തില്ലങ്കേരി ഡിവിഷനില് കണ്ടത് ബി.ജെ.പിയുടെ പുതിയ രാഷ്ട്രീയ പരീക്ഷണം; കോണ്ഗ്രസിനെ ദുര്ബലപ്പെടുത്താനുള്ള ആര്.എസ്.എസിന്റെ അടിവ് നയം നടപ്പിലാക്കി; 2000 ബി.ജെ.പി വോട്ടുകള് സി.പി.എമ്മിന് കിട്ടി; തില്ലങ്കേരിയിലെ അണിയറയില് സംഭവിച്ചത്; ആശങ്കയോടെ യു.ഡി.എഫ്
കോണ്ഗ്രസ് മുക്ത ഭാരതം എന്നതാണ് ബി.ജെ.പി ലക്ഷ്യമിടുന്നത്. കേരളത്തിലും അത് സാധ്യമാകുമെന്നാണ് ആര്.എസ്.എസിന്റെ വിലയിരുത്തല്. അതിന്റെ ഭാഗമായി സി.പി.എമ്മിനെ സഹായിക്കുന്ന രാഷ്ട്രീയ തന്ത്രമാണ് ആര്.എസ്.എസ് തയ്യാറാക്കിയതെന്ന വാര്ത്തകള് പുറത്ത് വന്നിയിരുന്നു. അധികാരം ഇല്ലാതാകുമ്പോള് കോണ്ഗ്രസ് തനിയെ ഇല്ലാതാകുമെന്നും സി.പി.എം വീണ്ടും അധികാരത്തില് വന്നാന് അടുത്ത തവണ ജനവികാരം എതിരാകുമെന്നും, ആ ഒരു സാഹചര്യത്തില് ബി.ജെ.പിക്ക് അതിവേഗ മുന്നേറ്റം നടത്താമെന്നും ആര്.എസ്. എസ് കണക്കു കൂട്ടുന്നു. ഈ തന്ത്രത്തിന്റെ ഭാഗമാണ് കണ്ണൂരിനെ തില്ലങ്കേരി ഡിവിഷനില് കാണാന് സാധിച്ചതെന്നാണ് വിലയിരുത്തപ്പെടുന്നത്.
തദ്ദേശ സ്വയംഭരണ സ്ഥാപനങ്ങളിലേക്കുള്ള ഉപതിരഞ്ഞെടുപ്പുകള് പൂര്ത്തിയായപ്പോള് ശ്രദ്ധേയമായത് കണ്ണൂര് ജില്ലാ പഞ്ചായത്തിലേക്കുള്ള തില്ലങ്കേരി ഡിവിഷനിലെ ഫലമാണ്. യു.ഡി.എഫിന്റെ സിറ്റിങ് സീറ്റ് സി.പി.എം. പിടിച്ചെടുത്തു എന്നതിനപ്പുറം അവിടത്തെ വോട്ടുനിലയാണ് ഇപ്പോള് ചര്ച്ചാവിഷയം. കേരളത്തില് യു.ഡി.എഫിനെ ദുര്ബലമാക്കാനുള്ള ബി.ജെ.പി.യുടെ തന്ത്രം ഇവിടെ നടന്നിട്ടുണ്ടാകുമെന്നാണ് വിലയിരുത്തുന്നത്.
രണ്ടുപ്രബല മുന്നണികള്ക്കിടയില് എന്തെങ്കിലും നേട്ടം ഉണ്ടാക്കണമെങ്കില് കേരളത്തില് ആദ്യം യു.ഡി.എഫ്. തകരണമെന്നാണ് ബി.ജെ.പി കണക്കാക്കുന്നത്. അതിന്റെ പരീക്ഷണമാണ് തില്ലങ്കേരിയില് നടന്നതെന്നാണ് അണിയറ സംസാരം. ബി.ജെ.പി.യുടെ വോട്ടുനില ആ സംശയത്തിന് ബലം നല്കുന്നു. യു.ഡി.എഫ്. സ്ഥാനാര്ഥി കഴിഞ്ഞ തവണ 285 വോട്ടിന് ജയിച്ച തില്ലങ്കേരിയില് ഇത്തവണ സി.പി.എം. സ്ഥാനാര്ത്ഥി ബിനോയ് കുര്യന്റെ ഭൂരിപക്ഷം 6980 ആണ്.
