വനിതാ പ്രീമിയര്‍ ലീഗ് രണ്ടാം സീസണിലെ എലിമിനേറ്റര്‍ മത്സരം ഇന്ന്. പോയിന്റ് പട്ടികയില്‍ രണ്ടാമതുള്ള മുംബൈ ഇന്ത്യന്‍സും മൂന്നാമതുള്ള റോയല്‍ ചലഞ്ചേഴ്‌സ് ബാംഗ്ലൂരും തമ്മിലാണ് ഇന്നത്തെ മത്സരമുള്ളത്. ജയിക്കുന്ന ടീം ഫൈനലില്‍ ഡല്‍ഹി ക്യാപിറ്റല്‍സിനെ നേരിടും.

മുംബൈയെ ഏഴ് വിക്കറ്റിനു തകര്‍ത്താണ് ആര്‍സിബി നോക്കൗട്ടിലേക്ക് ടിക്കറ്റെടുത്തത്. ആദ്യ പാദത്തില്‍ ആര്‍സിബിയെ മുംബൈ വീഴ്ത്തിയതും ഏഴുവിക്കറ്റിന്. എന്നാല്‍, അവസാന ലീഗ് മത്സരത്തില്‍ നിലവിലെ ചാമ്പ്യന്മാരെ തകര്‍ത്തെറിയാന്‍ ബാംഗ്ലൂരിനു കഴിഞ്ഞു. 6 ഓവറില്‍ ഒരു വിക്കറ്റ് നഷ്ടത്തില്‍ 43 റണ്‍സ് എന്ന നിലയില്‍ നിന്ന് 113 റണ്‍സ് എടുക്കുന്നതിനിടെ മുംബൈ ഓള്‍ ഔട്ടായി. 6 വിക്കറ്റ് വീഴ്ത്തിയ എലിസ് പെറിയായിരുന്നു മുംബൈയെ തകര്‍ത്തത്. മറുപടി ബാറ്റിംഗില്‍ 5 ഓവറും 7 വിക്കറ്റ് ബാക്കിനില്‍ക്കെ ബാംഗ്ലൂരിന് അനായാസ ജയം.