ആസ്‌ട്രേലിയന്‍ ഓപണില്‍ പത്തൊമ്പതുകാരിക്കു മുന്നില്‍ വീണ് ലോക ഒന്നാം നമ്പര്‍ താരം ഇഗ സ്വിയാറ്റെക്
ആസ്‌ട്രേലിയന്‍ ഓപണില്‍ പത്തൊമ്പതുകാരിക്കു മുന്നില്‍ വീണ് ലോക ഒന്നാം നമ്പര്‍ താരം ഇഗ സ്വിയാറ്റെക്. തുടക്കം ഗംഭീരമാക്കി ആദ്യ സെറ്റ് തനിക്കൊപ്പമാക്കിയ ശേഷമായിരുന്നു 22കാരിയായ സ്വിയാറ്റെക് റോഡ് ലേവര്‍ അറീനയില്‍ ലിന്‍ഡ നോസ്‌കോവക്ക് മുന്നില്‍ 36 63 64ന് തോല്‍വി സമ്മതിച്ചത്.
ലോക 50ാം റാങ്കുകാരിയായ നോസ്‌കോവക്കിത് ആദ്യ ഗ്രാന്‍ഡ്സ്ലാം പ്രീ ക്വാര്‍ട്ടറാണ്. താരം ആസ്‌ട്രേലിയന്‍ ഓപണില്‍ കഴിഞ്ഞ വര്‍ഷം യോഗ്യത ഘട്ടത്തില്‍ പുറത്തായിരുന്നു. മറുവശത്ത്, സ്വിയാറ്റകിന് തുടര്‍ച്ചയായ 18 മത്സരങ്ങളില്‍ തോല്‍വിയില്ലാ കുതിപ്പിന് വിരാമം കൂടിയായി മാറി.
ഇതോടെ, ആദ്യ 10 സീഡുകാരില്‍ ഏഴു പേരും പുറത്തായി. മൂന്നാം സീഡ് എലീന റിബാകിന, അഞ്ചാമതുള്ള ജെസിക പെഗുല, ആറാമതുള്ള ഉന്‍സ് ജബ്യൂര്‍ എന്നിവര്‍ നേരത്തേ മടങ്ങിയിരുന്നു. നിലവിലെ ചാമ്പ്യന്‍ അരിന സബലെങ്ക, യു.എസ് ഓപണ്‍ ജേതാവ് കൊക്കോ ഗോഫ്, ബാര്‍ബറ ക്രജ്‌സിക്കോവ എന്നിവരാണ് ഇനിയും കിരീടപ്പോരില്‍ അവശേഷിക്കുന്ന ആദ്യ സീഡുകാര്‍.
"
https://www.facebook.com/Malayalivartha
