റോയല്‍ ചലഞ്ചേഴ്‌സ് ബംഗളൂരുവിനെതിരെ ആറ് വിക്കറ്റ് ജയം നേടി ചെന്നൈ സൂപ്പര്‍ കിങ്‌സ്. ചെന്നൈ ചെപ്പോക്ക് സ്‌റ്റേഡിയത്തില്‍ നടന്ന മത്സരത്തില്‍ ടോസ് നേടി ബാറ്റിങ് തെരഞ്ഞെടുത്ത ബംഗളൂരു നിശ്ചിത 20 ഓവറില്‍ ആറ് വിക്കറ്റ് വഴങ്ങി 170 റണ്‍സാണെടുത്തത്. മറുപടി ബാറ്റിങ്ങില്‍ എട്ട് പന്തുകളും ആറ് വിക്കറ്റുകളും ബാക്കിനില്‍ക്കെ ചെന്നൈ വിജയം സ്വന്തമാക്കുകയായിരുന്നു. അപ്രതീക്ഷിതമായി ഇന്നലെ നായകസ്ഥാനം ഒഴിഞ്ഞ എം എസ് ധോണിക്ക് പകരം റുതുരാജ് ഗെയ്ക്‌വാദാണ് സിഎസ്‌കെയെ ഇന്ന് നയിച്ചത്.

ചെന്നൈക്കായി രചിന്‍ രവീന്ദ്ര 15 പന്തുകളില്‍ മൂന്ന് വീതം സിക്‌സും ഫോറുകളുമടക്കം 35 റണ്‍സെടുത്തു. ശിവം ധുബെ 28 പന്തുകളില്‍ 34 റണ്‍സെടുത്ത് പുറത്താകാതെ നിന്നു. ധുബെയും രവീന്ദ്ര ജദേജയും ചേര്‍ന്നായിരുന്നു ആതിഥേയര്‍ക്ക് സീസണിലെ ആദ്യ ജയം നേടിക്കൊടുത്തത്. ജദേജ 17 പന്തുകളില്‍ 25 റണ്‍സെടുത്ത് പുറത്താകാതെ നിന്നു. 25 പന്തുകളില്‍ 48 റണ്‍സെടുത്ത അനുജ് റാവത്താണ് ആര്‍.സി.ബിയുടെ ടോപ് സ്‌കോറര്‍. ദിനേഷ് കാര്‍ത്തിക് 26 പന്തുകളില്‍ 38 റണ്‍സെടുത്തു. നായകന്‍ ഫാഫ് ഡുപ്ലെസി 23 പന്തില്‍ എട്ട് ബൗണ്ടറികളടക്കം 35 റണ്‍സെടുത്തു.

ആറോവര്‍ പിന്നിട്ടപ്പോള്‍ 42 റണ്‍സിന് മൂന്ന് വിക്കറ്റ് എന്ന നിലയിലായിരുന്നു ബംഗളൂരു. ബംഗ്ലാദേശ് താരം മുസ്ഥഫിസുര്‍ റഹ്മാനാണ് നാല് ആര്‍.സി.ബി ബാറ്റര്‍മാരെ കൂടാരം കയറ്റിയത്. 23 പന്തില്‍ എട്ട് ബൗണ്ടറികളടക്കം 35 റണ്‍സെടുത്ത ഫാഫ് ഡുപ്ലെസിയൊണ് താരം ആദ്യം മടക്കിയത്.