ഓസ്‌ട്രേലിയൻ ക്രിക്കറ്റ് താരം പാറ്റ് കമിൻസ് തുടർച്ചയായ വിവാദങ്ങളിൽ അകപ്പെടുകയാണ്. മുൻ സഹതാരം ഉസ്മാൻ ഖവാജയുടെ പന്തുചുരണ്ടൽ വെളിപ്പെടുത്തലുകൾ ക്രിക്കറ്റ് ലോകത്ത് വലിയ ചർച്ചയായിരിക്കെയാണ്, കമിൻസും ഭാര്യ ബെക്കിയും തമ്മിലുള്ള വഴക്കിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നത്.

വീടിന് പുറത്തുവച്ച് ഭാര്യ ബെക്കി കമിൻസുമായി രൂക്ഷമായി സംസാരിക്കുന്നതും താരം തിരിച്ച് പ്രതികരിക്കുന്നതുമായ ദൃശ്യങ്ങളാണ് പുറത്തുവന്നിരിക്കുന്നത്. വീഡിയോ വൈറലായതോടെ ഇരുവരും തമ്മിലുള്ള ബന്ധത്തിൽ വിള്ളലുകൾ വീണെന്ന തരത്തിൽ അഭ്യൂഹങ്ങൾ പരന്നിരുന്നു. എന്നാൽ, മണിക്കൂറുകൾക്കുള്ളിൽ തന്നെ 'മൈ ലവ്‌സ്' എന്ന അടിക്കുറിപ്പോടെ ബെക്കി ഇൻസ്റ്റഗ്രാമിൽ കുടുംബചിത്രം പങ്കുവച്ചതോടെ ആരാധകരുടെ ആശങ്കകൾക്ക് വിരാമമായി. 2013-ൽ കിങ്സ് ക്രോസിലെ ഒരു ബാറിൽ വച്ച് കണ്ടുമുട്ടിയ ഇരുവരും നീണ്ട പ്രണയത്തിനൊടുവിലാണ് വിവാഹിതരായത്.

അതേസമയം, 2018-ലെ 'സാൻഡ്‌പേപ്പർ ഗേറ്റ്' പന്തുചുരണ്ടൽ വിവാദത്തെക്കുറിച്ച് ഉസ്മാൻ ഖവാജ തന്റെ പുതിയ പുസ്തകത്തിലൂടെ നടത്തിയ വെളിപ്പെടുത്തലുകൾ കമിൻസിനെ സമ്മർദ്ദത്തിലാക്കിയിട്ടുണ്ട്. അന്ന് ശിക്ഷിക്കപ്പെട്ട സ്റ്റീവ് സ്മിത്ത്, ഡേവിഡ് വാർണർ, കാമറൂൺ ബാൻക്രോഫ്റ്റ് എന്നിവർക്ക് പുറമെ അന്നത്തെ ടീമിലെ മറ്റ് അംഗങ്ങൾക്കും പന്തുചുരണ്ടലിനെക്കുറിച്ച് അറിവുണ്ടായിരുന്നു എന്നാണ് ഖവാജയുടെ ആരോപണം. കൂടാതെ, പോർട്ട് എലിസബത്തിൽ നടന്ന ടെസ്റ്റ് മത്സരത്തിലും സമാനമായ ശ്രമം നടന്നതായി അദ്ദേഹം ആരോപിച്ചിരുന്നു.

ഖവാജയുടെ വെളിപ്പെടുത്തലുകളെക്കുറിച്ച് വിശദമായി പഠിച്ചുകൊണ്ടിരിക്കുകയാണെന്നും, വിഷയത്തിൽ കൂടുതൽ വിവരങ്ങൾ ക്രിക്കറ്റ് ഓസ്‌ട്രേലിയയോട് ആവശ്യപ്പെട്ടിട്ടുണ്ടെന്നും പാറ്റ് കമിൻസ് 'എക്‌സിലൂടെ' വ്യക്തമാക്കി. താൻ ഉടൻ തന്നെ മാധ്യമങ്ങളെ കാണുമെന്നും താരം അറിയിച്ചിട്ടുണ്ട്. വിഷയത്തിൽ കമിൻസ് വെള്ളിയാഴ്ച ഔദ്യോഗികമായി പ്രതികരിക്കുമെന്നാണ് രാജ്യാന്തര മാധ്യമങ്ങൾ റിപ്പോർട്ട് ചെയ്യുന്നത്. അതേസമയം, ഇത്തരം കാര്യങ്ങളെക്കുറിച്ച് തനിക്ക് യാതൊരു അറിവുമുണ്ടായിരുന്നില്ല എന്നാണ് സഹതാരം മിച്ചൽ സ്റ്റാർക്ക് വ്യക്തമാക്കിയത്.