ബ്ലാക്ക്‌മാന്‍ കൂടുതല്‍ ജില്ലകളിലേക്ക്‌ വ്യാപിക്കുന്നു, പിടിക്കാന്‍ പോലീസും രംഗത്ത്‌
അതേസമയം തിരുവനന്തപുരത്തെ പോത്തന്‍കോട്ടും, നെടുമങ്ങാട്‌ മഞ്ചയിലും ബ്ലാക്ക്‌മാന്‍ എന്നപേരില്‍ ചിലരെ പിടികൂടിയത്‌ ഭീതി പടര്‍ത്തി. എന്നാല്‍ അവരൊക്കെ സാമൂഹിക വിരുദ്ധര്‍ മാത്രമാണെന്നാണ്‌ പോലീസിന്റെ നിഗമനം. ഇതിനിടെ ബ്ലാക്ക്‌മാന്റെ ആക്രമണത്തില്‍ ഒരു പെണ്‍കുട്ടിക്ക്‌ പരിക്കേറ്റ്‌ ആശുപത്രിയില്‍ ചികിത്സ തേടിയിരുന്നു. എന്നാല്‍ സുഹൃത്ത്‌ മാന്തിയതാണ്‌ ബ്ലാക്ക്‌മാന്റെ ആക്രമണമായി ചിത്രീകരിച്ചതെന്ന്‌ പോലീസ്‌ പറഞ്ഞു.
അതേസമയം നാട്ടില്‍ ബ്ലാക്ക്‌മാന്‍ കഥ പ്രചരിക്കുകയാണ്‌... നാട്ടില്‍ ബ്ലാക്ക്‌ മാന്‍ ഇറങ്ങിയിട്ടുണ്ട്‌ സൂക്ഷിക്കുക. ഓരോരുത്തരും അവരുടെ ബന്ധുക്കളോടും സുഹൃത്തുക്കളോടും പരിചയക്കാരോടുമൊക്കെ വാര്‍ത്ത കൈമാറി. വാര്‍ത്ത കാട്ടുതീപോലെ പടര്‍ന്നു. പ്രധാന പത്രങ്ങളിലും ചാനലുകളിലുമൊക്കെ വാര്‍ത്ത വന്നു.
തിരുവനന്തപുരം ജില്ലയിലെ കിളിമാനൂര്‍, വെഞ്ഞാറമൂട്‌, വെമ്പായം, വട്ടപ്പാറ, നെടുമങ്ങാട്‌, പേരൂര്‍ക്കട തുടങ്ങിയ സ്ഥലങ്ങളിലെ ജനങ്ങള്‍ക്ക്‌ സ്വസ്ഥമായുറങ്ങാന്‍ കഴിയുന്നില്ല. എപ്പോള്‍ വേണമെങ്കിലും ബ്ലാക്ക്‌മാന്‍ വരുമെന്നുള്ള പേടിയിലാണ്‌. ആരാണീ ബ്ലാക്ക്‌ മാന്‍. മായാകഥകളിലെ അത്ഭുതമനുഷ്യനാണോ?? ആര്‍ക്കുമറിയില്ല. പക്ഷേ അനുഭവസ്ഥര്‍ ധാരാളം.
രാത്രിയിലാണ്‌ ബ്ലാക്ക്‌മാന്റെ സഞ്ചാരം. മോഷണമല്ല അക്രമമാണ്‌ ഇവരുടെ പ്രധാന ലക്ഷ്യം. സ്‌ത്രീകളെ ആക്രമിക്കുക എന്നതാണ്‌ പ്രധാന വിനോദമായി പറയുന്നത്‌. സ്‌ത്രീകളുടെ നെഞ്ചിലും മുഖത്തുമൊക്കെ കടിക്കുകയും അള്ളുകയും ചെയ്യുമെന്നാണ്‌ ഒരുകൂട്ടര്‍ പറയുന്നത്‌. അതോടെ പെണ്‍കുട്ടികളും സ്‌ത്രീകളും വേവലാതിയായി. സ്‌കൂളുകളില്‍പ്പോലും ഇത്‌ നിത്യ സംസ്സാര വിഷയമാണിത്‌.
