തൃശ്ശൂരില് യു.ഡി.എഫിന്റെ അട്ടിമറി; കളമശ്ശേരിയില് എല്.ഡി.എഫിന്റെ അട്ടിമറി; അട്ടിമറി വിജയങ്ങള് ഭരണം മാറ്റുമോ? എല്.ഡി.എഫിനൊപ്പം തുടരുമെന്ന് തൃശ്ശൂര് മേയറും കോണ്ഗ്രസ് വിമതനുമായ എം.കെ വര്ഗ്ഗീസ്; കളശ്ശേരിയില് അവിശ്വാസം കൊണ്ടുവരാന് എല്.ഡി.എഫ്
ഇന്നലെ തെരഞ്ഞെടുപ്പ് നടന്ന സംസ്ഥാനത്തെ ഏഴ് വാര്ഡുകളിലേക്കുള്ള വോട്ടെടുപ്പ് തുടങ്ങി. തൃശ്ശൂരില് യു.ഡി.എഫും കളമശ്ശേറിയില് എല്.ഡി.എഫും അട്ടിമറി വിജയം നേടി. തൃശ്ശൂര് കോര്പ്പറേഷനിലെ പുല്ലഴി വാര്ഡ് എല്ഡിഎഫില്നിന്ന് യുഡിഎഫ് പിടിച്ചെടുത്തു. 998 വോട്ടിന്റെ ഭൂരിപക്ഷത്തിനാണ് യുഡിഎഫ് സ്ഥാനാര്ത്ഥി കെ. രാമനാഥന് വിജയിച്ചത്. കെ. രാമനാഥന് 2052 വോട്ടുകള് നേടിയപ്പോള് എല്ഡിഎഫിലെ അഡ്വ. മഠത്തില് രാമന്കുട്ടി 1049 വോട്ടും എന്ഡിഎയിലെ സന്തോഷ് പുല്ലഴി 539 വോട്ടുകളും സ്വന്തമാക്കി.
തൃശ്ശൂരില് യു.ഡി.എഫ് വിമതന്റെ പിന്തുണയോടെയാണ് എല്.ഡി.എഫ് ഭരണം പിടിച്ചത്. തൃശൂര് കോര്പ്പറേഷന് ഡിവിഷന് നെട്ടിശേരിയില് കോണ്ഗ്രസ് വിമതനായി മത്സരിച്ച എംകെ വര്ഗീസിന് കോര്പ്പറേഷന് മേയര് സ്ഥാനം നല്കിയാണ് എല്.ഡി.എഫ് ഭരണം പിടിച്ചത്. 25 വോട്ടുകളാണ് എംകെ വര്ഗീസിന് ലഭിച്ചത്. യുഡിഎഫിന് 23 വോട്ടുകളാണ് ലഭിച്ചത്. ഇരുമുന്നണികള്ക്കും വ്യക്തമായ ഭൂരിപക്ഷം ലഭിക്കാതെയായതോടെയാണ് വിമതന് എംകെ വര്ഗീസിന്റെ തീരുമാനം നിര്ണായകമായത്. ഇരുമുന്നണികളും മേയര് സ്ഥാനം വാഗ്ദാനം ചെയ്തെങ്കിലും എം കെ വര്ഗീസ് എല്ഡിഎഫിനൊപ്പം നില്ക്കാന് തീരുമാനിക്കുകയായിരുന്നു. എന്നാല് പല്ലഴി വാര്ഡില് കോണ്ഗ്രസ് സ്ഥാനാര്ഥി ജയിച്ചതോടെ കക്ഷി നില 25-24 എന്ന നിലയില് എത്തിയിരിക്കുകയാണ്. എല്.ഡി.എഫിനൊപ്പം തുടരുമെന്ന് എം.കെ വര്ഗ്ഗീസ് വ്യക്തമാക്കിയതിനാല് ഭരണം അട്ടിമറി സാധ്യത കുറവാണ്. എന്നാല് അട്ടിമറിയുണ്ടാവില്ലെന്ന് ഉറപ്പിച്ച് പറയാനും സാധിക്കില്ല.
കളമശേരി 37ാം വാര്ഡില് എല്ഡിഎഫ് സ്ഥാനാര്ത്ഥിക്ക് അട്ടിമറി ജയം. ഇടതു സ്വതന്ത്രന് റഫീഖ് മരയ്ക്കാര് ആണ് ജയിച്ചത്. 64 വോട്ടുകള്ക്കാണ് റഫീക്കിന്റെ വിജയം. റഫീഖിന് 308 വോട്ടും യുഡിഎഫ് സ്ഥാനാര്ത്ഥി സലീമിന് 244 വോട്ടും ലഭിച്ചു. ബിജെപി സ്ഥാനാര്ത്ഥിക്ക് 13 വോട്ടാണ് ലഭിച്ചത്. ലീഗിന്റെ സിറ്റിങ് സീറ്റിലാണ് എല്ഡിഎഫ് അട്ടിമറി വിജയം നേടിയത്. കളമശ്ശേരിയില് നിലവില് 20-20 എന്ന രീതിയിലായിരുന്ന ഇരുപക്ഷവും. തുടര്ന്ന് നറുക്കെടുപ്പിലേക്ക് നീങ്ങുകയും യുഡിഎഫ് വിജയിക്കുകയുമായിരുന്നു.
റഫീഖിന്റെ വിജയത്തോടെ കക്ഷിനില 20-21 എന്നായി. നിലവില് ഭരണത്തെ ബാധിക്കില്ല. അതെ സമയം ഭരണം പിടിച്ചെടുക്കാനാകുമെന്ന പ്രതീക്ഷയിലാണ് എല്ഡിഎഫ്. എന്നാല് അവിശ്വാസപ്രമേയം കൊണ്ടുവന്നാല് ഭരണം പിടിക്കാനാവുമെന്നും വിമതര് യുഡിഎഫിനെ കൈവിടുമെന്നും റഫീഖ് മരയ്ക്കാര് പറഞ്ഞു. 25 വര്ഷമായി യുഡിഎഫ് വിജയിച്ചിരുന്ന വാര്ഡിലാണ് എല്ഡിഎഫിന്റെ വിജയം. കോണ്ഗ്രസ് വിമത സ്ഥാനാര്ത്ഥിയെ നിര്ത്തിയിരുന്നു. ലീഗും സ്ഥാനാര്ത്ഥിയെ നിര്ത്തി. തോല്വിക്കു കാരണം യുഡിഎഫിലെ കാലുവാരലെന്ന് ലീഗ് നേതാവ് പി.എം.എ. ലത്തീഫ്. മൂന്ന് ലീഗ് അംഗങ്ങളുടെ പിന്തുണയോടെയാണ് ഇവിടെ നഗരസഭ ഭരണം. കോണ്ഗ്രസ് നടപടി എടുത്തില്ലെങ്കില് ലീഗ് ഭാവി തീരുമാനിക്കുമെന്നും ലത്തീഫ് പറഞ്ഞു.
https://www.facebook.com/Malayalivartha