ബേക്കല്‍ കോട്ടയില്‍ കണ്ടെത്തിയ ചരിത്ര സ്മൃതികള്‍ സന്ദര്‍ശകര്‍ ക്ക് കാണാന്‍ അവസരം ഒരുക്കണമെന്ന ആവശ്യം ഇനിയും നടപ്പായില്ല
കാസര്‍കോട് ബേക്കല്‍ കോട്ടയില്‍ ഒരുമാസത്തിലധികം നീണ്ട ഖനനത്തിലൂടെ 2001-ലാണ് ഇക്കേരി രാജവംശത്തിന്റെയും ടിപ്പുസുല്‍ത്താന്റെയും ഉള്‍പ്പെടെയുള്ള ചരിത്ര സ്മൃതികള്‍ കണ്ടെത്തിയത്. ഇവ സന്ദര്‍ശകര്‍ക്കു കാണാന്‍ അവസരം ഒരുക്കി ബേക്കല്‍ കോട്ടയോടു ചേര്‍ന്ന് ചരിത്ര മ്യൂസിയം സ്ഥാപിക്കണമെന്ന ആവശ്യം ഇനിയും നടപ്പായില്ല. കോട്ടയില്‍ കിഴക്കു ഭാഗത്ത് ഇക്കേരി രാജ വംശത്തിന്റെയും പടിഞ്ഞാറു ഭാഗത്തു നിന്നു ടിപ്പുസുല്‍ത്താന്‍ ഭരണകാലത്തെ നിര്‍മിതികളായിരുന്നു കേന്ദ്ര പുരാവസ്തു വകുപ്പിന്റെ നേതൃത്വത്തില്‍ നടന്ന ഖനനത്തില്‍ കിട്ടിയത്. ഇവ ഇപ്പോള്‍ തൃശൂരില്‍ ആര്‍ക്കിയോളജിക്കല്‍ സര്‍വേ ഓഫ് ഇന്ത്യയുടെ കസ്റ്റഡിയിലാണുള്ളത്.
ടിപ്പു സുല്‍ത്താന്റെ ഭരണ കാലത്ത് ഇവിടെ നാണയ മുദ്രണശാലയുണ്ടായിരുന്നുവെന്നതിന്റെ തെളിവായി ആ കാലഘട്ടത്തിലെ മുന്നൂറോളം നാണയങ്ങളും അച്ചുകളും അന്നു കണ്ടെത്തിയിരുന്നു. നാണയങ്ങള്‍ പല വലുപ്പത്തിലുള്ളതും ചെമ്പു കൊണ്ട് ഉണ്ടാക്കിയവയുമായിരുന്നുവെന്നും മുദ്രണം ചെയ്ത വിവരങ്ങള്‍ പേര്‍ഷ്യന്‍ ലിപി ആയിരുന്നുവെന്നും കാഞ്ഞങ്ങാട് നെഹ്‌റു ആര്‍ട്‌സ് ആന്‍ഡ് സയന്‍സ് കോളജിലെ ചരിത്ര അധ്യാപകനായിരുന്ന ഡോ.സി.ബാലന്‍ പറയുന്നു. ടെറാക്കോട്ടയിലും ചെമ്പിലും ഉണ്ടാക്കിയ 2 അച്ചുകള്‍, 2 വെള്ളി നാണയം, ചെമ്പു നാണയങ്ങള്‍ തയാറാക്കാനുള്ള ഒട്ടേറെ ചെമ്പു കട്ടകള്‍ തുടങ്ങിയവയും കണ്ടെത്തി.
നാലുകെട്ട് മാതൃകയിലുള്ള ഒരു കെട്ടിടം, അടുക്കള, അടുപ്പുകള്‍, ധാന്യം പൊടിക്കാന്‍ ഉപയോഗിക്കുന്ന കരിങ്കല്ലില്‍ ഉണ്ടാക്കിയ അരകല്ല് എന്നിവയും ലഭിച്ച വസ്തുക്കളില്‍പെടും. 2 കിണറുകള്‍ക്കു നടുവില്‍ ഉള്ള വീട് നാണയ മുദ്രണശാലയുടെ മേല്‍നോട്ടക്കാരന്റേതും സമീപ വീടുകള്‍ നാണയ മുദ്രണ ശാലയിലെ തൊഴിലാളികളുടേതുമായിരിക്കാമെന്ന വിലയിരുത്തലിലാണ് വിദഗ്ധര്‍. കമ്മല്‍, വളകളുടെ കഷണങ്ങള്‍, മണ്‍കുടങ്ങള്‍, പാത്രങ്ങള്‍, ക്ഷേത്രങ്ങളില്‍ വഴിപാടായി നല്‍കാറുള്ള ആള്‍ രൂപങ്ങള്‍, സ്വര്‍ണ രൂപങ്ങള്‍ തുടങ്ങിയവയെല്ലാം അന്നു കിട്ടിയവയില്‍ ഉള്‍പ്പെടും. മൈസൂരു രാജവംശം, സുല്‍ത്താന്മാര്‍, ഇക്കേരി രാജവംശം തുടങ്ങിയ കാലഘട്ടത്തിലെ പാത്രങ്ങളും നാണയങ്ങളും മറ്റുമാണു പ്രധാനമായും കിട്ടിയിട്ടുള്ളത്.
ചരിത്ര ശേഷിപ്പുകള്‍ ബേക്കലില്‍ തന്നെ ദിവസവും കാണാന്‍ സൗകര്യം ഒരുക്കുന്നതു സഞ്ചാരികളെ ഇവിടേക്ക് ആകര്‍ഷിക്കും. ബേക്കലിന്റെ രാജ്യാന്തര പ്രാധാന്യവും വര്‍ധിപ്പിക്കും. ഈ ആവശ്യം ഉന്നയിച്ച് ഡോ.സി.ബാലനും ടൂറിസം വകുപ്പ് അധികൃതരും ജില്ലാ ഭരണകൂടത്തിനും പുരാവസ്തു വകുപ്പിനും കത്തെഴുതിയിരുന്നു. ബേക്കല്‍ കോട്ടയ്ക്കു പുറത്തു സര്‍ക്കാര്‍ ഉടമസ്ഥതയിലുള്ള സ്ഥലം കൂടി ലഭ്യമാക്കി സൗകര്യങ്ങള്‍ വിപുലപ്പെടുത്തി മ്യൂസിയം സ്ഥാപിക്കണമെന്നാണ് ആവശ്യം.
https://www.facebook.com/Malayalivartha
