ലോക ജൂനിയര്‍ അത്‌ലറ്റിക്‌സ് മീറ്റില്‍ സ്വര്‍ണം നേടിയ ഹിമ ദാസിന്റെ നേട്ടത്തില്‍ അഭിനന്ദനമറിയിച്ച് ഇന്ത്യന്‍ ക്രിക്കറ്റ് താരങ്ങള്‍
ലോക ജൂനിയര്‍ അത്‌ലറ്റിക്‌സ് മീറ്റില്‍ സ്വര്‍ണം നേടിയ ഹിമ ദാസിന്റെ നേട്ടത്തില്‍ അഭിനന്ദനമറിയിച്ച് ഇന്ത്യന്‍ ക്രിക്കറ്റ് താരങ്ങള്‍. സചിന്‍ തെന്‍ഡുല്‍ക്കര്‍, വിരാട് കോഹ്‌ലി, രോഹിത് ശര്‍മ്മ, ഗൗതം ഗംഭീര്‍ എന്നിവരാണ് ഹിമയെ അഭിനന്ദിച്ച് ട്വീറ്റ് ചെയ്തത്.ഹിമ ദാസിന്റെ സ്വര്‍ണ നേട്ടം പുതു യുഗത്തിന്റെ തുടക്കമെന്നാണ് സചിന്‍ അഭിപ്രായപ്പെട്ടത്. ഹിമക്ക് പിറകെ ഒരുപാട് പേര്‍ ഇനിയും ഇന്ത്യന്‍ അത്‌ലറ്റിക്‌സിലേക്ക് കടന്ന് വരും. ഹിമയുടെ 51.46 സെക്കന്‍ഡ് ഓട്ടത്തിന് വര്‍ഷങ്ങളുടെ കഠിനാധ്വാനമുണ്ടെന്ന് സചിന്‍ ട്വിറ്ററില്‍ കുറിച്ചു.
അവിശ്വസനീയമായ നേട്ടമാണ് ഹിമ സ്വന്തമാക്കിയതെന്നും അവരെ അഭിനന്ദിക്കുന്നുവെന്നും ഇന്ത്യന്‍ ക്രിക്കറ്റ് ടീം ക്യാപ്റ്റന്‍ വിരാട് കോഹ്‌ലി പ്രതികരിച്ചു. ഹിമയുടെ നേട്ടത്തെ അഭിനന്ദിക്കാന്‍ വാക്കുകളില്ലെന്നായിരുന്നു ഹിറ്റ്മാന്‍ രോഹിതിന്റെ ട്വീറ്റ്. ഹിമ ദാസ് മെഡല്‍ മാത്രമല്ല പ്രതീക്ഷയും കൂടിയാണ് നമുക്ക് നല്‍കിയതെന്ന് ഗൗതം ഗംഭീര്‍ പറഞ്ഞു.
ട്രാക്കുകളെ തന്റെ കാല്‍പാദങ്ങള്‍ കൊണ്ട് തീപിടിപ്പിക്കുക മാത്രമല്ല രാജ്യത്തിന് മാതൃക കാണിക്കുക കൂടിയാണ് ഹിമ ചെയ്തതെന്നായിരുന്നു ഗംഭീറിന്റെ ട്വിറ്റ്. ഹിമദാസിന്റെ നേട്ടത്തില്‍ അഭിനന്ദനമറിയിച്ച് ബി.സി.സി.ഐയും രംഗത്തെത്തി.
https://www.facebook.com/Malayalivartha
