ഇസ്രായേൽ സൈന്യത്തിന്റെ ടാങ്ക് ഹമാസ് തകർക്കുന്നതിന്റെ ദൃശ്യങ്ങളാണ് എന്ന് അവകാശപ്പെട്ട് ഒരു ക്ലിപ്പ് ഇപ്പോൾ സമൂഹമാധ്യമങ്ങളിൽ പ്രചാരത്തിലുണ്ട്. ഒരു വ്യക്തി ആർമി ടാങ്കിലേക്ക് സ്‌ഫോടനവസ്തു എറിയുന്നതും തുടർന്ന് ടാങ്കിന് തീ പിടിക്കുന്നതുമാണ് വീഡിയോയിലുള്ളത്.

പ്രചാരത്തിലുള്ള വീഡിയോയുടെ കീ ഫ്രെയ്‌മുകൾ ഗൂഗിളിന്റ സഹായത്തോടെ റിവേഴ്‌സ് ഇമേജ് തിരച്ചിൽ നടത്തിയപ്പോൾ ഇതേ വീഡിയോ Military.com എന്ന വെബ്‌സൈറ്റിൽ 2015 ജൂലൈയിൽ അപ്‌ലോഡ് ചെയ്തിട്ടുള്ളതായി കണ്ടെത്താൻ സാധിച്ചു. ഈ വെബ്സൈറ്റ് പ്രകാരം സിറിയയിൽ നടന്ന ഒരു വെടിവെയ്പ്പിൽ നിന്നുള്ളതാണ് വീഡിയോ. ടി-72 എന്ന ടാങ്കിന്റെ ബാരലിലേയ്ക്ക് ഒരു വ്യക്തി ഗ്രനേഡ് എറിയുകയായിരുന്നു.

2016ൽ ഇതേ വീഡിയോ ഡെയിലി മെയിൽ, എക്സ്പ്രസ്സ് എന്നീ അന്താരാഷ്ട്ര മാധ്യമ സ്ഥാപനങ്ങളും വാർത്തയാക്കിയിരുന്നു. ഡെയിലി മെയിൽ റിപ്പോർട്ട് പ്രകാരം വീഡിയോ 2013 ലാണ് ആദ്യമായി ഇൻറർനെറ്റിൽ പ്രത്യക്ഷപ്പെട്ടത്. സ്വതന്ത്ര സിറിയൻ ആർമി എന്ന വിമത സംഘടനയിൽപെട്ട വ്യക്തിയാണ് പട്ടാള ടാങ്ക് ഗ്രനേഡ് ഉപയോഗിച്ച് ആക്രമിച്ചതെന്നും റിപ്പോർട്ട് പറയുന്നു. ഈ സമയം റാങ്കിലുണ്ടായ പട്ടാള ഉദ്യോഗസ്ഥൻ ഓടി രക്ഷപ്പെട്ടു.

“സ്വതന്ത്ര സിറിയൻ ആർമി” 2011 മുതൽ സിറിയയിലെ ബാഷർ അൽ-അസ്സാദിന്റെ സർക്കാർ ഭരണത്തെ അട്ടിമറിക്കാൻ ശ്രമിക്കുന്ന വിമത സംഘടനയാണ്.

പ്രചാരത്തിലുള്ള വീഡിയോ സിറിയയിൽ നിന്നുള്ളതാണെന്നും ഇതിനു ഇപ്പോൾ നടക്കുന്ന ഇസ്രായേൽ ഹമാസ് സംഘർഷവുമായി ബന്ധമില്ല എന്നും ഇതിനാൽ വ്യക്തമാണ്.