പ്രായപൂര്‍ത്തിയാകാത്ത പെണ്‍കുട്ടി ആത്മഹത്യ ചെയ്ത സംഭവത്തില്‍ യുവതിയെ പോക്സോ നിയമപ്രകാരം അറസ്റ്റ് ചെയ്തു. വരന്തരപ്പിള്ളി ചക്കുങ്ങല്‍വീട്ടില്‍ അഭിരാമി (24)യെയാണ് ടൗണ്‍ ഈസ്റ്റ് പോലീസ് അറസ്റ്റ് ചെയ്തത്.

പെണ്‍കുട്ടി മരിച്ച്‌ ഒരു വര്‍ഷത്തിന് ശേഷമാണ് യുവതി പിടിയിലാകുന്നത്. കഴിഞ്ഞ വര്‍ഷം ജനുവരിയില്‍ തൂങ്ങി മരിച്ച പെണ്‍കുട്ടിയെ മരണത്തിനു മുമ്പ് പീഡിപ്പിച്ചതായാണ് കേസ്.

മരിച്ച പെണ്‍കുട്ടിക്ക് ആണ്‍ സുഹൃത്തുമായുണ്ടായിരുന്ന പ്രണയ ബന്ധം അവസാനിപ്പിക്കണമെന്ന് യുവതി താക്കീത് നല്‍കിയിരുന്നു.

മാനസിക സമ്മര്‍ദം ഏറിയപ്പോഴാണ് പെണ്‍കുട്ടി ആത്മഹത്യ ചെയ്തതെന്ന് അന്വേഷണത്തില്‍ തെളിഞ്ഞു. ഇതോടെ യുവതിയ്ക്കെതിരേ ആത്മഹത്യാ പ്രേരണക്കുറ്റവും ചുമത്തിയിട്ടുണ്ട്.

അഭിരാമിയും മരിച്ച പെണ്‍കുട്ടിയുമായുള്ള ബന്ധത്തെപ്പറ്റി അന്വേഷണത്തിനിടയില്‍ ബന്ധുക്കള്‍ പോലീസിനെ അറിയിച്ചിരുന്നു.

ഇതുസംബന്ധിച്ച തെളിവുകള്‍ യുവതിയുടെ ഫോണില്‍നിന്ന് ലഭിച്ചതായും പൊലീസ് വ്യക്തമാക്കി.