ലോകകപ്പിലെ അര്‍ജന്റീനയുടെ നിര്‍ണായക മത്സരത്തില്‍ ഫുട്‌ബോള്‍ ആരാധകരുടെ നെഞ്ചിടിപ്പ് കൂട്ടി അക്കില്ലസ് പൂച്ച നടത്തിയ പ്രവചനം ഫലിച്ചില്ല. നൈജീരിയയ്‌ക്കെതിരായ മത്സരത്തില്‍ അര്‍ജന്റീന തോല്‍ക്കുമെന്നായിരുന്നു അക്കില്ലസ് എന്ന ബധിരന്‍ പൂച്ചയുടെ പ്രവചനം.

ജയത്തില്‍ കുറഞ്ഞുള്ളതെന്തും പുറത്തേക്കുള്ള വഴിതുറക്കുമെന്ന് ഉറപ്പായിരുന്ന അര്‍ജന്റീന ആരാധകരുടെ ചങ്കിടിക്കാന്‍ ഇതില്‍ കൂടുതലൊന്നും വേണ്ടിയിരുന്നില്ല. അതിന് കാരണവുമുണ്ട്, ഈ ലോകകപ്പില്‍ അര്‍ജന്റീന- നൈജീരിയ പോരാട്ടത്തിന് തൊട്ടുമുമ്പ് വരെയുള്ള മത്സരങ്ങളെ കുറിച്ച് അക്കില്ലസ് നടത്തിയ പ്രവചനങ്ങള്‍ അണുവിട തെറ്റിയിരുന്നില്ല.

കഴിഞ്ഞ വര്‍ഷത്തെ കോണ്‍ഫഡറേഷന്‍ കപ്പ് മത്സരത്തിലും കൃത്യമായി പ്രവചനം നടത്തിയിരുന്നു അക്കില്ലസ്. മാര്‍ക്കസ് റോജോ ഗോള്‍ നേടുന്നതുവരെ അര്‍ജന്റീന ആരാധകര്‍ക്ക് അക്കില്ലസിന്റെ പ്രവചനം പേടിസ്വപ്നമായി നിന്നിരുന്നു.

എന്നാല്‍, റോജോ വിജയഗോള്‍ നേടിയതിനു പിന്നാലെ ആരാധകരും ട്രോളന്മാരും ആദ്യം തിരിഞ്ഞത് അക്കില്ലസിനു നേരെയായിരുന്നു. അക്കില്ലസിനെ കുഴിച്ചുമുടുന്നതടക്കമുള്ള ചിത്രങ്ങളിട്ട് ട്രോളന്മാര്‍ കളംവാഴുന്ന കാഴ്ചയാണ് പിന്നീട് കണ്ടത്.