തോമസ് ഐസക്ക് പച്ചക്കള്ളം പറയുന്നുവെന്ന് വി.ഡി സതീശന്‍; അന്തിമ റിപ്പോര്‍ട്ടിന് മുമ്പ് തന്നെ സി.എ.ജി സര്‍ക്കാരിന് വിശദീകരണത്തിന് അവസരം നല്കി; ധനമന്ത്രി ശ്രമിച്ചത് കേന്ദ്ര സ്ഥാപനങ്ങള്‍ സംസ്ഥാന സര്‍ക്കാരിനെ തകര്‍ക്കാന്‍ ശ്രമിക്കുന്നുവെന്ന ഇമേജ്; സര്‍ക്കാര്‍ ഭരണഘടന ലംഘനം നടത്തി
ധനമന്ത്രി തോമസ് ഐസക്കിനെ രൂക്ഷമായി വിമര്‍ശിച്ച് വി.ഡി സതീശന്‍ നിയമസഭയില്‍. സി.എ.ജി റിപ്പോര്‍ട്ടിനെ സംബന്ധിച്ച് പ്രതിപക്ഷം നിയമസഭയില്‍ അവതരിച്ച അടിയന്തര പ്രമേയ ചര്‍ച്ചയില്‍ പങ്കെടുത്തു സംസാരിക്കവെയാണ് തോമസ് ഐസക്ക് നടത്തിയ നിയമ വിരുദ്ധ പ്രവര്‍ത്തനങ്ങളെ സതീശന്‍ അക്കമിട്ട് നിരത്തിയത്. മന്ത്രി മനപൂര്‍വം അറിഞ്ഞു കൊണ്ടു തന്നെ വിവാദമാക്കുക എന്ന ലക്ഷ്യത്തോടെയാണ് സി.എ.ജി റിപ്പോര്‍ട്ട് നിയമസഭയില്‍ എത്തുന്നതിന് മുമ്പ് ചോര്‍ത്തിയതെന്ന് സതീശന്‍ ആരോപിച്ചു.
അന്തിമ റിപ്പോര്‍ട്ടിന് തയ്യാറാക്കുന്നതിന് മുമ്പ് സി.എ.ജി യോഗം ചേര്‍ന്നു. കിഫ്ബിയെ കുറിച്ച് വിശദീകരിക്കുന്നതിന് ധനകാര്യ വകുപ്പിന് സി.എ.ജി അവസരം നല്കി. യോഗത്തിന്റെ മിനിറ്റസ് ധനവകുപ്പിലേക്ക് സി.എ.ജി അയച്ചു. അയച്ചില്ലെന്ന മന്ത്രിയുടെ വാദം തെറ്റാണ്. സി.എ.ജി റിപ്പോര്‍ട്ടില്‍ നടത്തിയ നിരീക്ഷണത്തോട് യോജിക്കുന്നു. സര്‍ക്കാര്‍ ഭരണഘടന ലംഘിച്ചു. കടമെടുക്കുന്നതിന് ആര്‍.ബി.ഐ നിര്‍ദ്ദേശിച്ച മാനദണ്ഡങ്ങള്‍ ഒന്നും പാലിച്ചില്ല. സി.എ.ജിക്കെതിരെ ധനമന്ത്രി ഉന്നയിക്കുന്ന വാദങ്ങള്‍ ഒരു അടിസ്ഥാനവുമില്ലെന്നും സതീശന്‍ പറഞ്ഞു.
