കൂടത്തായി കൊലപാതക പരമ്പരക്കേസിനിടെ മറ്റൊരു ഉപ കേസുകൂടി ഉണ്ടായിരിക്കുകയാണ്. എല്ലാ കേസുകളും ജോളിയുടെ പേരിലായിരിക്കുമ്പോഴാണ് ജോളിയ്ക്ക് വേണ്ടി ഒരു യുവാവിന്റെ പേരില്‍ കഴിഞ്ഞ ദിവസം കേസെടുത്തത്. ഇത്രയൊക്കെ കൊലപാതകങ്ങള്‍ നടത്തിയിട്ടും മുഖം മറച്ച് നടക്കുന്ന ജോളിയുടെ യഥാര്‍ത്ഥ മുഖം ജനം കാണട്ടേയെന്ന് തീരുമാനിച്ച യുവാവാണ് വെട്ടിലായത്. മുഖം മറച്ചിരുന്ന ഷാള്‍ നീക്കം ചെയ്യാന്‍ ശ്രമിച്ചതിനാണ് യുവാവിനെ കസ്റ്റഡിയില്‍ എടുത്തത്.

ജോളിയെ ആക്രമിക്കാന്‍ സാധ്യതയുണ്ടെന്ന് നേരത്തെ തന്നെ രഹസ്യ വിവരമുണ്ടായിരുന്നു. അതിനാല്‍ തന്നെ ജോളിയുടെ ഓരോ വരവിലും ശക്തമായ പോലീസ് സുരക്ഷയാണ് ഒരുക്കിയത്. എന്നാല്‍ കൊയിലാണ്ടിയിലെ താലൂക്ക് ആശുപത്രിയില്‍ ജോളിയെ വൈദ്യ പരിശോധനയ്ക്ക് എത്തിച്ചപ്പോഴാണ് എല്ലാ സുരക്ഷാ വീഴ്ചയും ഉണ്ടായത്. ഈ ആശുപത്രിയില്‍ വച്ചാണ് യുവാവ് ജോളിയുടെ ഷാള്‍ നീക്കം ചെയ്യാന്‍ ശ്രമിച്ചത്.

കക്കഞ്ചേരി സ്വദേശി ഷാജുവിനെയാണ് പൊലീസ് കസ്റ്റഡിയില്‍ എടുത്തത്. സിപിഎം ഉള്ളിയേരി കൊയക്കാട് വെസ്റ്റ് ബ്രാഞ്ച് സെക്രട്ടറി കൂടിയാണ് ഷാജു. ഷാജു ഭാര്യയുടെ ചികിത്സയ്ക്കായാണ് ആശുപത്രിയില്‍ എത്തിയത്. അപ്രതീക്ഷിതമായുണ്ടായ സംഭവം കണ്ട് കൂടി നിന്നവര്‍ക്ക് ചിരിപൊട്ടി. എന്നാല്‍ പോലീസുകാര്‍ ഞെട്ടിപ്പോയി. ജോളിക്കാകട്ടെ അമ്പരപ്പും. ഉടന്‍ തന്നെ ജോളിക്ക് സുരക്ഷയൊരുക്കിയ പൊലീസ് യുവാവിനെ കസ്റ്റഡിയിലെടുത്തു. സംഭവവുമായി ബന്ധപ്പെട്ട് കൊയിലാണ്ടി പൊലീസ് കേസ് രജിസ്റ്റര്‍ ചെയ്തു.

മറ്റൊരു ഗൂഢ ലക്ഷ്യവുമില്ലെന്നും വെറുമൊരു രസത്തിനാണ് ഇത് ചെയ്തതെന്നാണ് ഷാജു പറഞ്ഞത്. ഇത്രയേറെ കുറ്റം ചെയ്തിട്ടും മുഖം മറച്ച് നടക്കുന്നു. അന്നേരം തോന്നിയ ആവേശവും അതിന്റെ ഭവിഷ്യത്ത് ചിന്തിക്കാത്തതുമാണ് പ്രശ്‌നമായതെന്നും യുവാവ് പറഞ്ഞു.

