മരണമടഞ്ഞ് വര്ഷങ്ങള്ക്ക് ശേഷം പോലീസുകാരന് അത്യപൂര്വ്വ റിട്ടയര്മെന്റ്
എട്ട്വര്ഷം മുമ്പ് കുപ്രസിദ്ധ കുറ്റവാളി ആട് ആന്റണിയുടെ കുത്തേറ്റ് മരണമടഞ്ഞ പോലീസ് ഡ്രൈവര് മണിയന്പിള്ളയുടെ കുടുംബത്തിന് ഇനി മുതല് കുടുംബ പെന്ഷന് ലഭിക്കും. 2012 ജൂണ് 26-നായിരുന്നു മണിയന്പിള്ള ആട് ആന്റണിയുടെ കുത്തേറ്റ് മരിച്ചത്.
മോഷണം നടത്തിയ ശേഷം തമിഴ്നാട് രജിസ്ട്രേഷനിലുള്ള ഒമ്നി വാനില് വന്ന ആട് ആന്റണിയെ, കൊല്ലം പാരിപ്പള്ളിയില് ജവഹര് ജംഗ്ഷനില് വാഹന പരിശോധനയ്ക്ക് ഇടയില് ഗ്രേഡ് എസ്.ഐ ജോയിയും പൊലീസ് ഡ്രൈവര് മണിയന്പിള്ളയും ചേര്ന്ന് തടഞ്ഞു. എഎസ്ഐ ജോയിയെയും പൊലീസ് ഡ്രൈവര് മണിയന് പിള്ളയെയും വാനില് കിടന്ന കമ്പിപ്പാര എടുത്ത് കുത്തി. സ്ഥലത്ത് വെച്ചു തന്നെ മണിയന്പിള്ള മരിച്ചുപോകുകയും ഗുരുതരമായി പരിക്കേറ്റ നിലയില് ജോയിയെ ആശുപത്രിയില് പ്രവേശിപ്പിക്കുകയും ചെയ്തു. പൊലീസ് പിന്തുടര്ന്നതിനാല് ആന്റണി വാന് ഉപേക്ഷിച്ച് കടന്നുകളയുകയും ചെയ്തു.
കൊലയ്ക്കു ശേഷം രക്ഷപെട്ട ആട് ആന്റണി തമിഴ്നാട്, മഹാരാഷ്ട്ര, ആന്ധ്ര തുടങ്ങിയ സംസ്ഥാനങ്ങളില് പലപേരിലും പല വേഷത്തിലുമാണ് ഒളിവില് കഴിഞ്ഞത്. മൂന്നര വര്ഷത്തിന് ശേഷം 2015 ഒക്ടോബര് 13-ന് പാലക്കാട് തമിഴ്നാട് അതിര്ത്തിയിലെ ഗോപാലപുരത്തുവെച്ചാണ് പൊലീസ് പിടികൂടുന്നത്. ഭാര്യയെ കാണാന് എത്തിയപ്പോള് സ്പെഷല് ബ്രാഞ്ച് ഡിവൈ.എസ്.പിയുടെ നേതൃത്വത്തിലുള്ള സംഘം വളഞ്ഞിട്ട് പിടിക്കുകയായിരുന്നു. ആദ്യം രക്ഷപെടാന് ശ്രമിച്ച ആന്റണി പിന്നീട് പൊലീസിന് കീഴടങ്ങി.
ആടിന്റെ സ്ത്രീകമ്പം മുതലെടുത്താണ് പോലീസ് ആടിനെ പൊക്കിയതും. കൊലയ്ക്ക് ശേഷം തിരുവനന്തപുരത്തെ വീട്ടിലെത്തി ഭാര്യ സൂസണുമൊത്ത് ആട് മുങ്ങി. വഴിയില് സൂസണെ ഉപേക്ഷിച്ച് പുതിയ കാമുകിക്കൊപ്പം പോയി. 2015-ല് പാലക്കാട് നിന്നും ആടിനെ പിടികുടുന്നതും ഇയാളുടെ സ്ത്രീക്കമ്പം മുതലെടുത്താണ്. ഗോപാലപുരത്തെ ഒരു സ്ത്രീയുടെ വീട്ടില് സ്ഥിരമായി വരാറുള്ള ആടിനെ നിരീക്ഷിച്ച ശേഷമാണ് പ്രത്യേക അന്വേഷണ സംഘം പിടികൂടുന്നത്. ഒളിവില് കഴിയുമ്പോളും മോഷണം തുടര്ന്ന് ആന്റണി തമിഴ്നാട്ടിലെ ധാരാപുരത്ത് രാജേന്ദ്രന് എന്ന പേരില് താമസിക്കുന്നതിനിടെ ചെന്നെയില് പിടിയിലായെങ്കിലും രക്ഷപെട്ടു.
2012 ജൂണ് 26-ന് മുങ്ങിയ ആട് പിടിയിലായത് 2015 ഒക്ടോബര് 13-ന് പാലക്കാട് തമിഴ്നാട് അതിര്ത്തിയിലെ ഗോപാലപുരത്തുവെച്ചാണ്. 2016 ജൂലൈയില് കൊല്ലം സെഷന്സ് കോടതി ആട് ആന്റണിയെ കുറ്റക്കാരനാണെന്ന് കണ്ടെത്തി ജീവപര്യന്തം തടവ് ശിക്ഷ വിധിച്ചിരുന്നു. കൊലപാതകം, തെളിവ് നശിപ്പിക്കല്, വ്യവജരേഖ ചമയ്ക്കല്, വ്യാജരേഖ യഥാര്ത്ഥ രേഖയെന്ന തരത്തില് ഉപയോഗിക്കല്, ഔദ്യോഗിക കൃത്യ നിര്വ്വഹണത്തില് പരിക്കേല്പ്പിക്കല്, ഔദ്യോഗിക കസ്റ്റഡിയില് നിന്നും രക്ഷപ്പെടല് എന്നിങ്ങനെ ഏഴു കുറ്റങ്ങളാണ് ചുമത്തിയത്.
പോലീസ് ഡ്രൈവര് മണിയന്പിള്ളയുടെ മരണ ശേഷം ഭാര്യ സംഗീതാനായര്ക്ക് മുഴുവന് ശമ്പളവും ആനുകൂല്യവും സര്ക്കാര് നല്കി വരികയായിരുന്നു. മണിയന്പിള്ളയ്ക്ക് റിട്ടയര്മെന്റ് പ്രായപരിധിയായ 56 വയസ്സ് പൂര്ത്തിയായതിനെ തുടര്ന്ന് മെയ് 31-നായിരുന്നു ഔദ്യോഗികമായ വിരമിക്കല്. കൊട്ടറയിലെ വീട്ടിലാണ് മണിയന്പിള്ളയുടെ ഭാര്യയും മക്കളും കഴിയുന്നത്. കൊല്ലം റൂറല് പോലീസില് എല്ഡി ക്ളാര്ക്കായി രണ്ടു വര്ഷം മുമ്പ് മകള് ശ്രുതിക്ക് നിയമനം നല്കുകയും ചെയ്തിരുന്നു. ഇളയമകള് സ്വാതി പ്ളസ്ടൂവിന് പഠിക്കുകയാണ്.
https://www.facebook.com/Malayalivartha