ഏകദിന ക്രിക്കറ്റിന്റെ സ്റ്റെലായിരുന്നു സച്ചിന്‍ . സച്ചിന്റെ ഓരോ ഷോട്ടും ഏതൊരു ബൗളര്‍ക്കും പേടിയാണ്‌. ലോകോത്തര ബൗളര്‍മാരെല്ലാവരും തന്നെ സച്ചിന്റെ ബാറ്റിന്റെ ചൂടറിഞ്ഞിട്ടുണ്ട്‌. റണ്‍സുകള്‍ ഇഴഞ്ഞ്‌ നീങ്ങിക്കൊണ്ടിരുന്ന കാലത്താണ്‌ സച്ചിന്റെ ആഗമനം. ഏകദിന ക്രിക്കറ്റിനെ കൂടുതല്‍ ഉന്മേഷമാക്കാന്‍ സച്ചിനു കഴിഞ്ഞു. ക്രിക്കറ്റ്‌ ഒരു മതമായും ദൈവമായും കാണുന്ന ജനതയ്‌ക്ക്‌ സച്ചിന്റെ മധുരിക്കുന്ന ഷോട്ടുകള്‍ ഇനി ഓര്‍മ്മയില്‍ മാത്രം. സച്ചിന്‍ ഏകദിന ക്രിക്കറ്റിനോട്‌ വിടപറഞ്ഞു. വിരമിക്കാനുള്ള തീരുമാനം അറിയിച്ചുകൊണ്ട് സച്ചിന്‍ ബി.സി.സി.ഐക്ക് കത്തെഴുതി. പാകിസ്താനെതിരായ ഏകദിന പരമ്പരയ്ക്കുള്ള ടീമിനെ പ്രഖ്യാപിക്കുന്നതിന് നിമിഷങ്ങള്‍ മുമ്പാണ് സച്ചിന്റെ തീരുമാനം വന്നത്. 463 ഏകദിനങ്ങളില്‍ നിന്ന് 49 സെഞ്ച്വറി ഉള്‍പ്പടെ 18,426 റണ്‍സ് സച്ചിന്‍ നേടിയിട്ടുണ്ട്. 1989 ഡിസംബര്‍ 18ന് പാകിസ്താനെതിരെയായിരുന്നു സച്ചിന്‍ എന്ന ക്രിക്കറ്റ് പ്രതിഭയുടെ അരങ്ങേറ്റം.
ഏഷ്യാ കപ്പില്‍ കഴിഞ്ഞ വര്‍ഷം പാകിസ്താനെതിരെയാണ് ഏറ്റവും ഒടുവില്‍ സച്ചിന്‍ ഏകദിനത്തില്‍ കളിച്ചത്. 'ഇന്ത്യന്‍ ടീമിന്റെ നല്ല ഭാവിക്കായി ആശംസകള്‍ നേരുന്നു. ലോകകപ്പ് നേടുന്ന ടീമിന്റെ ഭാഗമാകാന്‍ കഴിഞ്ഞത് ഭാഗ്യമായി കരുതുന്നു. വര്‍ഷങ്ങളായി എന്നെ പിന്തുണച്ച എല്ലാ അഭ്യുദയകാംക്ഷികള്‍ക്കും നന്ദി-സച്ചിന്റെ വാക്കുകള്‍. 23 വര്‍ഷത്തെ ഏകദിന കരിയറിനാണ് വിരാമമായത്. റണ്‍ മെഷീനായി വളര്‍ന്ന സച്ചിന്‍ ഒന്നൊന്നായി റെക്കാഡുകള്‍ സൃഷ് ടിച്ചകൊണ്ടേയിരുന്നു. 20 വര്‍ഷം പിന്നിട്ടപ്പോഴേക്കും റെക്കോഡുകള്‍ സ്ഥാപിക്കുന്നത് ശീലമാക്കിയ ക്രിക്കറ്ററായി അദ്ദേഹം മാറി. എന്നും വിവാദങ്ങളില്‍ നിന്ന് ഒഴിഞ്ഞു നില്‍ക്കാന്‍ ആഗ്രഹിച്ച സച്ചിന്‍ ഇംഗ്ലണ്ടിനെതിരെ നടന്ന പരമ്പരയിലെ മോശം ഫോമിന്റെ പേരില്‍ വിരമിക്കാന്‍ സമയമായി എന്ന മുറവിളി ഉയര്‍ന്നവേളയില്‍ തന്നെയാണ് ഏകദിന ക്രിക്കറ്റ് മതിയാക്കുന്നത്.