ടൗട്ടേ ചുഴലിക്കാറ്റിന്റെ ഭീതി വിട്ട് ഒഴിയാതെ കേരളം. കേരളത്തിന്റെ തീരത്തിന് വളരെ അടുത്തുകൂടിയാണ് ടൗട്ടേ ചുഴലിക്കാറ്റായി മാറിയ ന്യൂനമര്‍ദം നിങ്ങുന്നത്. മണിക്കൂറില്‍ 130 കിലോമീറ്റര്‍ വേഗത ചുഴലിക്കാറ്റിനുണ്ട്. ഇത് സംസ്ഥാനത്ത് അതിതിവ്രമഴക്ക് കാരണമായിരിക്കുകയാണ്. കേരളത്തിന്റെ മലയോര പ്രദേശങ്ങളില്‍ കനത്ത മഴ നാശം വിതക്കുമ്പോള്‍ തീരദേശ മേഖലകളില്‍ കടല്‍ ആക്രമണം ശക്തമാകുകയാണ്. ഈ സാഹചര്യത്തില്‍ കേരളം ടൗട്ടേ ചുഴലിക്കാറ്റിനെ അതീവ ജാഗ്രതയോടെയാണ് നിരീക്ഷിക്കുന്നത്.

ഗൂജറാത്തിലേക്ക് ചുഴലിക്കാറ്റ് നീങ്ങുന്ന സാഹചര്യത്തില്‍ മഹാരാഷ്ട്ര, ഗോവ, മഹാരാഷ്ട്ര, ഗുജറാത്ത് എന്നിവിടങ്ങളിലും ജാഗ്രതാ നിര്‍ദേശം പുറപ്പെടുവിച്ചിട്ടുണ്ട്. ചുഴലിക്കാറ്റ് ഗുജറാത്ത് തീരം തൊടുമെന്നാണ് കാലവസ്ഥ കേന്ദ്രം കണക്കാക്കുന്നത്. വടക്ക്, വടക്ക് -പടിഞ്ഞാറ് ദിശയില്‍ സഞ്ചരിക്കുമെന്നും മെയ് പതിനെട്ടോടെ ഗുജറാത്ത് തീരത്തിനടുത്ത് എത്തുമെന്നുമാണ് പ്രതീക്ഷിക്കപ്പെടുന്നത്. ഗുജറാത്ത്, ദിയു തീരങ്ങള്‍ക്ക് ചുഴലിക്കാറ്റ് ജാഗ്രത മുന്നറിയിപ്പ് നല്‍കിയിട്ടുണ്ട്. അവിടെനിന്ന് രാജസ്ഥാനിലേക്കു കടക്കാന്‍ സാധ്യതയുണ്ട്.

ടൗട്ടേ ചുഴലിക്കാറ്റിന്റെ പശ്ചാത്തലത്തില്‍ കേരളത്തില്‍ വലിയ രീതിയില്‍ മഴ പെയ്തിരുന്നു. ഇത് പത്തനംതിട്ട ജില്ലയിലെ രണ്ടിടങ്ങളില്‍ ഗുരുതര പ്രളയസാധ്യത ഉണ്ടാക്കിരിക്കുകയാണെന്ന് കേന്ദ്ര ജല കമ്മീഷന്‍ അറിയിച്ചു. പത്തനംതിട്ടയില്‍ മണിമല, അച്ചന്‍കോവില്‍ നദികളിലാണ് പ്രളയസാധ്യയുണ്ടെന്ന് ജല കമ്മീഷന്‍ മുന്നറിയിപ്പ് നല്‍കിയത്. മണിമലയാര്‍ കല്ലൂപ്പാറ എന്ന സ്ഥലത്ത് അപകട നിലയ്ക്ക് മുകളിലാണ് ഒഴുകുന്നതെന്ന് ജല കമ്മീഷന്‍ വ്യക്തമാക്കി. 6.08 മീറ്റര്‍ ഉയരത്തിലാണ് വെള്ളം ഒഴുകികൊണ്ടിരിക്കുന്നത്. ഇത് അപകട നിലയ്ക്ക് 0.08 മീറ്റര്‍ ഉയരത്തിലാണെന്നാണ് ജല കമ്മീഷന്‍ അറിയിച്ചിരിക്കുന്നത്.

