ആദ്യം ബാറ്റ് ചെയ്ത നെതര്‍ലന്‍ഡ്‌സ് കുറിച്ച 104 റണ്‍സ് വിജയലക്ഷ്യം ഏഴു പന്തുകള്‍ ബാക്കി നില്‍ക്കെയാണ് ദക്ഷിണാഫ്രിക്ക മറികടന്നത്. സ്‌കോര്‍ : നെതര്‍ലന്‍ഡ്‌സ് 20 ഓവറില്‍ ഒമ്പത് വിക്കറ്റിന് 103. ദക്ഷിണാഫ്രിക്ക 18.5 ഓവറില്‍ ആറു വിക്കറ്റ് നഷ്ടത്തില്‍ 106.


മില്ലറുടെ അര്‍ധ സെഞ്ച്വറി പ്രകടനമാണ് ടീമിനെ വിജയത്തിലെത്തിച്ചത്. 51 പന്തില്‍ നാലു സിക്‌സും മൂന്നു ഫോറുമടക്കം 59 റണ്‍സെടുത്ത് താരം പുറത്താകാതെ നിന്നു. മില്ലറാണ് കളിയിലെ താരവും. ട്രിസ്റ്റന്‍ സ്റ്റബ്‌സ് 37 പന്തില്‍ 33 റണ്‍സെടുത്തു. തകര്‍ച്ചയോടെയാണ് ദക്ഷിണാഫ്രിക്ക ബാറ്റിങ് തുടങ്ങിയത്. മൂന്നു റണ്‍സെടുക്കുന്നതിനിടെ മൂന്നു മുന്‍നിര ബാറ്റര്‍മാര്‍ മടങ്ങി. ഓപ്പണര്‍ റിസ ഹെന്‍ഡ്രിക്‌സ് (10 പന്തില്‍ മൂന്ന് റണ്‍സ്), ക്വിന്റണ്‍ ഡികോക്ക് (പൂജ്യം), നായകന്‍ എയ്ഡന്‍ മാര്‍ക്രം (പൂജ്യം) എന്നിവരാണ് പുറത്തായത്.

ഹെന്‍ഡ്രിക്‌സ് വാന്‍ ബീക്കിന്റെ പന്തില്‍ ബൗള്‍ഡായി. ഒരു പന്തുപോലും നേരിടാതെ റണ്‍ ഔട്ടായാണ് ഡികോക്ക് പുറത്തായത്. കിങ്മയുടെ പന്തില്‍ മാര്‍ക്രത്തിനെ സ്‌കോട്ട് എഡ്വേര്‍ഡ്‌സ് കൈയിലൊതുക്കി. അധികം വൈകാതെ ഹെന്റിച് ക്ലാസന്‍ വിവിയന്‍ കിങ്മയുടെ പന്തില്‍ ടിം പ്രിംഗിളിന് ക്യാച്ച് നല്‍കി മടങ്ങി. ടീം 4.3 ഓവറില്‍ നാലു വിക്കറ്റിന് 12 റണ്‍സ്. പവര്‍ പ്ലേയില്‍ നാലു വിക്കറ്റ് നഷ്ടത്തില്‍ 16 റണ്‍സാണ് പ്രോട്ടീസ് നേടിയത്. തുടര്‍ന്ന് ട്രിസ്റ്റന്‍ സ്റ്റ്ബ്‌സും ഡേവിഡ് മില്ലറും നടത്തിയ രക്ഷാപ്രവര്‍ത്തനമാണ് തകര്‍ച്ചയില്‍നിന്ന് ടീമിനെ രക്ഷപ്പെടുത്തിയത്.