ചാടിയത്. മുന്‍പ് സര്‍ക്കസിലുണ്ടായിരുന്ന എല്‍സ എന്ന സിംഹമാണ് അപ്രതീക്ഷിതനീക്കം നടത്തിയത്. എല്‍സയെ അടുത്തിടെയാണ് അവിടെ കൊണ്ടു വന്നത്.

എന്നാല്‍ സിംഹത്തിന്റെ ചാട്ടത്തിനു നീളം പോരായിരുന്നു.അതുകൊണ്ട് ടൂറിസ്റ്റുകള്‍ക്കും സിംഹത്തിനും ഇടയിലുള്ള അഗാധമായ കിടങ്ങിലേക്കാണ് സിംഹം ചെന്നുവീണത്.

ഇത്തരത്തില്‍ സിംഹങ്ങളോ മറ്റ് മൃഗങ്ങളോ എടുത്ത് ചാടിയാല്‍ പോലും യാതൊരു പ്രശ്‌നങ്ങളും ആളുകള്‍ക്ക് ഉണ്ടാകില്ലെന്നും, കിടങ്ങിന് അത്ര വീതിയുണ്ടെന്നും മൃഗശാല ജീവനക്കാരന്‍ പറയുന്നു. ചാട്ടം പിഴച്ച് കിടങ്ങിലേക്ക് വീണ എല്‍സയ്ക്ക് പരിക്കൊന്നും തന്നെയില്ലെന്നും മൃഗശാല അധികൃതര്‍ വ്യക്തമാക്കി.