നീണ്ട ഇടവേളക്കുശേഷം ഐ.സി.സി ഏകദിന റാങ്കിങ്ങില്‍ ഒന്നാമതെത്താന്‍ ഇന്ത്യക്ക് സുവര്‍ണാവസരം... ഇന്ത്യ-ന്യൂസിലന്‍ഡ് മൂന്നാം ഏകദിനം ഇന്ന്.


ന്യൂസിലന്‍ഡിനെതിരായ പരമ്പരയിലെ മൂന്നാമത്തെയും അവസാനത്തെയും മത്സരം ജയിച്ചാല്‍ നിലവില്‍ മൂന്നാമതുള്ള ഇന്ത്യക്ക് ഒന്നിലേക്ക് കയറാം. ആദ്യ രണ്ട് ഏകദിനങ്ങളും നേടി പരമ്പര സ്വന്തമാക്കി രോഹിത് ശര്‍മയും സംഘവും 2023ലെ അപരാജിത യാത്ര തുടരുകയാണ്.

ശ്രീലങ്കക്കെതിരെ 3-0ത്തിന് തൂത്തുവാരിയതിന് പിന്നാലെയാണ് കിവികള്‍ക്കെതിരായ പ്രകടനം.കഴിഞ്ഞ ദിവസം വരെ റാങ്കിങ്ങില്‍ നാലാമതായിരുന്നു ടീം ഇന്ത്യ. ന്യൂസിലന്‍ഡിനെ രണ്ടാം മത്സരത്തില്‍ എട്ടു വിക്കറ്റിന് തോല്‍പിച്ചതോടെ കഥ മാറി.

111 റേറ്റിങ് പോയന്റുണ്ടായിരുന്ന ഇന്ത്യയുടെത് 113 ആയി. 115 പോയന്റില്‍ ഒന്നാമതായിരുന്ന ന്യൂസിലന്‍ഡിന്റേത് 113 ആയി കുറഞ്ഞ് രണ്ടാം സ്ഥാനത്തേക്കിറങ്ങി. നിലവില്‍ യഥാക്രമം ഒന്നും മൂന്നും റാങ്കുകാരായ ഇംഗ്ലണ്ടിനും ഇന്ത്യക്കും 113 പോയന്റ് വീതമാണ്.

ഇന്ന് ജയിക്കുന്നതോടെ രോഹിതും കൂട്ടരും ഒന്നിലേക്ക് കയറും. രണ്ടാം സ്ഥാനത്തുള്ള ന്യൂസിലന്‍ഡ് മൂന്നിലേക്കും ഇറങ്ങും. ഐ.സി.സി ട്വന്റി20 റാങ്കിങ്ങില്‍ ഇന്ത്യയാണ് ഒന്നാമന്മാര്‍. ടെസ്റ്റില്‍ ആസ്‌ട്രേലിയക്ക് പിന്നില്‍ രണ്ടാം സ്ഥാനത്തും.