ബ്ലാക്ക്‌മാനെ കണ്ടവരും അവന്റെ അക്രമത്തിനിരയായവരും നിരവധിയാളുകളുണ്ട്‌. രാത്രിയില്‍ കതകില്‍ വന്ന് തുടര്‍ച്ചയായി മുട്ടുക, കോളിംഗ്‌ ബെല്ലടിക്കുക, പൈപ്പില്‍ വെള്ളം തുറന്നു വിടുക അങ്ങനെപോകുന്നു കലാപരിപാടികള്‍. കതക്‌ തുറക്കുമ്പോഴോ? മുഖത്തള്ളുക, തലക്കടിക്കുക, മുറിക്കകത്ത്‌ കയറി ഒളിക്കുക തുടങ്ങിയ കലാപ്രകടനവുമുണ്ട്‌. ദേഹം മുഴുവനും കരി പുരട്ടിയിട്ടുണ്ടെന്നാണ്‌ കണ്ടവര്‍ പറയുന്നത്‌. ഒരു വിട്ടമ്മയുടെ മുഖത്ത്‌ അള്ളിയിരുന്നു. അവിടെ കരിയോയിലിന്റെ അവശിഷ്‌ടം നാട്ടുകാര്‍ കണ്ടെത്തിയിരുന്നു. ഇവരെ പിടിക്കാന്‍ പ്രയാസമാണെന്നാണ്‌ പറയുന്നത്‌. കാലില്‍ സ്‌പ്രിംഗ്‌ ഘടിപ്പിച്ച ഷൂ ധരിച്ചിട്ടുണ്ടാവും. പിടിക്കാന്‍ വരുമ്പോള്‍ സ്‌പ്രിംഗ്‌ ആക്ഷനാല്‍ വഴുതിക്കളയും.
ഒരേസമയം പല വീടുകളില്‍ ഇതുപോലുള്ള അക്രമം ഉണ്ടാവാറുണ്ടെന്നാണ്‌ പറയുന്നത്‌. ഒരു സംഘടിത ശക്തി തന്നെ ഇതിന്‌ പിന്നിലുണ്ട്‌. ഇതിനിടയ്‌ക്ക്‌ ഒന്നുരണ്ട്‌ ബ്ലാക്ക്‌ മാന്‍ മാരെ നാട്ടുകാര്‍ പിടിച്ച്‌ കൈകാര്യം ചെയ്‌തിരുന്നു. പിന്നേയും ബ്ലാക്ക്‌മാന്‍മാര്‍ പെരുകുന്നു.
രാത്രിയാകുമ്പോള്‍ എല്ലാവര്‍ക്കും പേടിയാണ്‌. ഉറക്കത്തില്‍ ഒന്നുമറിയില്ല. കള്ളന്മാരാണ്‌ ഇതിന്റെ പിന്നിലെന്ന്‌ എല്ലാപേര്‍ക്കുമറിയാമെങ്കിലും ഒരു അമാനുഷിക ശക്തി ഉണ്ടന്ന്‌ എല്ലാവരും പറഞ്ഞു പരത്തുന്നു. അത്‌ തന്നെയാണ്‌ ഉറക്കം നഷ്‌ടപ്പെടാന്‍ കാരണം. പുരുഷന്മാരില്ലാത്ത വീടുകളിലെ സ്‌ത്രീകളും കുട്ടികളും തീ തിന്നാണ്‌ കഴിയുന്നത്‌. അയല്‍ക്കൂട്ടത്തിലും, റെസിഡന്‍സ്‌ അസോസിയേഷനിലുമൊക്കെ ഇത്‌ ചര്‍ച്ചയായി. ഇവിടെയുള്ള ആള്‍ക്കാര്‍ വല്ലാത്ത മാനസിക അവസ്ഥയിലാണ്‌. ഈ ആധുനികകാലത്തും അമാനുഷിക ശക്തിയോ.
ഇത്രയൊക്കെയായിട്ടും പോലീസോ അധികാരികളോ ഇടപെടാത്തതാണ്‌ ജനങ്ങളെ വലയ്‌ക്കുന്നത്‌. ഒന്നുരണ്ടാള്‍ക്കാരെ പിടികൂടി പോലീസിനെ ഏല്‍പ്പിച്ചിട്ടും അത്‌ നിസാരമായിക്കണ്ട്‌ അവരെ വിട്ടയച്ചത്‌ ജനങ്ങളെ നിരാശപ്പെടുത്തി. പലസ്ഥലങ്ങളിലും ജനങ്ങല്‍ കാവലിലാണ്‌, ബ്ലാക്ക്‌മാനെ തപ്പി...
https://www.facebook.com/Malayalivartha
