യു.ഡി.എഫില് സീറ്റു വിഭജന ചര്ച്ചകള്ക്ക് തുടക്കം; രാഹുല് ഗാന്ധിയുമായി യു.ഡി.എഫ് നേതാക്കള് ചര്ച്ച നടത്തും; ഉമ്മന്ചാണ്ടിയും രമേശ് ചെന്നിത്തലയും പാണക്കാട്ടെത്തി; ഹൈദരലി ശിഹാബ് തങ്ങളുമായി ചര്ച്ച നടത്തി; അഞ്ച് സീറ്റ് അധികമായി വേണമെന്ന് ലീഗ് ആവശ്യം; എല്.ഡി.എഫ് യോഗത്തില് സീറ്റു വിഭജനം ചര്ച്ചയായില്ല
യുഡിഎഫിന്റെ സീറ്റ് വിഭജന ചര്ച്ചകള്ക്ക് ഇന്നു തുടക്കമാകുകയാണ്. ഇന്ന് കേരളത്തിലെത്തുന്ന രാഹുല് ഗാന്ധി കോണ്ഗ്രസ് - ലീഗ് നേതാക്കളുമായി കൂടിക്കാഴ്ച്ച നടത്തും. കരിപ്പൂര് വിമാനത്താവളത്തിലെത്തുന്ന രാഹുല് ഗാന്ധി അവിടെ വച്ചായിരിക്കും കേരളത്തിലെ നേതാക്കളുമായി ചര്ച്ച നടത്തുക. ഉമ്മന് ചാണ്ടി, രമേശ് ചെന്നിത്തല, മുല്ലപ്പള്ളി രാമചന്ദ്രന്, കെ സി വേണുഗോപാല്, മുസ്ലീം ലീഗ് നേതാക്കളായ പാണക്കാട് സാദിഖലി ശിഹാബ് തങ്ങള്, ഇ ടി മുഹമ്മദ് ബഷീര് എന്നിവര് രാഹുല് ഗാന്ധിയുമായി കൂടിക്കാഴ്ച്ച നടത്തും. പിന്നീട് വണ്ടൂര് ,നിലമ്പൂര് നിയോജക മണ്ഡലം ത്രിതല പഞ്ചായത്ത് തെരഞ്ഞെടുപ്പില് മത്സരിച്ച സ്ഥാനാര്ത്ഥികളുടെ സംഗമത്തിലും രാഹുല് ഗാന്ധി പങ്കെടുക്കും. വൈകിട്ട് അദ്ദേഹം വയനാട്ടിലേക്ക് പോകും.
രാഹുല് ഗാന്ധിയുമായി ചര്ച്ചകള് നടത്തുന്നതിന് മുന്നോടിയായി ഉമ്മന്ചാണ്ടിയും പ്രതിപക്ഷ നേതാവ് രമേശ് ചെന്നിത്തലയും പാണക്കാട്ടെത്തി. മുസ്ലിംലീഗ് സംസ്ഥാന അധ്യക്ഷന് ഹൈദരലി ശിഹാബ് തങ്ങളുമായി ചര്ച്ച നടത്തി. പി.കെ.കുഞ്ഞാലിക്കുട്ടി, കെ.പി.എ.മജീദ് തുടങ്ങിയ ലീഗിന്റെ മുതിര്ന്ന നേതാക്കളും ചര്ച്ചയില് പങ്കെടുത്തു. സീറ്റ് വിഭജനത്തില് തങ്ങളുടെ ആവശ്യം ഹൈദരലി തങ്ങള് കോണ്ഗ്രസ് നേതാക്കളെ ധരിപ്പിച്ചതായാണ് വിവരം. അഞ്ച് സീറ്റ് അധികമായി വേണമെന്ന് ലീഗ് ആവശ്യപ്പെട്ടതായാണ് റിപ്പോര്ട്ട്. സീറ്റ് വിഭജനം സംബന്ധിച്ച് അനൗപചാരിക ചര്ച്ചകളാണ് ഇപ്പോള് നടന്നുകൊണ്ടിരിക്കുന്നതെന്നും ഔപചാരിക ചര്ച്ച തിരുവനന്തപുരത്ത് വച്ചുണ്ടാകുമെന്നും പി.കെ.കുഞ്ഞാലിക്കുട്ടി പ്രതികരിച്ചു.
നിലവില് തദ്ദേശ തിരഞ്ഞെടുപ്പില് നേരിടേണ്ടിവന്ന കനത്ത തിരിച്ചടി വ്യക്തിയല്ല പ്രസ്ഥാനമാണ് വലുതെന്ന രാഷ്ടീയതന്ത്രത്തിലേക്ക് കോണ്ഗ്രസിനെ എത്തിച്ചിരിക്കുകയാണ്. സംസ്ഥാനത്ത് തിരഞ്ഞെടുപ്പു മുന്നില്കണ്ട് എ.ഐ.സി.സി.യുടെ നേതൃത്വത്തില് ഉമ്മന് ചാണ്ടി അദ്ധ്യക്ഷനായ തിരഞ്ഞെടുപ്പു സമിതിക്ക് രൂപം നല്കിയിരുന്നു. അപ്പോഴും മത്സരിക്കുന്നത് ആരൊക്കെയെന്ന കാര്യത്തില് തീരുമാനമായിട്ടില്ല. രാഹുല് ഗാന്ധി എത്തുന്നതോടെ ഇക്കാര്യത്തില് ഫലലപ്രദമായ തീരുമാനമുണ്ടാകുമെന്നാണ് വിലയിരുത്തല്.
അതെ സമയം എല്ഡിഎഫ് യോഗവും ഇന്ന് എകെജി സെന്ററില് ചേരുകയാണ്. പാലാ സീറ്റിനെ ചൊല്ലിയുള്ള തര്ക്കവും ആശയക്കുഴപ്പങ്ങളും തുടരുമ്പോള് മുന്നണി നിലപാട് എന്സിപി യോഗത്തില് ആവശ്യപ്പെടും. എന്സിപിക്കുളളിലും ഭിന്നത നിലനില്ക്കെ ടി പി പീതാംബരനും, എ കെ ശശീന്ദ്രനും യോഗത്തില് പങ്കെടുക്കുത്തു. എന്നാല് മാണി സി കാപ്പന് യോഗത്തില് നിന്നും വിട്ടു നിന്നും.
സീറ്റ് ചര്ച്ച അജണ്ടയില് ഉള്പ്പെടുത്താതെ എല്ഡിഎഫ് ജാഥ, പ്രകടനപത്രിക എന്നിവയില് വിഷയങ്ങള് മാത്രമാണ് സി.പി.എം യോഗത്തിന് ചര്ച്ചക്ക് വച്ചത്. ഇതോടെ പാലാ സീറ്റ് ചര്ച്ചയാക്കണെന്ന എന്.സി.പിയുടെ ആവശ്യം അംഗീകരിക്കപ്പെട്ടില്ല. സി.പി.ഐ എന്.സി.പിയുടെ ആവശ്യത്തെ പിന്തുണച്ചതുമില്ല. ഇക്കാര്യം എന്.സി.പി സംസ്ഥാന അധ്യക്ഷന് ടി.പി പിതാംബരന് മാധ്യമങ്ങളോട് വ്യക്തമാക്കി. പാര്ട്ടി ആശങ്കയില്ലെന്നും എന്.സി.പി ഇതെ നിലക്ക് തന്നെ തുടരുമെന്നും അദ്ദേഹം വ്യക്തമാക്കി.
https://www.facebook.com/Malayalivartha