ഏഴു വിക്കറ്റും സെഞ്ചുറിയുമായി രഞ്ജിയില് ജലജ് സക്സേനയുടെ മിന്നും പ്രകടനം
ജലജ് സക്സേനയുടെ ഓള് റൗണ്ട് മികവിന് മുന്നില് ആന്ധ്ര തരിപ്പണമായി. രഞ്ജി ട്രോഫി ക്രിക്കറ്റില് ഒന്നാം ഇന്നിങ്സിലെ തകര്പ്പന് സെഞ്ചുറിക്കു (133) പിന്നാലെ രണ്ടാം ഇന്നിങ്സില് 7 വിക്കറ്റുകള് കൂടി വീഴ്ത്തി ജലജ്. ഇന്ന് അത്ഭുതങ്ങളൊന്നും സംഭവിച്ചില്ലെങ്കില് കേരളം രഞ്ജി സീസണിലെ ആദ്യജയം നേടും. സ്കോര്: ആന്ധ്ര 254, 8 വിക്കറ്റിന് 102. കേരളം 328. രണ്ടു വിക്കറ്റു ശേഷിക്കെ ആന്ധ്രയ്ക്കു കേരളത്തെക്കാള് 28 റണ്സിന്റെ ലീഡ് മാത്രം.
ഒരു വിക്കറ്റിന് 227 റണ്സ് എന്ന നിലയില് വമ്പന് ലീഡ് ലക്ഷ്യമിട്ട് ഇന്നലെ ബാറ്റിങ്ങിനിറങ്ങിയ കേരളം കണക്കുകൂട്ടിയതു പോലെയായിരുന്നില്ല കാര്യങ്ങള്. കളി തുടങ്ങി അധികം വൈകാതെ ജലജ് 133 റണ്സിനും റോഹന് പ്രേം 47 റണ്സിനും പുറത്തായി. കഴിഞ്ഞ കളിയില് സെഞ്ചുറി നേടിയ ക്യാപ്റ്റന് സച്ചിന് ബേബിയും (21) വി.എ.ജഗദീഷും (20) പെട്ടെന്നു പുറത്തായതോടെ കേരളം 328 റണ്സിലൊതുങ്ങി. 74 റണ്സിന്റെ ഒന്നാം ഇന്നിങ്സ് ലീഡ്.
സ്പിന്നിന് അനുകൂലമായി മാറിയ പിച്ചില് രണ്ടാം ഇന്നിങ്സിന്റെ തുടക്കം മുതല് ജലജ് അപകടം വിതച്ചു. 26 റണ്സ് എടുക്കുന്നതിനിടെ ആന്ധ്രയുടെ രണ്ട് ഓപ്പണര്മാരെയും മടക്കിയ സക്സേന ആന്ധ്രയെ പിടിച്ചുനില്ക്കാന് അനുവദിച്ചില്ല. 19 ഓവറില് 44 റണ്സ് വഴങ്ങിയാണ് സക്സേന ഏഴു വിക്കറ്റുകള് നേടിയത്.
മധ്യപ്രദേശുകാരന് ജലജ് സക്സേന ഒരിക്കല്ക്കൂടി കേരളത്തിന്റെ ഭാഗ്യതാരമായി. കഴിഞ്ഞ സീസണില് കേരളത്തെ ക്വാര്ട്ടറിലെത്തിക്കുന്നതില് മുഖ്യപങ്കുവഹിച്ചതു ജലജ് സക്സേനയുടെ ഓള് റൗണ്ട് മികവാണ്. 44 വിക്കറ്റുമായി ബോളര്മാരുടെ പട്ടികയില് രാജ്യത്ത് ഒന്നാമതെത്തിയ ജലജ് 522 റണ്സും നേടി. മികച്ച ഓള്റൗണ്ടര്ക്കുള്ള ബിസിസിഐ പുരസ്കാരവും നേടി. നാലു വര്ഷത്തിനിടെ മൂന്നാമത്തെ ഓള് റൗണ്ടര് പുരസ്കാരമായിരുന്നു ഇത്.
സ്ഥിരമായി മികച്ച പ്രകടനം നടത്തിയിട്ടും ദേശീയ ടീമില് ഇടം നേടാന് ജലജിനു കഴിഞ്ഞിട്ടില്ല. 31 വയസ് അധികമല്ലെന്നും ഇനിയും സമയമുണ്ടെന്നുമാണ് ജലജിന്റെ ആത്മവിശ്വാസം.
https://www.facebook.com/Malayalivartha