തൃശ്ശൂര്‍ കയ്പമംഗലം പള്ളിനട പ്രദേശത്ത് 5 വര്‍ഷം മുന്‍പ് ആരോ ഉപേക്ഷിച്ച നായക്കുട്ടിയെ അപകടത്തില്‍ പരുക്കേറ്റ നിലയില്‍ നാട്ടുകാര്‍ കണ്ടെത്തിയിരുന്നു. ഇതിന് വേണ്ട ചികിത്സ നല്‍കി ആഴ്ച്ചകള്‍ക്ക് ശേഷം പുറത്തിറങ്ങിയ നായക്കുട്ടിക്ക് നാട്ടുകാര്‍ ടിന്റുമോള്‍ എന്ന പേരും നല്‍കി. പിന്നീട് നായ നാട്ടുകാരുടെ പ്രിയപ്പെട്ടവളായി.

എന്നാല്‍ മാസങ്ങള്‍ക്ക് മുന്‍പ് നായയുടെ പിന്‍ഭാഗത്ത് ഒരു വ്രണം കാണപ്പെട്ടു. മരുന്നു ചെയ്യാന്‍ നാട്ടുകാര്‍ ശ്രമിച്ചെങ്കിലും അതെല്ലാം വിഫലമായി. അസഹ്യമായ വേദനയാല്‍ നാട് മുഴുവനും പാഞ്ഞ് നടക്കുന്ന നായ നാട്ടുകാര്‍ക്ക് സങ്കട കാഴ്ച്ചയായി മാറി.

വിവരമറിഞ്ഞ ജനമൈത്രി പോലീസ് എസ്‌ഐ സുബിന്ദിന്റെ നേതൃത്വത്തില്‍ നടത്തിയ ഇടപെടലിലൂടെ ് ടിന്റു മോള്‍ക്ക് സംരക്ഷണം ഒരുങ്ങി. അര്‍ബുദ രോഗമാണെന്നും സര്‍ജറിയും ആറോളം കീമോയും വേണ്ടിവരുമെന്നാണ് ഡോക്ടര്‍മാര്‍ അറിയിച്ചത്. നായയെ സംരക്ഷിക്കാമെന്ന് ഏറ്റിട്ടുള്ള പള്ളി നടയിലെ നാട്ടുകാര്‍ക്ക്, ചികിത്സ കാലാവധിക്ക് ശേഷം തിരികെ നല്‍കുമെന്ന് എസ്‌ഐ അറിയിച്ചു.