അപര്‍ണ നായര്‍ എന്ന യുവതി ഫേസ്ബുക്കില്‍ പങ്കുവച്ച കുറിപ്പില്‍, മദ്യപാനിയായ പിതാവ് ബാഗും പുസ്തകവും കത്തിച്ചു കളഞ്ഞതില്‍ മനംനൊന്ത് വീട് വിട്ടിറങ്ങിയ ഓട്ടിസം ബാധിച്ച കുട്ടിക്ക് കേരള പോലീസ് നല്‍കിയ കരുതലിന്റെ കഥ പറയുന്നു.

കേരള പോലീസും ഫേസ്ബുക്ക് പേജില്‍ ഈ കുറിപ്പ് പങ്കു വച്ചിട്ടുണ്ട്.

ആരും കാണാതെ വീട്ടില്‍ നിന്നുമിറങ്ങിയ കുട്ടി ഓട്ടോയില്‍ കയറിയാണ് പോയത്. സംശയം തോന്നിയ ഓട്ടോഡ്രൈവര്‍ വട്ടിയൂര്‍ക്കാവ് പോലീസ് സ്റ്റേഷനില്‍ എത്തിക്കുകയായിരുന്നു. പഠിക്കുന്ന സ്‌കൂളിന്റെ പേര് പറഞ്ഞപ്പോള്‍ പോലീസ് സ്‌കൂളുമായി ബന്ധപ്പെട്ടു.

അമ്മയും ടീച്ചറും വരുന്നത് വരെ സ്‌നേഹത്തോടെയും വാത്സല്യത്തോടെയും പരിചരിച്ച പോലീസ് കുട്ടിക്ക് എന്താണ് വേണ്ടതെന്ന് ആരാഞ്ഞു. ചെരിപ്പും ബാഗും വേണമെന്ന് അറിയിച്ചതോടെ പോലീസ് കുട്ടിക്ക് ഇത് വാങ്ങി നല്‍കി.

അവനത് വാങ്ങിക്കൊടുത്ത കാക്കിക്കുള്ളിലെ ആ സ്‌നേഹത്തിന് എന്നും കടപ്പെട്ടിരിക്കും എന്ന് കുറിച്ചാണ് അപര്‍ണ നായര്‍ തന്റെ കുറിപ്പ് അവസാനിപ്പിച്ചത്.