സഞ്ജുവിനും ഇഷാനും മികച്ച അവസരം; ലങ്കയില്‍ ശ്രദ്ധിക്കേണ്ടത് ഈ വെടിക്കെട്ട് ബാറ്റ്സ്മാനെയെന്ന് എം.എസ്.കെ പ്രസാദ്
മുന്‍ നായകനും യുവ നിരയുടെ ഗോഡ്ഫാദറുമായ രാഹുല്‍ ദ്രാവിഡിന്‍റെ ശിക്ഷണത്തില്‍ ഇന്ത്യന്‍ ടീം ജൂലൈയില്‍ ശ്രീലങ്കയില്‍ പര്യടനം നടത്തുന്നുണ്ട്. മലയാളി താരം സഞ്ജു സാംസണ്‍ അടക്കമുള്ള പല യുവതാരങ്ങള്‍ക്കും നിര്‍ണായകമാണ് ഈ പരമ്പര. ശ്രീലങ്കന്‍ പര്യടനത്തില്‍ ഏറ്റവും ശ്രദ്ധ കൊടുക്കേണ്ട ഇന്ത്യന്‍ താരത്തെ വെളിപ്പെടുത്തിയിരിക്കുകയാണ് മുന്‍ ചീഫ് സെലക്ടര്‍ എം.എസ്.കെ. പ്രസാദ്.
മുംബൈ ഇന്ത്യന്‍സിന്‍റെ വെടിക്കെട്ട് ബാറ്റ്സ്മാനായ സൂര്യകുമാര്‍ യാദവില്‍ ഒരു കണ്ണ് വേണമെന്നാണ് പ്രസാദ് പറയുന്നത്. സീനിയര്‍ ടീം ഇംഗ്ലണ്ടില്‍ പര്യടനം നടത്തുന്നതിനാല്‍ യുവ നിരയേയാണ് ഇന്ത്യ ലങ്കയിലേക്ക് അയക്കുന്നത്. ടീമിനെ പ്രഖ്യാപിച്ചിട്ടില്ലെങ്കിലും സൂര്യകുമാര്‍ ടീമില്‍ സ്ഥാനം നേടുമെന്ന കാര്യം ഏകദേശം ഉറപ്പാണ്.
ഇംഗ്ലണ്ടിനെതിരായ ട്വന്‍റി20 അരങ്ങേറ്റ മത്സരത്തില്‍ തകര്‍പ്പന്‍ ഫിഫ്റ്റിയടിച്ച താരം ഏവരുടെയും മനം കവര്‍ന്നിരുന്നു. വിക്കറ്റ് കീപ്പര്‍ ബാറ്റ്സ്മാന്‍മാരായ ഇഷാന്‍ കിഷനും സഞ്ജു സാംസണിനും മുമ്പിൽ വലിയ അവസരമാണ് തുറന്ന് വന്നിരിക്കുന്നതെന്നും പ്രസാദ് അഭിപ്രായപ്പെട്ടു. ഐ.പി.എല്ലില്‍ മികച്ച പ്രകടനം കാഴ്ചവെച്ച ആവേഷ് ഖാന്‍റെ പ്രകടനം കാണാന്‍ തനിക്ക് ആകാംക്ഷയുണ്ടെന്നും ഇന്ത്യയുടെ രണ്ടാം നിര ടീം ശ്രീലങ്കയെ അവരുടെ മണ്ണില്‍ തോല്‍പിച്ചാല്‍ അത്ഭുതപ്പെടാനില്ലെന്ന് അദ്ദേഹം കൂട്ടിച്ചേര്‍ത്തു.
https://www.facebook.com/Malayalivartha
