കന്യാസ്ത്രീക്ക് എതിരെ മോശം പരാമര്‍ശം; പി.സി ജോര്‍ജിന് നിയമസഭയുടെ ശാസന; താന്‍ വിമര്‍ശിച്ചത് കന്യാസ്ത്രീയെ അല്ല, അവരെ സഭ പുറത്താക്കിയതാണെന്ന് പി.സി ജോര്‍ജ്; പി.സി ജോര്‍ജിനെതിരായ ശാസന പ്രിവിലേജസ് ആന്‍ഡ് എത്തിക്സ് കമ്മിറ്റിയുടെ റിപ്പോര്‍ട്ടിനെ തുടര്‍ന്ന്
കന്യാസ്ത്രീക്ക് എതിരെ മോശം പരാമര്‍ശം നടത്തിയ പരാതിയില്‍ പി.സി.ജോര്‍ജ് എംഎല്‍എക്ക് നിയമസഭയുടെ ശാസന. സ്പീക്കര്‍ പി.ശ്രീരാമകൃഷ്ണന്‍ ഇന്ന് അദ്ദേഹത്തെ ശാസിച്ചു. അന്തസും ധാര്‍മികമൂല്യവും നിലനിര്‍ത്താന്‍ അംഗങ്ങള്‍ ബാധ്യസ്ഥരാണെന്ന് സ്പീക്കര്‍ പറഞ്ഞു. ശാസന ആദരവോടെ സ്വീകരിക്കുന്നതായി പി.സി. ജോര്‍ജ് പറഞ്ഞു. താന്‍ ആക്ഷേപിച്ചത് കന്യാസ്ത്രീയെ അല്ലെന്നും അവരെ സഭയില്‍ നിന്നു പുറത്താക്കിയതാണെന്നും പി.സി. ജോര്‍ജ് പറഞ്ഞു.
കന്യാസ്ത്രീക്ക് എതിരെ മോശം പരാമര്‍ശം നടത്തിയ പരാതിയില്‍ ജോര്‍ജിനെ ശാസിക്കണമെന്ന പ്രിവിലേജസ് ആന്‍ഡ് എത്തിക്സ് കമ്മിറ്റിയുടെ റിപ്പോര്‍ട്ട് ഇന്നലെ നിയമസഭ അംഗീകരിച്ചിരുന്നു. എത്തിക്സ് കമ്മിറ്റിയുടെ തീരുമാനം അംഗീകരിക്കുന്നതായി പി.സി.ജോര്‍ജ് നിയമസഭയെ അറിയിച്ചു. ബിഷപ് ഫ്രാങ്കോ മുളയ്ക്കലിനെ അധിക്ഷേപിച്ച കന്യാസ്ത്രീക്കെതിരെയാണു താന്‍ ശബ്ദമുയര്‍ത്തിയത്. അത്തരം സാഹചര്യങ്ങളില്‍ ഈ നിലപാട് ആവര്‍ത്തിക്കുമെന്നും ജോര്‍ജ് ഇന്നലെ വ്യക്തമാക്കിയിരുന്നു.
വനിത കമ്മിഷന്‍ അദ്ധ്യക്ഷ എം സി ജോസഫൈന്‍ അടക്കമുളളവര്‍ ആയിരുന്നു പി സി ജോര്‍ജിന് എതിരെ പരാതി നല്‍കിയത്. പീഡനത്തിന് ഇരയായ കന്യാസ്ത്രീയെ അപമാനിക്കുന്ന തരത്തില്‍ എംഎല്‍എ പരാമര്‍ശം നടത്തിയെന്ന് ആയിരുന്നു പരാതി. പരാതി പരിശോധിച്ച എത്തിക്സ് കമ്മിറ്റി എം എല്‍ എ കന്യാസ്ത്രീക്ക് എതിരെ നടത്തിയ പരാമര്‍ശങ്ങള്‍ അതിരുകടന്നതാണെന്ന് വിലയിരുത്തി. അതിനു ശേഷമാണ് എം എല്‍ എയെ ശാസിക്കാന്‍ ശുപാര്‍ശ ചെയ്തുളള റിപ്പോര്‍ട്ട് നിയമസഭയില്‍ സമര്‍പ്പിച്ചത്.
ജലന്ധര്‍ ബിഷപ്പിനെതിരെ ലൈംഗികപീഡന പരാതി നല്‍കിയ കന്യാസ്ത്രീക്ക് എതിരെ പി സി ജോര്‍ജ് നടത്തിയ പരാമര്‍ശമാണ് വ്യാപക പ്രതിഷേധത്തിന് കാരണമായത്. ഇതിനു പിന്നാലെ കന്യാസ്ത്രീക്ക് എതിരെ നടത്തിയ മോശം പരാമര്‍ശം പിന്‍വലിക്കുന്നതായി പി സി ജോര്‍ജ് എം എല്‍ എ പറഞ്ഞിരുന്നു. ആരേയും പേടിച്ചിട്ടല്ല തന്റെ തീരുമാനമെന്നും മറ്റു പരാമര്‍ശങ്ങളില്‍ ഉറച്ചുനില്‍ക്കുന്നതായും അദ്ദേഹം അന്ന് പറഞ്ഞിയിരുന്നു. ഏത് സ്ത്രീയെക്കുറിച്ചും ആ വാക്കുകള്‍ ഉപയോഗിക്കാന്‍ പാടില്ലായിരുന്നു. കോട്ടയത്ത് മാധ്യമ പ്രവര്‍ത്തകരുടെ ബഹളത്തിനിടയില്‍ പറഞ്ഞു പോയതാണ്. അതില്‍ ദുഃഖമുണ്ട്. മറ്റെല്ലാ പരാമര്‍ശങ്ങളിലും ഉറച്ചുനില്‍ക്കുന്നു. തന്റെ പക്കല്‍ എല്ലാ തെളിവുകളുമുണ്ടെന്നും അദ്ദേഹം അവകാശപ്പെട്ടു.
പി.സി.ജോര്‍ജിന്റെ വാക്കുകള്‍ അങ്ങേയറ്റം അപമാനകരം ആയിരുന്നുവെന്ന് കന്യാസ്ത്രീകള്‍ പ്രതികരിച്ചിയിരുന്നു. തോന്നിയത് പറഞ്ഞിട്ട് മാപ്പ് പറഞ്ഞിട്ട് കാര്യമില്ല. നിയമപരമായി തന്നെ നേരിടുമെന്നും അവര്‍ വ്യക്തമാക്കിയിരുന്നു. പി.സി ജോര്‍ജ് എം.എല്‍.എ നടത്തിയ പരാമര്‍ശം വ്യാപക പ്രതിഷേധത്തിന് ഇടയാക്കിയിരുന്നു. വിഷയത്തില്‍ ഇടപെട്ട ദേശീയ മനുഷ്യാവകാശ കമ്മീഷന് വരെ ഇടപ്പെട്ടിയിരുന്നു. വിഷയത്തില്‍ ശക്തമായ നടപടി ആവശ്യപ്പെട്ട് സംസ്ഥാന ഡി.ജി.പി ലോക്നാഥ് ബെഹ്റയ്ക്ക് ദേശീയ മനുഷ്യാവകാശ കമ്മീഷന് അധ്യക്ഷ രേഖാ ശര്‍മ കത്ത് അയച്ചിയിരുന്നു.
https://www.facebook.com/Malayalivartha
