ആഡംബര ക്ലബില് അംഗത്വം നേടാന് കള്ള സര്ട്ടിഫിക്കറ്റ് സമര്പ്പിച്ച വിഐപികളെ പുറത്താക്കി
കാശുണ്ട് പക്ഷേ വിവരമില്ല, തലസ്ഥാന നഗരത്തിലെ പ്രമുഖ ആഡംബര ക്ലബില് അംഗത്വം നേടാന് കള്ള സര്ട്ടിഫിക്കറ്റ് നല്കിയ വിഐപികളെ ക്ലബ് അധികൃതര് പുറത്താക്കി. ഈ ക്ലബില് അംഗത്വം നേടുന്നതിന് എട്ടര ലക്ഷം രൂപയാണ് ഫീസ്. ഇതിന് മുമ്പ് അഞ്ച് ലക്ഷം രൂപയായിരുന്നു. വിഐപികളെന്ന് സ്വയം നടിക്കുന്നവരുടെ തള്ളിക്കയറ്റം കാരണം അംഗത്വ ഫീസ് എട്ടര ലക്ഷം രൂപയാക്കുകയായിരുന്നു. എന്നിട്ടും തള്ളലിന് കുറവൊന്നും വന്നില്ല. ഇതിനെ തുടര്ന്നാണ് അംഗത്വ ഫീസിനോടൊപ്പം ഡിഗ്രി സര്ട്ടിഫിക്കറ്റ് കൂടി ഹാജരാക്കണമെന്ന് നിര്ബന്ധമാക്കിയത്. ഇതോടെ പല വിഐപികളും വെട്ടിലായി.
പൈസ കൊടുത്ത് ക്ലബില് അംഗത്വം നേടിയ ശേഷം മറ്റുള്ളവരെ പരിഹസിക്കലും വെള്ളമടിച്ച് തോന്ന്യവാസം കാണിക്കലുമാണ് ചിലരുടെ പരിപാടിയെന്ന് ആക്ഷേപമുയര്ന്നു. മാത്രമല്ല യോഗ്യതയില്ലാത്ത പലരും അംഗങ്ങളാകുന്നുവെന്ന് ചൂണ്ടിക്കാട്ടി മുതിര്ന്ന അംഗങ്ങള് പരാതിയുമായി രംഗത്തെത്തി. ഇതിനെ തുടര്ന്നാണ് പുതുതായി ചേര്ന്ന അംഗങ്ങളുടെ യോഗ്യത പരിശോധിക്കാന് തീരുമാനിച്ചത്. പുതുതായി ചേര്ന്ന 98 അംഗങ്ങളുടെ യോഗ്യതയാണ് പരിശോധിക്കാന് തീരുമാനിച്ചത്. ഇതിനായി ഒരു കമ്മിറ്റിയെയും നിയോഗിച്ചു. എന്നാല് ബിരുദ സര്ട്ടിഫിക്കറ്റ് പരിശോധനയില് പല അംഗങ്ങളും സമര്പ്പിച്ചിരിക്കുന്നത് വ്യാജ സര്ട്ടിഫിക്കറ്റാണെന്ന് തെളിഞ്ഞു. പലരും മുത്തുമലൈ, പെരുമാള്മലൈ എന്നിങ്ങനെ ലോകത്തൊന്നും ഇല്ലാത്ത വ്യാജ യൂണിവേഴ്സിറ്റികളുടെ സര്ട്ടിഫിക്കറ്റുകളാണ് ഹാജരാക്കിയത്. ഇത്തരത്തില് 10 പേരുടെ സര്ട്ടിഫിക്കറ്റുകള് വ്യാജമാണെന്ന് കമ്മിറ്റിക്ക് ബോധ്യപ്പെട്ടു. 22 പേരുടെ സര്ട്ടിഫിക്കറ്റുകള് ദുരൂഹത ഉള്ളതായും കണ്ടെത്തി. 21 പേര് സര്ട്ടിഫിക്കറ്റ് ഹാജരാക്കാതെ നല്കിയ പണം മടക്കി വാങ്ങി സ്ഥലം കാലിയാക്കി.
വ്യാജ സര്ട്ടിഫിക്കറ്റ് നല്കിയവരെ ക്ലബ് അംഗത്വത്തില് നിന്ന് പുറത്താക്കിയതായുള്ള അറിയിപ്പ് ക്ലബ് അധികൃതര് നോട്ടീസ് ബോര്ഡില് നല്കി. ഇതിനെതിരെ ചില മുതലാളിമാര് കോടതിയില് പോകാന് തയ്യാറെടുക്കുകയാണ്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha