പാകിസ്ഥാനെതിരെ പകല്‍-രാത്രി ടെസ്റ്റില്‍ ഓസ്‌ട്രേലിയക്ക് റെക്കോര്‍ഡ് സ്‌കോര്‍. വാര്‍ണര്‍ 418 പന്തില്‍ 335 റണ്‍സുമായി പുറത്താകാതെ നിന്നു. 589/3 എന്ന കൂറ്റന്‍ സ്‌കോറിലാണ് ഓസീസ് ഡിക്ലയര്‍ ചെയ്തത്. പകല്‍-രാത്രി ടെസ്റ്റുകളിലെ ഉയര്‍ന്ന ടീം ടോട്ടലാണിത്. ടെസ്റ്റ് കരിയറിലെ ആദ്യ ട്രിപ്പിള്‍ അടക്കം ഒട്ടേറെ നേട്ടങ്ങള്‍ വാര്‍ണര്‍ കൊയ്തപ്പോള്‍ ഓസീസ് അഡ്‌ലെയ്‌ഡില്‍ റണ്‍മല പണിഞ്ഞു.

പിങ്ക് പന്തില്‍ ട്രിപ്പിളടിച്ച് മുന്നേറുകയായിരുന്നു ഡേവിഡ് വാര്‍ണര്‍. പാകിസ്ഥാന്‍ ബൗളര്‍മാരെ തലങ്ങുംവിലങ്ങും പായിച്ച താരം 260 പന്തില്‍ 200ഉം 389 പന്തില്‍ 300ഉം തികക്കുകയുണ്ടായി. 39 ബൗണ്ടറികളും ഒരു സിക്‌സും ഇതിനിടെ സംഭവിച്ചു. അഡ്‌ലെയ്‌ഡ് സ്റ്റേഡിയത്തില്‍ പിറക്കുന്ന ആദ്യ ട്രിപ്പിള്‍ സെഞ്ചുറിയാണിത്. ട്രിപ്പിള്‍ ശതകം നേടുന്ന ഏഴാം ഓസീസ് താരം, മാര്‍ക് ടെയ്‌ലര്‍ക്ക് ശേഷം പാകിസ്ഥാനെതിരെ 300 തികയ്‌ക്കുന്ന താരം എന്നീ നേട്ടങ്ങളിലും വാര്‍ണര്‍ എത്തി.