ടി20 ലോകകപ്പിനു മുന്നോടിയായുള്ള ദക്ഷിണാഫ്രിക്കൻ പര്യടനത്തിലെ ആദ്യ പോരാട്ടത്തിൽ ഇന്ത്യൻ വനിതകൾക്ക് പരാജയത്തോടെ തുടക്കം. ടി20 പരമ്പരയിലെ ആദ്യ പോരാട്ടത്തിൽ ദക്ഷിണാഫ്രിക്ക വനിതകൾ 6 വിക്കറ്റ് വിജയം സ്വന്തമാക്കി.

ആദ്യം ബാറ്റ് ചെയ്ത ഇന്ത്യ നിശ്ചിത ഓവറിൽ 7 വിക്കറ്റ് നഷ്ടത്തിൽ 157 റൺസ് നേടി. ദക്ഷിണാഫ്രിക്ക 4 വിക്കറ്റ് നഷ്ടത്തിൽ 19.1 ഓവറിൽ 158 റൺസെടുത്ത് ലക്ഷ്യം കാണുകയും ചെയ്തു. ക്യാപ്റ്റൻ ലോറ വോൾവാർടിന്റെ അർധ സെഞ്ച്വറിയുടെ ബലത്തിലാണ് പ്രോട്ടീസ് വനിതകളുടെ ജയം.
താരം 8 ഫോറുകൾ സഹിതം 39 പന്തിൽ 51 റൺസെടുത്തു. അന്നരി ഡെർക്‌സൻ പുറത്താകാതെ 34 പന്തിൽ 44 റൺസും അടിച്ച് നിർണായക സംഭാവന നൽകി. താരം 4 ഫോറും ഒരു സിക്‌സും തൂക്കി. ജയിക്കുമ്പോൾ 16 പന്തിൽ 18 റൺസുമായി ക്ലോ ട്രിയോണും ക്രീസിൽ തുടർന്നു.
ഇന്ത്യൻ നിരയിൽ ശ്രേയങ്ക പാട്ടീൽ ബൗളിങിൽ തിളങ്ങി. താരം 2 വിക്കറ്റെടുത്തു. അരുന്ധതി റെഡ്ഡി, ശ്രീ ചരണി എന്നിവർ ഓരോ വിക്കറ്റെടുക്കുകയും ചെയ്തു..

നേരത്തെ 47 റൺസെടുത്ത ഹർമൻപ്രീത് കൗർ 36 റൺസെടുത്ത ജെമിമ റോഡ്രിഗ്‌സ്, 34 റൺസെടുത്ത ഓപ്പണർ ഷെഫാലി വർമ എന്നിവർ മാത്രമാണ് ഇന്ത്യൻ നിരയിൽ പിടിച്ചു നിന്നത്.