ടുണിഷ്യയെ ഗോള്മഴയില് മുക്കി ബെല്ജിയം ; രണ്ടിനെതിരെ അഞ്ച് ഗോളുകള്ക്ക് ബെല്ജിയത്തിന്റെ ജൈത്രയാത്ര
റഷ്യന് ലോകകപ്പിലെ കറുത്ത കുതിരകളാകുമെന്ന് കരുതപ്പെടുന്ന ബെല്ജിയത്തിന് ടുണിഷ്യയ്ക്കെതിരെ കിടലന് വിജയം. രണ്ടിനെതിരെ അഞ്ച് ഗോളുകള്ക്കാണ് ബെല്ജിയത്തിന്റെ ജൈത്രയാത്ര. മത്സരത്തിന്റെ തുടക്കത്തില് തന്നെ ടൂണിഷ്യയെ ഞെട്ടിച്ച് രണ്ട് ഗോളുകള് നേടിയെങ്കിലും അധികം വൈകാതെ ബെല്ജിയം ഒരു ഗോള് വഴങ്ങുകയായിരുന്നു. ആദ്യ മത്സരത്തില് ഇരട്ട ഗോളുമായി കളം നിറഞ്ഞ റൊമേലു ലുകാകുവിന്റെയും ക്യാപ്ടന് ഈഡന് ഹസാര്ഡിന്റെയും മിന്നും പ്രകടനമാണ് ബെല്ജിയത്തിന് ആദ്യപകുതിയില് ആധിപത്യം നല്കിയത്. റഷ്യന് ലോകകപ്പില് ലുക്കാക്കു സ്വന്തം പേരില് കുറിക്കുന്ന നാലാം ഗോളാണിത്. റഷ്യന് ലോകകപ്പില് ഏറ്റവും കൂടുതല് ഗോളുകള് പിറന്ന മത്സരം കൂടിയായിരുന്നു ഇത്.
മത്സരത്തിന്റെ ആറാം മിനിട്ടില് ലഭിച്ച പെനാല്റ്റി അവസരം ഗോള്വലയിലെത്തിച്ചാണ് ബെല്ജിയം പടയോട്ടം ആരംഭിച്ചത്. ബോക്സിനുള്ളില് ഈഡന് ഹസാര്ഡിനെ എതിര്താരം ഫൗള് ചെയ്തതിന് ലഭിച്ച പെനാല്റ്റി ടൂണിഷ്യന് ഗോളിയെ കബളിപ്പിച്ച് ലക്ഷ്യത്തിലെത്തുകയായിരുന്നു. കഴിഞ്ഞ മത്സരത്തിലെ താരം ലുക്കാക്കുവിന്റെ വകയായിരുന്നു ബെല്ജിയത്തിന്റെ രണ്ടാം ഗോള്. 16ാം മിനിട്ടില് ഗോള് മുഖത്തേക്ക് മറിച്ച് നല്കിയ പന്ത് ലുക്കാക്കു ഗോള് വലയിലെത്തിച്ചു. തൊട്ടുപിന്നാലെ 18ാം മിനിട്ടില് തങ്ങള്ക്ക് അനുകൂലമായി ലഭിച്ച ഫ്രീകിക്ക് ഡൈലന് ബ്രോണ് വിജയകരമായി ബെല്ജിയം ഗോള്മുഖത്തെത്തിച്ചു. ആദ്യ പകുതി തീരാനിരിക്കെ ഇഞ്ചുറി ടൈമിലെ അവസാന നിമിഷമാണ് ലുക്കാക്കു ബെല്ജിയത്തിന് വേണ്ടി മൂന്നാം ഗോള് നേടിയത്. രണ്ടാം പകുതിയുടെ 51ആം മിനിട്ടിലാണ് ഈഡന് ഹസാര്ഡ് തന്റെ രണ്ടാം ഗോള് നേടിയത്.
https://www.facebook.com/Malayalivartha
