ഗൂഗിൾ മാപ്പ് നോക്കി വാഹനമോടിച്ച് മിക്ക ഡ്രൈവർമാരും പണിമേ‌ടിച്ചിട്ടുണ്ടാകും. യാത്ര ആരംഭിച്ചത് മുതൽ ഗൂഗിൾ മാപ്പ് നോക്കി സഞ്ചരിച്ച ടൂറിസ്റ്റ് സംഘം കാറോടിച്ചെത്തിയത് നേരെ തോട്ടിലേക്കാണ്. സമയോചിതമായി നാട്ടുകാർ ഇടപെട്ടതിനാൽ ഒഴിവായത് വൻ അപകടമാണ്.

ഇന്നലെ ഉച്ചയ്ക്ക് 12 മണിയോടെ കോട്ടയം കുറുപ്പന്തറ കടവിലാണ് സംഭവം നടന്നത്.കർണാടക സ്വദേശികളായ കുടുംബമാണ് ഇന്നലെ അപകടത്തിൽപെട്ടത്. മൂന്നാറിൽ നിന്നും ആലപ്പുഴയിലേക്ക് പോകും വഴിയായിരുന്നു അപകടം.

കുറുപ്പന്തറ കടവ് ഭാഗത്തെത്തിയപ്പോൾ നേരേ മുന്നോട്ട് പോകാനായിരുന്നു ഗൂഗിൾ മാപ്പ് വഴി ഫോണിലൂടെ ലഭിച്ച നിർദേശം. ഇതോടെ ഇവിടുത്തെ കൊടുംവളവ് നോക്കാതെ ഡ്രൈവർ കാർ മുന്നോട്ട് ഓടിച്ചു. ഇത് നോക്കി നിൽക്കുകയായിരുന്ന നാട്ടുകാർ വിളിച്ചു കൂവിയപ്പോഴേക്കും കാർ സമീപത്തെ തോട്ടിലേക്ക് ചാടിയിരുന്നു.

ഓടികൂടിയ നാട്ടുകാർ കാറിലുണ്ടായിരുന്ന കുട്ടികൾ ഉൾപെടെയുള്ള കുടുംബാംഗങ്ങളെ രക്ഷപെടുത്തി.മഴ ശക്തമായതിനാൽ തോട്ടിൽ നല്ല വെള്ളമുള്ള സമയമായിരുന്നു. എന്നാൽ വെള്ളത്തിൽ മുങ്ങിയ ഫോർച്യൂണർ കാർ തള്ളി കരയ്ക്കു കയറ്റാൻ നാട്ടുകാർ ശ്രമിച്ചെങ്കിലും വിജയിച്ചില്ല.

പിന്നീട് ലോറി ഉപയോഗിച്ചു കെട്ടി വലിച്ചാണ് കാർ തോട്ടിൽ നിന്നും കരയ്‌ക്കെത്തിച്ചത്. മറ്റു തകരാറൊന്നുമില്ലാതിരുന്നതിനാൽ ഇവർ ഇതേ കാറിൽ തന്നെ യാത്ര തുടരുകയായിരുന്നു.