നേരത്തെ 3333 വോട്ട് നേടിയിരുന്ന ബി.ജെ.പി.യുടെ വോട്ടാകട്ടെ ഇത്തവണ 1333 ആയി കുറഞ്ഞു. സി.പി.എമ്മും ബി.ജെ.പിയും തമ്മില് വര്ഷങ്ങളായി സംഘര്ഷവും അസ്വാരസ്യവും നിലനില്ക്കുന്ന സ്ഥലമാണ് തില്ലങ്കേരി. അവിടെയാണ് സി.പി.എം. ഇത്തവണ അട്ടിമറി വിജയം നേടിയതെന്നതും ബി.ജെ.പി രണ്ടായിരത്തോളം വോട്ടിന് പിന്നോട്ട് പോയതുമെന്നതാണ് ശ്രദ്ധേയം.
സ്ഥാനാര്ഥിയായിരുന്ന കേരള കോണ്ഗ്രസ് ജോസഫ് വിഭാഗത്തിലെ ജോര്ജ് ഇരുമ്പുകുഴിയുടെ നിര്യാണത്തെ തുടര്ന്നാണ് തില്ലങ്കേരിയില് തിരഞ്ഞെടുപ്പ് മാറ്റിവെച്ചത്. തുടര്ന്നാണ് വിദ്യാര്ഥിനിയായ ലിന്ഡ ജെയിംസ് മുള്ളന്കുഴി യു.ഡി.എഫ് സ്ഥാനാര്ത്ഥിയായി എത്തിയത്. കണ്ണൂര് ജില്ലാ പഞ്ചായത്തിന്റെ വൈസ് പ്രസിഡന്റ് സ്ഥാനാര്ഥികൂടിയായിരുന്ന ബിനോയ് കുര്യന് സി.പി.എമ്മിന്റെ യുവജന നേതാവാണ്. പോള് ചെയ്ത 32,580 വോട്ടില് ബിനോയ് കുര്യന് 18,687-ഉം ലിന്ഡ 11,707 വോട്ടും നേടി. കേരള കോണ്ഗ്രസ് മാണി വിഭാഗം ഇടതുമുന്നണിയിലേക്ക് പോയതും ഇടതുമുന്നണിയുടെ വോട്ട് കൂടാന് കാരണമായിട്ടുണ്ട്. എന്നാല് ബി.ജെ.പി യുടെ രണ്ടായിരത്തോളം വോട്ട് എങ്ങോട്ടുപോയി എന്നതാണ് എല്ലാവരും അന്വേഷിക്കുന്നത്.
യു.ഡി.എഫിന് സ്വാധീനമുള്ള തില്ലങ്കേരി പോലുള്ള പ്രദേശങ്ങളില് ഭാവിയില് മുന്നേറാന് യു.ഡി.എഫിന് ക്ഷീണം ഉണ്ടാക്കുക എന്ന ബി.ജെ.പിയുടെ രാഷ്ട്രീയ തന്ത്രമാണ് ഉത്തരമായി ചൂണ്ടിക്കാട്ടുന്നത്. ഇത് കൂടുതല് സ്ഥലങ്ങളില് പരീക്ഷിക്കപ്പെടുമോ എന്ന ആശങ്ക യു.ഡി.എഫിനുണ്ട്.
2026 ആവുമ്പോഴേക്കും യു.ഡി.എഫിന്റെ സാന്നിധ്യവും സ്വാധീനവും ഗണ്യമായി കുറച്ചുകൊണ്ടുവരിക എന്ന ബി.ജെ.പിയുടെ രാഷ്ട്രീയതന്ത്രത്തിന്റെ പരീക്ഷണമാണിതെന്നാണ് കരുതുന്നത്. അങ്ങനെ നിരാശരാകുന്ന യു.ഡി.എഫ് അണികളിലേക്ക് പടര്ന്നുകയറാന് കഴിയുമെന്ന് ബി.ജെ.പി. പ്രതീക്ഷിക്കുന്നു. ഇരുമുന്നണികളും ന്യൂനപക്ഷ പ്രീണനം നടത്തുന്നു എന്ന പ്രചാരണത്തിലൂടെ ഭൂരിപക്ഷ സമുദായത്തിന്റെ വോട്ടുകള് കൂടുതല് സമാഹരിക്കുകയെന്നതും ബി.ജെ.പിയുടെ രാഷ്ട്രീയനീക്കമാണ്.
https://www.facebook.com/Malayalivartha