ട്വന്റി20 ലോകകപ്പില്‍ ദക്ഷിണാഫ്രിക്കയെ ഏഴ് റണ്‍സിന് പരാജയപ്പെടുത്തി ഇന്ത്യ. ഇന്ത്യ ഉയര്‍ത്തിയ 177 റണ്‍സ് പിന്തുടര്‍ന്ന ദക്ഷിണാഫ്രിക്കയ്ക്ക് 20 ഓവറില്‍ എട്ട് വിക്കറ്റ് നഷ്ടത്തില്‍ 169 റണ്‍സ് നേടാനേ കഴിഞ്ഞൂള്ളൂ. ഇന്ത്യക്ക് വേണ്ടി ഹാര്‍ദിക് പാണ്ഡ്യ മൂന്ന് വിക്കറ്റും അര്‍ഷ്ദീപ് സിംഗും ജസ്പ്രീത് ബുമ്രയും രണ്ട് വിക്കറ്റുകള്‍ വീതവും വീഴ്ത്തി. 52 റണ്‍സ് നേടിയ ഹെന്റിച്ച് ക്‌സാസന്‍ ആണ് ദക്ഷിണാഫ്രിക്കയുടെ ടോപ്സ്‌കോറര്‍.

ഇന്ത്യ ഉയര്‍ത്തിയ 177 റണ്‍സ് വിജയലക്ഷ്യം പിന്തുടര്‍ന്ന ദക്ഷിണാഫ്രിക്കയ്ക്ക് ടീം സ്‌കോര്‍ ഏഴില്‍ നില്‍ക്കേ ഓപ്പണര്‍ റീസ ഹെന്‍ഡ്രിക്സിനെ നഷ്ടമായി. അഞ്ച് പന്തില്‍ നിന്ന് നാല് റണ്‍സ് മാത്രമെടുത്ത താരത്തെ ജസ്പ്രീത് ബുംറ ബൗള്‍ഡാക്കി. പിന്നാലെ നായകന്‍ എയ്ഡന്‍ മാര്‍ക്രവും മടങ്ങി. അര്‍ഷ്ദീപിന്റെ പന്തില്‍ മാര്‍ക്രത്തെ വിക്കറ്റ് കീപ്പര്‍ പന്ത് കൈയ്യിലൊതുക്കി.

നേരത്തെ ടോസ് നേടി ആദ്യം ബാറ്റിംഗിനിറങ്ങിയ ഇന്ത്യ നിശ്ചിത 20 ഓവറില്‍ ഏഴുവിക്കറ്റ് നഷ്ടത്തില്‍ 176 റണ്‍സെടുത്തു. തകര്‍ച്ചയോടെ തുടങ്ങിയ ഇന്ത്യയെ വിരാട് കൊഹ്ലിയുടെ ക്ലാസ് ഇന്നിംഗ്സാണ് കര കയറ്റിയത്. മൂന്നാംവിക്കറ്റില്‍ അക്‌സര്‍ പട്ടേലുമൊത്ത് നേടിയ 72 റണ്‍സിന്റെ കൂട്ടുകെട്ട് ഇന്ത്യയെ മികച്ച സ്‌കോറിലെത്തിച്ചു. 59 പന്തില്‍ നിന്ന് കൊഹ്ലി 76 റണ്‍സും 37 പന്തില്‍ നിന്ന് അക്‌സര്‍ പട്ടേല്‍ 47 റണ്‍സും നേടി.

ആദ്യഓവറില്‍ രോഹിതും കൊഹ്ലിയും ചേര്‍ന്ന് തകര്‍പ്പന്‍ തുടക്കം നല്‍കിയെങ്കിലും രണ്ടാം ഓവറില്‍ സ്പിന്നര്‍ കേശവ് മഹാരാജ് എത്തിയതോടെ കളി മാറി. രണ്ട് വിക്കറ്റുകളാണ് ആവ ഓവറില്‍ ഇന്ത്യക്ക് നഷ്ടമായത് ഒമ്പത് റണ്‍സെടുത്ത രോഹിത് ക്ലാസന് ക്യാച്ച് നല്‍കി മടങ്ങി. പിന്നാലെ റിഷഭ് പന്തും പോയതോടെ ഇന്ത്യയുടെ നില പരുങ്ങലിലായി. തുടര്‍ന്നെത്തിയ സൂര്യകുമാര്‍ യാദവ് പ്രതീക്ഷ നല്‍കിയെങ്കിലും റബാദയുടെ ബോളില്‍ ക്ലാസന്‍ തകര്‍പ്പന്‍ ക്യാച്ചിലൂടെ മടക്കിയയച്ചു.