രാജസ്ഥാന് വേണ്ടി കൗമാരതാരം വൈഭവ് സൂര്യവംശിയുടെ സെഞ്ചുറിയും പാഴായി. രാജസ്ഥാൻ ഉയർത്തിയ 229 റൺസ് വിജയലക്ഷ്യം 18.3 ഓവറിൽ ഹൈദരാബാദ് മറികടക്കുകയായിരുന്നു. ഹൈദരാബാദിന് അഞ്ചു വിക്കറ്റിന്റെ ജയം. അഭിഷേക് ശർമയും ഇഷാൻ കിഷനും അർധസെഞ്ചുറിയോടെ തിളങ്ങി. രാജസ്ഥാന് വേണ്ടി വൈഭവ് 37 പന്തിൽ നിന്ന് 103 റൺസെടുത്താണ് പുറത്തായത്.

മറുപടി ബാറ്റിങ്ങിനിറങ്ങിയ ഹൈദരാബാദിന് ആദ്യ ഓവറിൽ തന്നെ ട്രാവിസ് ഹെഡിനെ(6) നഷ്ടമായി. എന്നാൽ ഹൈദരാബാദ് പതറിയില്ല. രണ്ടാം വിക്കറ്റിൽ അഭിഷേക് ശർമയും ഇഷാൻ കിഷനും ചേർന്ന് സ്‌കോറുയർത്തി.

രാജസ്ഥാൻ ബൗളർമാരെ ഇരുവരും മാറി മാറി പ്രഹരിച്ചു. സിക്സറുകൾ പറപറന്നതോടെ പവർപ്ലേയിൽ സ്‌കോർ 89 ലെത്തി. പിന്നാലെ അഭിഷേകും കിഷനും ഫിഫ്റ്റി തികച്ചു. അഭിഷേക് 29 പന്തിൽ നിന്ന് 57 റൺസെടുത്ത് പുറത്തായി. അതോടെ എസ്ആർഎച്ച് പത്തോവറിൽ 139-2 എന്ന നിലയിലായി. പിന്നീട് കത്തിക്കയറിയ ഇഷാൻ കിഷൻ അതിവേഗം സ്‌കോറുയർത്തി. എന്നാൽ ഇഷാനെയും പുറത്താക്കി രാജസ്ഥാൻ തിരിച്ചടിക്കുകയും ചെയ്തു. 31 പന്തിൽ 74 റൺസാണ് താരത്തിന്റെ സമ്പാദ്യം. നാലാം വിക്കറ്റിൽ ഒന്നിച്ച ഹെന്റിച്ച് ക്ലാസനും നിതീഷ് കുമാർ റെഡ്ഡിയുമാണ് പിന്നീട് എസ്ആർഎച്ച് ഇന്നിങ്സ് മുന്നോട്ടുനയിച്ചത്. കരുതലോടെയാണ് ഇരുവരും കളിച്ചത്. 16 ഓവർ അവസാനിക്കുമ്പോൾ 193-3 എന്ന നിലയിലായിരുന്നു ഹൈദരാബാദ്. ടീമിനെ ലക്ഷ്യത്തിന് അടുത്തെത്തിച്ചതിന് പിന്നാലെ ഇരുവരും പുറത്തായി. നിതീഷ് കുമാർ 18 പന്തിൽ നിന്ന് 36 റൺസെടുത്തപ്പോൾ ക്ലാസൻ 24 പന്തിൽ നിന്ന് 29 റൺസെടുത്തു. 18.3 ഓവറിൽ ഹൈദരാബാദ് ലക്ഷ്യത്തിലെത്തുകയും ചെയ്തു.