വാശി പിടിക്കേണ്ട, ഗെയിലിന് വിക്കറ്റില്ല... പറഞ്ഞത് മനസ്സിലായില്ലേ എന്ന് അംപയര്!
ക്രിസ് ഗെയ്ല് ഗാലറിയുടെ ഇഷ്ടതാരമാണ്. പടുകൂറ്റന് സിക്സറുകളാലും ഡാന്സ് കൊണ്ടും കളിക്കളത്തിലെ തമാശകള് കൊണ്ടുമൊക്കെ ആരാധകര്ക്ക് വിരുന്നൊരുക്കാന് എപ്പോഴും മുന്നിലുണ്ടാവും ഗെയ്ല്.
ദക്ഷിണാഫ്രിക്കയിലെ ആഭ്യന്തര ട്വന്റി20 ടൂര്ണമെന്റായ എംസാന്സി സൂപ്പര് ലീഗിലെ ഗെയിലിന്റെ 'അഭിനയമാണ്' സമൂഹമാധ്യമങ്ങളില് ഇപ്പോള് വൈറലാകുന്നത്. ജോസി സ്റ്റാര്സും പാര് റോക്സും തമ്മില് നടന്ന മത്സരത്തിനിടയിലായിരുന്നു ഗെയിലിന്റെ ചിരിമരുന്ന്.
ഗെയില് ജോസി സ്റ്റാര്സ് ടീമംഗമാണ്. ആദ്യം ബാറ്റ് ചെയ്ത ഗെയിലിന്റെ ടീമിനു വേണ്ടി താരത്തിന് ഒരു റണ്സേ നേടാനായുള്ളൂ. പിന്നീട് ബൗള് ചെയ്യാനെത്തിയപ്പോള് ഗെയ്ലിന്റെ അവസാന പന്ത് പാര് റോക്സ് താരം ഹെന്റി ഡേവിഡ്സിന്റെ പാഡിലിടിച്ചതോടെ ഗെയ്ല് എല്ബിക്കായി അപ്പീല് ചെയ്തു.
ദീര്ഘനേരം അപ്പീല് ചെയ്തെങ്കിലും അമ്പയര്ക്ക് കുലുക്കമില്ലെന്ന് കണ്ട ഗെയ്ല്, ഒടുവില് കൊച്ചുകുട്ടികള് കരഞ്ഞു നിര്ബന്ധം പിടിച്ച് ചോദിച്ചു വാങ്ങുന്നതിന് സമാനമായ മുഖഭാവത്തോടെ അപ്പീല് ചെയ്യുകയായിരുന്നു. ' ഓ... മാന്' എന്നു പറഞ്ഞുകൊണ്ട് ഗെയ്ല് തലകുമ്പിട്ട് നിരാശ പ്രകടിപ്പിക്കുന്നത് കണ്ടാല്, ഔട്ടാണെന്ന് കൃത്യമായി മനസ്സിലാവുന്ന ഈ ബോളിലും നോട്ട് ഔട്ട് വിധിക്കുകയാണോ എന്ന് ചോദിക്കും പോലെയായിരുന്നു. അത് കണ്ട അമ്പയറുടെ മുഖത്തും ഇത് അത്ര വലിയ സംഭവമാക്കാനുണ്ടോ എന്ന ഒരു ചോദ്യഭാവം ഉയര്ന്നു. എന്നാല് പെട്ടെന്ന് തന്നെ അംപയര്ക്ക് അത് ഗെയ്ലിന്റെ ഒരു തമാശ ആണെന്ന് മനസ്സിലായി. അതോടെ അമ്പയര് ഗെയ്ലിനോടൊപ്പം ചേര്ന്ന് പൊട്ടിച്ചിരിച്ചു, അതോടെ ആ നിമിഷങ്ങള്ക്ക് ലാഘവം കൈവന്നു.
മത്സരത്തില് ഈ ഒരു ഓവര് മാത്രമേ ഗെയ്ല് എറിഞ്ഞുള്ളൂ. ഗെയ്ലിന്റെ ടീമായ ജോസി സ്റ്റാര്സ് മത്സരം ജയിക്കുകയും ചെയ്തു. കളിക്കളത്തില് ക്രിക്കറ്റ് ഉഷാറാക്കുന്ന കാര്യത്തില് ഗെയിലിനെ പോലെ മുന്പന്തിയിലാണ് ബ്രാവോയും കീറണ് പൊള്ളാര്ഡും. എന്തായാലും ഗെയിലിന്റെ പുതിയ ഭാവം ആഘോഷമാക്കുകയാണ് ആരാധകര്.
https://www.facebook.com/Malayalivartha
