പഞ്ചരത്‌നങ്ങളില്‍ മൂന്നുപേര്‍ക്ക് നാളെ മാംഗല്യം
ഒരുമിച്ചു പിറന്നു വാര്‍ത്തകളില്‍ ഇടം നേടിയ പഞ്ചരത്‌നങ്ങളില്‍ മൂന്നു സഹോദരിമാര്‍ കണ്ണന്റെ തിരുനടയില്‍ നാളെ വിവാഹിതരാകും.
ഒക്ടോബര്‍ 24-ാം തീയതി രാവിലെ 7.45-ന് ഫാഷന്‍ ഡിസൈനറായ ഉത്രയെ മസ്‌കത്തില്‍ ഹോട്ടല്‍ മാനേജരായ ആയൂര്‍ സ്വദേശി കെ.എസ്.അജിത്കുമാറും ഓണ്‍ലൈന്‍ മാധ്യമപ്രവര്‍ത്തന രംഗത്തുള്ള ഉത്തരയെ കോഴിക്കോട് സ്വദേശിയായ മാധ്യമ പ്രവര്‍ത്തകന്‍ കെ.ബി.മഹേഷ് കുമാറും അനസ്തീസിയ ടെക്‌നിഷ്യന്‍ ആയ ഉത്തമയെ മസ്‌കത്തില്‍ അക്കൗണ്ടന്റായ വട്ടിയൂര്‍ക്കാവ് സ്വദേശി ജി.വിനീതും താലികെട്ടും.
കൃഷ്ണ ഭക്തയായ അമ്മ രമാദേവിയുടെ പ്രാര്‍ഥനാ സാഫല്യത്തിന് ഇനി ഒരു രാത്രി കൂടി. അമ്മയും മക്കളും ഇന്നലെ വൈകിട്ടോടെ ഗുരുവായൂരില്‍ എത്തി. ഏപ്രില്‍ 26-ന് നടത്താനിരുന്ന വിവാഹം കോവിഡ് വ്യാപനത്തില്‍ വരന്‍മാര്‍ വിദേശത്തു കുടുങ്ങിയതോടെ നീട്ടി വയ്ക്കുകയായിരുന്നു.
കുവൈത്തില്‍ അനസ്തീസിയ ടെക്‌നിഷ്യനായ പത്തനംതിട്ട സ്വദേശി ടി.ആകാശിന് ഇനിയും നാട്ടിലെത്താനായിട്ടില്ല എന്നതിനാല്‍ കൊച്ചി അമൃത മെഡിക്കല്‍ കോളജില്‍ അനസ്തീസിയ ടെക്‌നിഷ്യന്‍ ആയ ഉത്രജയുടെ വിവാഹം പിന്നീടു നടക്കും. ഏക മകന്‍ ഉത്രജനാണ് കാരണവര്‍ സ്ഥാനത്തു നിന്നു സഹോദരിമാരുടെ കൈ പിടിച്ചേല്‍പ്പിക്കുന്നത്.
പ്രേംകുമാര്‍-രമാദേവി ദമ്പതികളുടെ മക്കളായി 1995 വൃശ്ചിക മാസത്തിലെ (നവംബര്‍ 18) ഉത്രം നാളില്‍ നിമിഷങ്ങളുടെ വ്യത്യാസത്തിലാണ് അഞ്ചു പേരുടെയും ജനനം. മക്കളുടെ ഒന്‍പതാം വയസ്സില്‍ പ്രേംകുമാര്‍ ജീവിതം അവസാനിപ്പിച്ചതോടെ വന്‍ കടബാധ്യതയ്ക്ക് നടുവില്‍ കുടുംബം നിസ്സഹായരായിപ്പോയി. ചുമതലകളും ബാധ്യതകളും താങ്ങാനാകാതെ അമ്മ രമാദേവിയുടെ ഹൃദയതാളവും തെറ്റി. പിന്നീടു പേസ്‌മേക്കറിന്റെ സഹായത്തോടെയായി ജീവിതം. പക്ഷേ സുമനസ്സുകള്‍ കുടുംബത്തെ കൈയൊഴിഞ്ഞില്ല. ജില്ലാ സഹകരണ ബാങ്ക് പോത്തന്‍കോട് ശാഖയില്‍ രമാദേവിക്കു ജോലി ലഭിച്ചതും ആശ്വാസമായി.
https://www.facebook.com/Malayalivartha
