ആരാധകര്‍ കാത്തിരിക്കുന്ന ട്വന്റി 20 ലോകകപ്പ് ഇന്ത്യ-ഇംഗ്ലണ്ട് സെമിഫൈനല്‍ ഇന്നാണ്. ഇന്ത്യന്‍ സമയം രാത്രി എട്ട് മണിക്കാണ് ഗയാനയിലെ പ്രൊവിഡന്‍സ് സ്റ്റേഡിയത്തില്‍ സൂപ്പര്‍ പോരാട്ടം തുടങ്ങുക. മഴയുടെ കനത്ത ഭീഷണി ഗയാനയില്‍ മത്സരത്തിനുണ്ട്.

ഇതിന് പുറമെ മൂന്ന് ഇംഗ്ലീഷ് താരങ്ങളുടെ മികവും ടീം ഇന്ത്യക്ക് ആശങ്കയാണ്. എന്നാല്‍ മൂവരെയും ഇന്ത്യന്‍ താരങ്ങള്‍ കളിയില്‍ കൈകാര്യം ചെയ്താല്‍ നീലപ്പടയുടെ ഫൈനല്‍ പ്രവേശം അനായാസം സംഭവിക്കും.

ഇംഗ്ലണ്ടിന്റെ മാച്ച് വിന്നര്‍മാരില്‍ ഒരാളായ ഓപ്പണറും ക്യാപ്റ്റനുമായ ജോസ് ബട്ലറാണ് ടീം ഇന്ത്യക്ക് ഭീഷണിയുയര്‍ത്താന്‍ സാധ്യതയുള്ള ഒരു താരം. ഈ ലോകകപ്പില്‍ അത്ര മികച്ച ഫോമിലല്ലെങ്കിലും അവസാന കളിയില്‍ അമേരിക്കയ്‌ക്കെതിരെ 38 പന്തുകളില്‍ ആറ് ഫോറും ഏഴ് സിക്സറുകളും പറത്തി പുറത്താവാതെ 83* റണ്‍സുമായി ബട്ലര്‍ ട്രാക്കിലേക്ക് മടങ്ങിയെത്തിക്കഴിഞ്ഞു. ഒറ്റയ്ക്ക് മത്സരം മാറ്റിമറിക്കാനുള്ള കഴിവാണ് ശ്രദ്ധേയം. സെമിയില്‍ ബട്ലറുടെ പ്രകടനം ഇംഗ്ലണ്ടിന് അതിനാല്‍ തന്നെ ഏറെ നിര്‍ണായകമാണ്. ഈ ലോകകപ്പിലെ ഏഴ് കളികളില്‍ 191 റണ്‍സാണ് ബട്ലര്‍ നേടിയത്.

ഇന്ത്യന്‍ ടീമിന് ഏറ്റവും ഭീഷണിയായേക്കാവുന്ന ഇംഗ്ലീഷ് ബാറ്റര്‍ നിലവില്‍ ടീമിലെ മറ്റൊരു ഓപ്പണറായ ഫില്‍ സാള്‍ട്ടാണ്. വെസ്റ്റ് ഇന്‍ഡീസിനെതിരായ ഇംഗ്ലണ്ടിന്റെ സൂപ്പര്‍ 8 ജയത്തില്‍ സാള്‍ട്ട് നിര്‍ണായകമായിരുന്നു. 47 പന്തുകളില്‍ ഏഴ് ഫോറും അഞ്ച് സിക്സുകളും സഹിതം പുറത്താവാതെ 87* റണ്‍സെടുത്ത സാള്‍ട്ട് ഷോടെയാണ് ഇംഗ്ലണ്ടിനെ സൂപ്പര്‍ എട്ടില്‍ കാത്തത്. ഇത്തവണ ഏഴ് മത്സരങ്ങളില്‍ സാള്‍ട്ട് 183 റണ്‍സ് സ്വന്തമാക്കി. 166.36 സ്‌ട്രൈക്ക്‌റേറ്റാണ് താരത്തിന്റെ ഏറ്റവും വലിയ കരുത്ത്.

ഇംഗ്ലണ്ടിന്റെ ഏറ്റവും പ്രധാന പേസറാണ് ജോഫ്ര ആര്‍ച്ചര്‍. പവര്‍പ്ലേ ഓവറുകളില്‍ തന്നെ വിക്കറ്റെടുക്കുകയാവും ആര്‍ച്ചറുടെ ലക്ഷ്യം. ആര്‍ച്ചര്‍ ഇന്നിംഗ്സിന്റെ തുടക്കത്തില്‍ ബ്രേക്ക്ത്രൂ നേടിയാല്‍ അത് ഇന്ത്യന്‍ ടീമിന് തിരിച്ചടിയാവും.