കിഫ്ബിയിലെ നടപടികള്‍ ശരിയല്ലെന്ന് മുന്‍ ചീഫ് സെക്രട്ടറിയും ധനവകുപ്പ് സെക്രട്ടറിയും എതിര്‍ത്തിട്ടുണ്ട്. ഇത് വക വയ്ക്കാന്‍ ധനമന്ത്രി തയ്യാറാല്ല. സംസ്ഥാന സര്‍ക്കാരിനെ മാത്രമല്ല കേന്ദ്ര സര്‍ക്കാരിനെയും വിവിധ സര്‍ക്കാരുകളെയും സി.എ.ജി വിമര്‍ശിച്ചു റിപ്പോര്‍ട്ട് നല്‍കിട്ടുണ്ട്. മോദി സര്‍ക്കാരിനെ വിമര്‍ശിച്ച് സി.എ.ജി റിപ്പോര്‍ട്ട് നല്‍കിയപ്പോള്‍ കേന്ദ്ര ധനമന്ത്രി ആ റിപ്പോര്‍ട്ട് ചോര്‍ത്തി നല്‍കിയില്ല. വ്യവസ്ഥാവിത മാര്‍ഗ്ഗങ്ങളിലൂടെ പ്രതികരിക്കുകയാണ് ചെയ്തത്. ധനമന്ത്രി ശ്രമിച്ചത് റിപ്പോര്‍ട്ട് സമര്‍പ്പിക്കുന്നതിന് മുമ്പ് സംഭവം വിവാദമാക്കി കേന്ദ്ര സ്ഥാപനങ്ങള്‍ സംസ്ഥാന സര്‍ക്കാരിനെ തകര്‍ക്കാന്‍ ശ്രമിക്കുന്നുവെന്ന ഇമേജ് സൃഷ്ടിക്കാനാണെന്നും അദ്ദേഹം കുറ്റപ്പെടുത്തി.
അതെ സമയം സിഎജി റിപ്പോര്‍ട്ട് ചോര്‍ത്തിയെന്ന പ്രതിപക്ഷത്തിന്റെ അവകാശലംഘനപരാതിയില്‍ ധനമന്ത്രിക്ക് എത്തിക്‌സ് കമ്മിറ്റിയുടെ ക്ലീന്‍ചിറ്റ് നല്‍കിയിരുന്നു. പരാതിയില്‍മേലുള്ള തുടര്‍നടപടി അവസാനിപ്പിക്കണമെന്ന ശുപാര്‍ശയോടെ റിപ്പോര്‍ട്ട് നിയമസഭയില്‍ വച്ചു. സര്‍ക്കാരിന്റെ വാദം കേള്‍ക്കാതെ റിപ്പോര്‍ട്ട് തയ്യാറാക്കിയെന്ന സിഎജിക്കെതിരായ ഐസക്കിന്റെ പരാതി ഗൗരവമേറിയതാണെന്ന് എത്തിക്‌സ് കമ്മിറ്റി വിലയിരുത്തി. നിയമസഭയില്‍ വയ്ക്കുന്നതിന് മുന്‍പ് സിഎജി റിപ്പോര്‍ട്ട് ധനമന്ത്രി പുറത്ത് വിട്ടത് വലിയ വിവാദമായിരുന്നു. വി ഡി സതീശനാണ് ഐസക്കിനെതിരെ അവകാശലംഘനപരാതി കൊടുത്തത്. എ പ്രദീപ്കുമാര്‍ അധ്യക്ഷനായ എത്തിക്‌സ് കമ്മിറ്റി ഐസക്കിനെയും സതീശനെയും വിളിച്ച് വരുത്തി വിശദീകരണം തേടിയ ശേഷമാണ് റിപ്പോര്‍ട്ട് തയ്യാറാക്കിയത്.
ഭരണപക്ഷാംഗങ്ങള്‍ ഭൂരിപക്ഷമുള്ള കമ്മിറ്റി ഐസക്കിന്റെ വാദങ്ങളാണ് അംഗീകരിച്ചത്. സര്‍ക്കാരിന്റ വാദം കേള്‍ക്കാതെ സിഎജി റിപ്പോര്‍ട്ടില്‍ ചില കൂട്ടിച്ചേര്‍ക്കലുകള്‍ വരുത്തി. ഇത് ഗുരുതരമായ ചട്ടലംഘനമാണ്. അത് കൊണ്ടാണ് വിശദീകരണവുമായി രംഗത്ത് വന്നതെന്നായിരുന്നു ഐസക്കിന്റെ വിശദീകരണം. ഇതാണ് അവകാശലംഘനപരിതിയേക്കാള്‍ ഗൗരവമെന്നാണ് എത്തിക്‌സ് കമ്മിറ്റിയുടെ കണ്ടെത്തല്‍. ഐസക്കിനെതിരെ നടപടി വേണ്ടെന്ന ശുപാര്‍ശക്ക് പ്രതിപക്ഷ അംഗങ്ങള്‍ വിയോജിപ്പ് രേഖപ്പെടുത്തിയിട്ടുണ്ട്.
https://www.facebook.com/Malayalivartha
