സാഫ് കപ്പ് ഫുട്ബോളില്‍ ഒമ്പതാം കിരീടത്തിനായി തയ്യാറെടുപ്പോടെ ഇന്ത്യ...ഫൈനലില്‍ കുവൈത്തിനെ നേരിടും, ബംഗളൂരുവിലെ ശ്രീകണ്ഠീരവ സ്റ്റേഡിയത്തില്‍ കലാശപ്പോര് ഇന്ന് രാത്രി ഏഴരയ്ക്ക്

ഗ്രൂപ്പ് ഘട്ടത്തില്‍ ഇരുടീമുകളും ഏറ്റുമുട്ടിയപ്പോള്‍ 1-1ന് പിരിഞ്ഞിരുന്നു. ഷൂട്ടൗട്ട്വരെ നീണ്ട സെമിയില്‍ ലെബനനെ മറികടന്നാണ് സുനില്‍ ഛേത്രിയും സംഘവും എത്തുന്നത്. അതിഥികളായ കുവൈത്താകട്ടെ ബംഗ്ലാദേശിനെ ഒരു ഗോളിന് വീഴ്ത്തി.

സാഫില്‍ ഇന്ത്യക്കിത് 13-ാംഫൈനലാണ്. ഭുവനേശ്വറില്‍ ഇന്റര്‍ കോണ്ടിനെന്റല്‍ കപ്പുയര്‍ത്തിയതിനുപിന്നാലെയാണ് ഇന്ത്യ സാഫിനിറങ്ങിയത്. മികച്ച പ്രകടനം തുടര്‍ന്നു. പാകിസ്ഥാനെയും നേപ്പാളിനെയും വീഴ്ത്തി.

കുവൈത്തിനോട് സമനില വഴങ്ങിയതോടെ ഗ്രൂപ്പില്‍ രണ്ടാംസ്ഥാനക്കാരായി സെമിയില്‍. കരുത്തുറ്റ മത്സരത്തില്‍ ലെബനനെ ഷൂട്ടൗട്ടില്‍ 4-2നാണ് തോല്‍പ്പിച്ചത്. ഗോളടി തുടരുന്ന ക്യാപ്റ്റന്‍ ഛേത്രിയാണ് തുറുപ്പുചീട്ട്. ഇന്ത്യന്‍ കുപ്പായത്തില്‍ ആകെ 92 ഗോളായി ഈ മുപ്പത്തെട്ടുകാരന്. ടൂര്‍ണമെന്റില്‍ അഞ്ച് ഗോളുമായി ഗോള്‍വേട്ടക്കാരില്‍ ഒന്നാമനുമാണ്.


ജൂണില്‍ ഇന്റര്‍കോണ്ടിനെന്റല്‍ കപ്പില്‍ ഇന്ത്യ കിരീടം നേടിയിരുന്നു. ഫിഫ റാങ്കിങ്ങില്‍ ഇന്ത്യ നൂറാംസ്ഥാനത്തും കുവൈത്ത് 141-ാം സ്ഥാനത്തുമാണ്. എന്നാല്‍, കളിയില്‍ അത്തരം അന്തരമില്ല.രണ്ടുഗോളുമായി കുവൈത്തിന്റെ ടോപ് സ്‌കോററായ ഇടതുവിങ്ങര്‍ മൊബാറക് അല്‍ ഫനീനിയാകും ടീമിന്റെ തുറുപ്പുചീട്ട്.