അതേസമയം ട്വന്റി 20 ക്രിക്കറ്റ് ലോകകപ്പ് 2024ല്‍ ഇംഗ്ലണ്ടിനെതിരായ സെമിഫൈനലിന് മുമ്പ് ടീം ഇന്ത്യക്ക് തിരിച്ചടി. ടീമിന്റെ പരിശീലന സെഷന്‍ ഗയാനയിലെ പ്രൊവിഡന്‍സ് സ്റ്റേഡിയത്തില്‍ കനത്ത മഴ കാരണം മുടങ്ങി. ഗയാനയിലെ തുടര്‍ച്ചയായ മഴ ഇന്ത്യന്‍ ടീമിന്റെ ഇന്നത്തെ സെമിക്കും ഭീഷണിയാണ്.

ഇന്ന് ഗയാനയിലെ പ്രൊവിഡന്‍സ് സ്റ്റേഡിയത്തില്‍ ഇന്ത്യന്‍ സമയം രാത്രി എട്ട് മണിക്കാണ് ഇന്ത്യ-ഇംഗ്ലണ്ട് സെമി തുടങ്ങേണ്ടത്. സെമി ദിനത്തില്‍ ഗയാനയില്‍ കനത്ത മഴ പെയ്യാന്‍ സാധ്യതയുണ്ടെന്നാണ് കാലാവസ്ഥ പ്രവചനം. മഴയ്ക്കൊപ്പം ഇടിമിന്നലിനും സാധ്യത പ്രവചിച്ചിരിക്കുന്നത് ആശങ്ക കൂട്ടുന്നു. കാലാവസ്ഥാ പ്രവചനമനുസരിച്ച് ഗയാനയില്‍ നാളെ രാവിലെ കനത്ത മഴ പെയ്യും. ഉച്ചതിരിഞ്ഞ് ഇടിമിന്നലോടു കൂടിയ മഴയ്ക്കും സാധ്യത പറയുന്നു. 70 ശതമാനം മഴയെത്തുമെന്നാണ് കാലാവസ്ഥ പ്രവചനം. ഇന്ത്യ-ഇംഗ്ലണ്ട് സെമിഫൈനല്‍ മത്സരത്തിന് റിസര്‍വ് ഡേയില്ല. എന്നാല്‍ 250 മിനിറ്റ് അധിക സമയം മത്സരത്തിന് അനുവദിച്ചിട്ടുണ്ട്. അതിനാല്‍തന്നെ സൂപ്പര്‍ പോരാട്ടം നടക്കുമെന്ന പ്രതീക്ഷയിലാണ് ആരാധകര്‍.

ഗയാനയില്‍ ഒരു പന്ത് പോലും എറിയാനാവാത്ത രീതിയില്‍ സെമി മഴയെടുത്താല്‍ ഇന്ത്യ ടി20 ലോകകപ്പ് ഫൈനലില്‍ കടക്കും. സൂപ്പര്‍ എട്ടിലെ ഗ്രൂപ്പ് ഒന്നില്‍ ആദ്യ സ്ഥാനത്തെത്തിയതാണ് ഇന്ത്യക്ക് ഗുണം ചെയ്യുക. കളിച്ച മൂന്ന് മത്സരങ്ങളും ഇന്ത്യ ജയിച്ചിരുന്നു. ആദ്യ മത്സരത്തില്‍ അഫ്ഗാനിസ്ഥാനെ തോല്‍പ്പിച്ച ഇന്ത്യ പിന്നീട് ബംഗ്ലാദേശ്, ഓസ്ട്രേലിയ ടീമുകള്‍ക്കെതിരെയും ജയം സ്വന്തമാക്കി. അതേസമയം ഗ്രൂപ്പ് രണ്ടില്‍ രണ്ടാമതായാണ് ഇംഗ്ലണ്ട് സൂപ്പര്‍ എട്ട് ഘട്ടത്തില്‍ ഫിനിഷ് ചെയ്തത്. ദക്ഷിണാഫ്രിക്കയ്ക്കെതിരായ മത്സരം ഇംഗ്ലണ്ട് പരാജയപ്പെട്ടപ്പോള്‍ വെസ്റ്റ് ഇന്‍ഡീസ്, യുഎസ് ടീമുകളെയാണ് തോല്‍പ്പിച്ചത്.