അച്ചന്‍കോവിലാറും അപകടനിലയ്ക്ക് മുകളില്‍ ഒഴുകികൊണ്ടിരിക്കുന്നു. തുമ്പമണ്‍ എന്ന പ്രദേശത്തുകൂടിയാണ് നദി അപകടനിലയ്ക്ക് മുകളിലൂടെ ഒഴുകുന്നത്. ശനിയാഴ്ച രാവിലെ എട്ട് മണി വരെയുള്ള കണക്കുകള്‍ പ്രകാരം 10.5 മീറ്റര്‍ ഉയരത്തിലാണ് നദി ഒഴുകുന്നത്. അപകടനിലയ്ക്ക് 0.50 മീറ്റര്‍ മുകളിലാണ് നദി ഒഴുകുന്നതെന്നും ജലകമ്മീഷന്‍ വ്യക്തമാക്കി.

അതേസമയം ഇടുക്കി ജില്ലയില്‍ കടത്ത മഴയില്‍ ജലനിരപ്പ് ഉയരുന്ന സാഹചര്യത്തില്‍ കല്ലാര്‍കുട്ടി, മലങ്കര അണക്കെട്ടുകള്‍ തുറന്നു. കല്ലാര്‍കുട്ടി അണക്കെട്ടിന്റെ രണ്ട് ഷട്ടറുകള്‍ 2 അടി വീതമാണ് ഉയര്‍ത്തിയത്. ഇടുക്കി മലങ്കര ഡാമിന്റെ ഷട്ടര്‍ രാവിലെ തുറന്നിരുന്നു. മൂന്നു ഷട്ടറുകളിലൂടെ 63.429 ക്യുബിക് മീറ്റര്‍ വെള്ളം ഒഴുക്കിവിടാനാണ് തീരുമാനം.

കനത്ത മഴയിലും കാറ്റിലും മരം വീണ് ഹൈറേഞ്ച് മേഖലയില്‍ വ്യാപക നാശ നഷ്ടമുണ്ടായി. നിരവധി വീടുകളുടെ മേല്‍ക്കൂര തകര്‍ന്നു. എന്‍ഡിആര്‍എഫ് സംഘത്തിന്റെ നേതൃത്വത്തില്‍ മരങ്ങള്‍ മുറിച്ചു മാറ്റാന്‍ ശ്രമം തുടരുകയാണ്. ഉടുമ്പന്‍ചോലയില്‍ ദുരിതാശ്വാസ ക്യാമ്പ് തുറന്നു. നാലു പേരെ ക്യാമ്പിലേക്ക് മാറ്റിപ്പാര്‍പ്പിച്ചു. ചീന്തലാറ്റില്‍ വീടിന് മുകളില്‍ മരകൊമ്പ് ഒടിഞ്ഞു വീണ് മൂന്നു പേര്‍ക്ക് പരിക്കേറ്റു. രാമക്കല്‍ മേടില്‍ ഒരു വീട് തകര്‍ന്നു.

സംസ്ഥാനത്തെ തീരത്തുടനീളം കടലാക്രമണവും തുടരുകയാണ്. കേരളം, ലക്ഷദ്വീപ് കപ്പല്‍ ഗതാഗതം പൂര്‍ണമായി നിര്‍ത്തിവച്ചു. കണ്ണൂര്‍ തലായിയില്‍ മീന്‍പിടിത്തത്തിനു പോയ 3 പേരെ കാണാതായി, എറണാകുളം ജില്ലയില്‍ മഴക്കെടുതിയിലും കടലാക്രമണത്തിലും രണ്ടുപേര്‍ മരിച്ചു. പെരിയാറില്‍ ഒരാളെ കാണാതായി. വിവിധ തീര ജില്ലകളില്‍ കടലാക്രമണത്തില്‍ നൂറിലേറെ വീടുകള്‍ തകര്‍ന്നു. ഒട്ടേറെ കുടുംബങ്ങളെ മാറ്റിപ്പാര്‍പ്പിച്ചു.

ഇന്ന് മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് എന്നി ജില്ലകളിലാണ് റെഡ് അലര്‍ട്ട്. കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശ്ശൂര്‍ ജില്ലകളില്‍ ഓറഞ്ച് അലര്‍ട്ടും തിരുവനന്തപുരം, പാലക്കാട് യെല്ലോ അലര്‍ട്ടും പ്രഖ്യാപിച്ചു.