ഐപിഎല്ലിൽ വൈഭവ് സൂര്യവംശിയുടെ വമ്പൻ പ്രകടനത്തിൽ രാജസ്ഥാന് മിന്നും ജയം. നിർണായകമത്സരത്തിൽ ലഖ്നൗ സൂപ്പർ ജയന്റ്‌സിനെയാണ് രാജസ്ഥാൻ കീഴടക്കിയത്. ഏഴുവിക്കറ്റിനാണ് ജയം നേടിയത്.

ലഖ്നൗ ഉയർത്തിയ 221 റൺസ് വിജയലക്ഷ്യം 19.1 ഓവറിൽ മൂന്ന് വിക്കറ്റ് നഷ്ടപ്പെടുത്തി രാജസ്ഥാൻ മറികടക്കുകയായിരുന്നു വൈഭവ് സൂര്യവംശി 38 പന്തിൽ നിന്ന് 93 റൺസുമായി തിളങ്ങി. ജയത്തോടെ രാജസ്ഥാൻ പ്ലേ ഓഫ് സാധ്യത സജീവമാക്കി. നിലവിൽ പോയന്റ് പട്ടികയിൽ നാലാമതാണ് രാജസ്ഥാൻ. അവസാനമത്സരം ജയിച്ചാൽ ടീമിന് പ്ലേ ഓഫ് ടിക്കറ്റെടുക്കാവുന്നതാണ്.

ലഖ്‌നൗ ഉയർത്തിയ വിജയലക്ഷ്യത്തിലേക്ക് വെടിക്കെട്ടോടെയാണ് രാജസ്ഥാൻ തുടങ്ങിയത്. നായകൻ യശസ്വി ജയ്‌സ്വാളും വൈഭവ് സൂര്യവംശിയും ലഖ്‌നൗ ബൗളർമാരെ അടിച്ചുപറത്തി. വൈഭവ് പതിയെ തുടങ്ങിയപ്പോൾ ജയ്‌സ്വാളാണ് തകർത്തടിച്ചത്.

വൈഭവിനെ ഒരുവശത്തുനിർത്തി ജയ്‌സ്വാൾ ടീമിനെ മുന്നോട്ടു നയിക്കുകയായിരുന്നു. പവർപ്ലേ അവസാനിക്കുമ്പോൾ ടീം 71 ലെത്തി. എന്നാൽ ഏഴാം ഓവറിൽ ജയ്‌സ്വാൾ പുറത്തായി. 23 പന്തിൽ നിന്ന് 43 റൺസാണ് താരത്തിന്റെ സമ്പാദ്യം. ജയ്‌സ്വാൾ പുറത്തായെങ്കിലും വൈഭവും വൺഡൗണായി ഇറങ്ങിയ ധ്രുവ് ജുറേലും സ്‌കോർ ഉയർത്തുകയും ചെയ്തു.

രണ്ടാം വിക്കറ്റിൽ ഇരുവരും മികച്ച കൂട്ടുകെട്ട് പടുത്തുയർത്തിയതോടെ രാജസ്ഥാന് ജയപ്രതീക്ഷ കൈവന്നു. ഒൻപതാം ഓവറിൽ 26 റൺസാണ് രാജസ്ഥാൻ അടിച്ചെടുത്തത്. പിന്നാലെ വൈഭവിന്റെ ഫിഫ്റ്റിയുമെത്തി. പത്തോവറിൽ ടീം 121-1 എന്ന നിലയിലായിരുന്നു. പിന്നീടങ്ങോട്ട് വൈഭവും ജുറേലും ലഖ്‌നൗ ബൗളർമാരെ തലങ്ങും വിലങ്ങും പ്രഹരിക്കുകയും ചെയ്തു.. വൈഭവിന്റെ ബാറ്റിൽ നിന്ന് സിക്‌സറുകൾ പ്രവഹിച്ചുകൊണ്ടേയിരുന്നു. അത് നോക്കിനിൽക്കാനേ ലഖ്‌നൗ താരങ്ങൾക്ക് കഴിഞ്ഞുള്ളൂ.