അതിനിടെ കേസ് അന്വേഷണവുമായി ജോളി സഹകരിക്കുന്നില്ലെന്നാണ് പറയുന്നത്. ഓരോ ചോദ്യം ചെയ്യലിലും ജോളി തന്ത്രപരമായി ഒഴിയുകയാണെന്നും റിപ്പോര്‍ട്ടുണ്ട്. മൊഴിയെടുക്കല്‍ തുടങ്ങിയപ്പോള്‍ത്തന്നെ അസുഖമാണെന്ന് ജോളി പറഞ്ഞതോടെ കൊയിലാണ്ടി താലൂക്ക് ആശുപത്രിയിലേക്കു കൊണ്ടുപോയയത്. പരിശോധനകള്‍ക്കു ശേഷം തിരിച്ചെത്തിച്ചപ്പോഴും ചോദ്യങ്ങളില്‍നിന്ന് ഒഴിഞ്ഞുമാറി. പൊലീസ് കസ്റ്റഡി ഇന്ന് അവസാനിക്കുന്നതിനാല്‍ വിവരങ്ങളുടെ അവസാനവട്ട പരിശോധനയ്ക്ക് ഇതു തടസ്സമായെന്ന് അന്വേഷണ സംഘം പറയുന്നു. നേരത്തേ ചോദ്യം ചെയ്യലില്‍ ജോളി വെളിപ്പെടുത്തിയ പലതും കള്ളമാണെന്നും പൊലീസിനു വ്യക്തമാകുന്നുണ്ട്. മാത്യു മഞ്ചാടിയിലിനൊപ്പം മദ്യം കഴിച്ചപ്പോഴാണ് സയനൈഡ് ചേര്‍ത്തു നല്‍കിയതെന്ന മൊഴി കള്ളമാണെന്ന് അദ്ദേഹത്തിന്റെ ഭാര്യയും വ്യക്തമാക്കിയിട്ടുണ്ട്.

അതേസമയം ജോളി ഉള്‍പ്പെടെയുള്ള മൂന്ന് പ്രതികളുടെയും കസ്റ്റഡി കാലാവധി ഇന്ന് അവസാനിക്കുകയാണ്. ഒന്നാം പ്രതി ജോളി ജോസഫ്, രണ്ടാം പ്രതി മാത്യു, മൂന്നാം പ്രതി പ്രജുകുമാര്‍ എന്നിവരെ ഇന്ന് വൈകീട്ട് നാലിന് താമരശ്ശേരി ജുഡീഷ്യല്‍ ഫസ്റ്റ്ക്ലാസ് മജിസ്‌ട്രേറ്റ് കോടതിയില്‍ ഹാജരാക്കും. മൂന്ന് പ്രതികളുടേയും ജാമ്യാപേക്ഷ നാളെയാണ് കോടതി പരിഗണിക്കുക. അതേസമയം, പുതുതായി രജിസ്റ്റര്‍ ചെയ്ത അഞ്ച് കേസുകളുമായി ബന്ധപ്പെട്ട് ഇവരുടെ അറസ്റ്റ് ഉടന്‍ രേഖപ്പെടുത്താനും സാധ്യതയുണ്ട്. പ്രതികളുടെ ചോദ്യം ചെയ്യല്‍ ഇന്നും തുടരും. എന്‍ഐടിക്ക് സമീപം തയ്യല്‍ക്കടയില്‍ ജോലി ചെയ്തിരുന്ന ജോളിയുടെ സുഹൃത്തിനെ കേന്ദ്രീകരിച്ചും പൊലീസ് അന്വേഷണം തുടങ്ങിയിട്ടുണ്ട്. ജോളിക്കൊപ്പം യുവതി എന്‍ഐടിക്ക് സമീപം നില്‍ക്കുന്ന ചിത്രങ്ങളും അന്വേഷണ സംഘത്തിന് കിട്ടിയിട്ടുണ്ട്. യുവതി നിലവില്‍ ചെന്നൈയില്‍ എന്നാണ് സൂചന. അങ്ങോട്ടേയ്ക്കും അന്വേഷണം വ്യാപിപ്പിക്കുന്നുണ്ട്.