കേരളത്തിന് ഇത് അഭിമാനനിമിഷം.... പ്രഥമ വനിത പ്രീമിയര്‍ ലീഗില്‍ മലയാളി താരം മിന്നു മണിയും.... വനിത ഐ.പി.എല്ലിലേക്ക് തെരഞ്ഞെടുക്കപ്പെടുന്ന ആദ്യ മലയാളി താരം
കേരളത്തിന് ഇത് അഭിമാനനിമിഷം.... പ്രഥമ വനിത പ്രീമിയര്‍ ലീഗില്‍ (ഡബ്ല്യു.പി.എല്‍) മലയാളി താരം മിന്നു മണിയും. ആവേശകരമായ താരലേലത്തില്‍ 30 ലക്ഷം രൂപക്കാണ് വയനാട്ടുകാരിയെ ഡല്‍ഹി ക്യാപിറ്റല്‍സ് സ്വന്തമാക്കിയത്.
വനിത ഐ.പി.എല്ലിലേക്ക് തെരഞ്ഞെടുക്കപ്പെടുന്ന ആദ്യ മലയാളി താരമാണ് മിന്നു.കേരള ടീമില്‍ സ്ഥിര സാന്നിധ്യമായ മിന്നു ബംഗ്ലാദേശ് പര്യടനം നടത്തിയ ഇന്ത്യ എ ടീം അംഗമായിരുന്നു.പത്ത് ലക്ഷം രൂപയായിരുന്നു ഓള്‍ റൗണ്ടറായ മിന്നുവിന്റെ അടിസ്ഥാന വില.
റോയല്‍ ചാലഞ്ചേഴ്സ് ബാംഗ്ലൂര്‍, മുംബൈ ഇന്ത്യന്‍സ് ടീമുകളും ഇടംകൈ ബാറ്ററും വലംകൈ ഓഫ് സ്പിന്നറുമായ മിന്നുവിനായി രംഗത്തുണ്ടായിരുന്നു. കേരളത്തില്‍നിന്ന് ഇന്ത്യന്‍ വനിത എ ടീമിലെത്തുന്ന ആദ്യ വനവാസി പെണ്‍കുട്ടിയാണ് മിന്നു മണി.
കേരള ക്രിക്കറ്റ് അസോസിയേഷന്റെ (കെ.സി.എ) ജൂനിയര്‍ ക്രിക്കറ്റര്‍ ഓഫ് ദി ഇയര്‍ പുരസ്‌കാരം, യൂത്ത് പ്ലെയര്‍ ഓഫ് ദി ഇയര്‍ പുരസ്‌കാരം, പ്രോമിസിങ് പ്ലെയര്‍ പുരസ്‌കാരം തുടങ്ങിയവ നേടിയിട്ടുണ്ട്.
അതേസമയം മാനന്തവാടി ജിവിഎച്ച്എസ്എസില്‍ എട്ടില്‍ പഠിക്കുമ്പോള്‍ കായിക അധ്യാപിക എത്സമ്മയാണ് മിന്നുവിലെ കായിക താരത്തെ കണ്ടെത്തിയത്. അനുമോള്‍ ബേബി, ഷാനവാസ് എന്നിവരായിരുന്നു ആദ്യ പരിശീലകര്‍.
തൊടുപുഴയിലെ ജൂനിയര്‍ ക്രിക്കറ്റ് അക്കാദമിയില്‍ പരിശീലനം ആരംഭിച്ചതോടെയാണ് അവസരങ്ങള്‍ തേടിയെത്താന്‍ തുടങ്ങിയത്.
"
https://www.facebook.com/Malayalivartha
