രാജസ്ഥാന്‍ റോയല്‍സിന്റെ വിക്കറ്റ് കീപ്പര്‍ ബാറ്റ്‌സ്മാനമായ സജ്ജു സാംസണ്‍ ഉജ്ജ്വല ബാറ്റിങ്ങിലൂടെ ശ്രദ്ധാകേന്ദ്രമായി. ഐ.പി.എല്ലില്‍ അര്‍ധശതകം നേടുന്ന ഏറ്റവും പ്രായകുറഞ്ഞ വ്യക്തി കൂടിയായി മാറി 18 കാരനായ സഞ്ജു. 41 പന്തില്‍ സഞ്ജു നേടിയ 63 റണ്‍സാണ് റോയല്‍സിന്റെ വിജയത്തില്‍ നിര്‍ണായകമായത്. ഏഴ് ബൗണ്ടറിയും രണ്ട് സിക്‌സറുകളും അടങ്ങുന്നതായിരുന്നു സഞ്ജുവിന്റെ ഇന്നിങ്‌സ്. മാന്‍ ഓഫ് ദി മാച്ച് പുരസ്‌കാരവും സഞ്ജുവിനായിരുന്നു. 

കിംഗ്‌സ് ഇലവന്‍ പഞ്ചാബിനെതിരെയാണ് ഐ.പി.എല്ലില്‍ സഞ്ജുവിന് ആദ്യമായി കളിക്കാന്‍ അവസരം കിട്ടിയത്. 23 പന്തില്‍ 27 റണ്‍സെടുത്ത് പുറത്താകാതെ നിന്ന് റോയല്‍സിനെ അന്ന് വിജയത്തിലെത്തിച്ചെങ്കിലും അടുത്ത രണ്ട് കളികളിലും സഞ്ജുവിന് അവസരം കിട്ടിയില്ല. ബാംഗ്ലൂരിനെതിരെ വീണ്ടും ടീമില്‍ ഇടം കിട്ടിയപ്പോള്‍ സഞ്ജു അത് ശരിക്കും മുതലാക്കി. ആദ്യം ബാറ്റ് ചെയ്ത ബാംഗ്ലൂര്‍ ആറ് വിക്കറ്റ് നഷ്ടത്തില്‍ 171 റണ്‍സ് കുറിച്ചു. ഗെയില്‍(34), കോലി(32) എന്നിവരാണ് ടോപ് സ്‌കോറര്‍മാര്‍. തകര്‍ത്തടിച്ച് തുടങ്ങിയ ഗെയിലിനെ (16 പന്തില്‍ 34) വാട്‌സന്റെ പന്തില്‍ സഞ്ജു പിടിച്ചു പുറത്താക്കുകയായിരുന്നു. രാംപോളിനെയും വിക്കറ്റിന് പിന്നില്‍ പിടികൂടിയ സഞ്ജു ഹെന്‍ റിക്കസിനെ റണ്ണൗട്ടാക്കുന്നതിലും തിളങ്ങി. 
മറുപടി ബാറ്റിങ്ങിനിറങ്ങിയ റോയല്‍സ് റഹാനയ്‌ക്കൊപ്പം വാട്‌സണ് പകരം ദ്രാവിഡാണ് ഓപ്പണ്‍ ചെയ്തത്. രഹാന പെട്ടെന്ന് പുറത്തായപ്പോള്‍ ടീം സമ്മര്‍ദത്തിലായി. മൂന്നാമനായി ക്രീസിലെത്തിയത് സഞ്ജു സാംസണ്‍. ആദ്യ രണ്ട് പന്തുകളും അതിര്‍ത്തി. മൂന്നാം വിക്കറ്റില്‍ വാട്‌സണൊപ്പം(41) അടിച്ചുകൂട്ടിയ 68 റണ്‍സാണ് ടീമിന് അടിത്തറപാകിയത്. ഒരു പന്ത് ശേഷിക്കെയായിരുന്നു റോയല്‍സിന്റെ വിജയം.