വനിതാ ഏഷ്യാ കപ്പില്‍ പാകിസ്ഥാനെ തകര്‍ത്തെറിഞ്ഞ് ഇന്ത്യന്‍ വനിതകള്‍. ആദ്യ പോരാട്ടത്തില്‍ ഏഴ് വിക്കറ്റ് വിജയം ഇന്ത്യ സ്വന്തമാക്കി. ആദ്യം ബാറ്റ് ചെയ്ത പാകിസ്ഥാന്റെ പോരാട്ടം 19.2 ഓവറില്‍ വെറും 108 റണ്‍സില്‍ അവസാനിച്ചു.
വെറും 14.1 ഓവറില്‍ മൂന്ന് വിക്കറ്റ് മാത്രം നഷ്ടത്തില്‍ ഇന്ത്യ 109 റണ്‍സെടുത്തു വിജയം നേടി. ഓപ്പണര്‍മാരായ ഷെഫാലി വര്‍മ സ്മൃതി മന്ധാന സഖ്യം 9.3 ഓവറില്‍ 85 റണ്‍സ് ചേര്‍ത്ത് വിജയത്തിനു അടിത്തറയിടുകയായിരുന്നു.

സ്മൃതി 39 പന്തില്‍ 9 ഫോറുകള്‍ സഹിതം 45 റണ്‍സെടുത്തു. ഷെഫാലി 29 പന്തില്‍ 6 ഫോറും ഒരു സിക്‌സും സഹിതം 40 റണ്‍സും എടുത്തു. ഇരുവര്‍ക്കും പുറമെ ഹേമലത ദയാളനാണ് പുറത്തായ മറ്റൊരു താരം.

11 പന്തില്‍ 14 റണ്‍സാണ് താരം കണ്ടെത്തിയത്. ടോസ് നേടി പാകിസ്ഥാന്‍ ബാറ്റിങ് തിരഞ്ഞെടുക്കുകയായിരുന്നു. നാലോവറില്‍ 20 റണ്‍സ് വഴങ്ങി മൂന്ന് വിക്കറ്റുകള്‍ വീഴ്ത്തിയ ദീപ്തി ശര്‍മയുടെ മികച്ച ബൗളിങാണ് പാകിസ്ഥാന്റെ നടുവൊടിച്ചത്. രേണുക സിങ്, പൂജ വസ്ത്രാകര്‍, ശ്രേയങ്ക പാട്ടീല്‍ എന്നിവര്‍ രണ്ട് വീതം വിക്കറ്റുകള്‍ വീഴ്ത്തുകയും ചെയ്തു.