മുന്‍ കേരള രഞ്ജി താരം എം. സുരേഷ് കുമാറി( 47)നെ ആലപ്പുഴ പഴവീട് ഹൗസിംഗ് കോളനി വാര്‍ഡില്‍ ഗൗരിശങ്കരത്തിലെ വീട്ടില്‍ തൂങ്ങി മരിച്ച നിലയില്‍ കണ്ടെത്തി. 

കേരളത്തിനായി ഒട്ടേറെ മത്സരങ്ങളില്‍ മികച്ച പ്രകടനം നടത്തിയ താരമാണ് 'ഉമ്രി' എന്ന് വിളിപ്പേരുള്ള സുരേഷ് കുമാര്‍. മികച്ച ഓഫ് സ്പിന്നര്‍ എന്ന് പേരെടുത്ത സുരേഷ് കുമാര്‍ റെയില്‍വേ ഉദ്യോഗസ്ഥനായിരുന്നു.

രാഹുല്‍ ദ്രാവിഡിന്റെ നേതൃത്വത്തില്‍ 1990-ല്‍ ഇറങ്ങിയ ഇന്ത്യന്‍ അണ്ടര്‍-19 ടീമില്‍ അംഗമായിരുന്നു. മുന്‍ ന്യൂസീലന്‍ഡ് ക്യാപ്റ്റന്‍ സ്റ്റീഫന്‍ ഫ്ളെമിങ്ങും ഡിയോണ്‍ നാഷും ഉള്‍പ്പെട്ട കിവീസ് യുവനിരയ്ക്കെതിരേ യൂത്ത് ടെസ്റ്റും ഏകദിന പരമ്പരയും കളിച്ചിട്ടുണ്ട്.

ഒരു സെഞ്ചുറിയടക്കം 1657 റണ്‍സും 196 വിക്കറ്റുകളും, 72 ഫസ്റ്റ് ക്ലാസ് മത്സരങ്ങളില്‍നിന്നായി നേടിയിട്ടുണ്ട്. ഏഴ് അര്‍ധ സെഞ്ചുറികളും 12 തവണ അഞ്ചു വിക്കറ്റ് നേട്ടവും സ്വന്തമാക്കി. 51 ലിസ്റ്റ് എ മത്സരങ്ങളില്‍ നിന്ന് 433 റണ്‍സും 52 വിക്കറ്റുകളും സ്വന്തമാക്കി.

1994-95 രഞ്ജി സീസണില്‍ തമിഴ്നാടിനെ ആദ്യമായി കീഴടക്കിയ കേരള രഞ്ജി ട്രോഫി ടീമിലെ പ്രധന താരമായിരുന്നു സുരേഷ്. മഞ്ജു ആണ് ഭാര്യ. മകന്‍ അതുല്‍ എസ്.കൃഷ്ണ.