രാജ്യത്തിന്റെ അഭിമാന താരമായ പി.യു ചിത്ര ഇനി റെയില്‍വേ ഉദ്യോഗസ്ഥ
രാജ്യത്തിന്റെ അഭിമാന താരമായ പി.യു ചിത്രയ്ക്ക് റെയില്‍വേയില്‍ നിയമനം. അച്ഛന്‍ ഉണ്ണികൃഷ്ണനും പരിശീലകന്‍ സിജിനുമൊപ്പമാണ് ചിത്ര റെയില്‍വേ ഡിവിഷണല്‍ മാനേജരുടെ കാര്യാലയത്തിലെത്തി നിയമന ഉത്തരവ് ഏറ്റുവാങ്ങിയത്. ദക്ഷിണ റെയില്‍വേ പാലക്കാട് ഡിവിഷണല്‍ ഓഫീസില്‍ സീനിയര്‍ ക്ലാര്‍ക്കായാണ് ചിത്രയുടെ നിയമനം. നിയമനോത്തരവ് ഡി.ആര്‍എം. പ്രതാപ് സിങ് ഷമി ചിത്രയ്ക്ക് കൈമാറി. ഇതിനിടെ ഒളിമ്പ്യന്‍ പ്രീജാ ശ്രീധരന്‍ അഭിനന്ദനവുമായെത്തി.
കേരളത്തിനും രാജ്യത്തിനും വേണ്ടി ഒട്ടേറെ നേട്ടങ്ങളുണ്ടാക്കിയിട്ടും ഏറെക്കാലമായി ജോലിക്കുവേണ്ടിയുള്ള കാത്തിരിപ്പിലായിരുന്നു ചിത്ര. കേരള സര്‍ക്കാരിലോ റെയില്‍വേയിലോ ജോലി കിട്ടണമെന്ന് ആഗ്രഹമുണ്ടായിരുന്നുവെന്നും ഇപ്പോള്‍ സന്തോഷമുണ്ടെന്നും ചിത്ര പറഞ്ഞു.ജോലിയില്‍ പ്രവേശിച്ചെങ്കിലും ഓപ്പണ്‍ നാഷണല്‍ മീറ്റില്‍ പങ്കെടുക്കാന്‍ ഇന്നു തന്നെ ഭുവനേശ്വറിലേക്ക് പോകും. റെയില്‍വേ ബോര്‍ഡിന്റെ ഡല്‍ഹി ഓഫീസില്‍ നിന്നുള്ള പ്രത്യേക നിര്‍ദേശ പ്രകാരമാണ് നിയമനം ലഭിച്ചത്. സംസ്ഥാന സര്‍ക്കാരും ചിത്രയ്ക്ക് ജോലി വാഗ്ദാനം ചെയ്തിരുന്നു. അതിനുള്ള നടപടികള്‍ പുരോഗമിക്കുകയാണ്. 1500 മീറ്റര്‍ ഓട്ടത്തില്‍ ഇന്ത്യയുടെ പ്രതീക്ഷയാണ് പി യു ചിത്ര.
മുണ്ടൂര്‍ ഹൈസ്‌കൂളിലെ പരിമിതമായ സൗകര്യങ്ങളില്‍ പരിശീലിച്ചാണ്് ചിത്ര രാജ്യാന്തര താരമായി മാറിയത്. ദേശീയ, അന്തര്‍ദ്ദേശീയ സ്‌കൂള്‍ അത് ലറ്റിക് മീറ്റുകളില്‍ നിരവധി സ്വര്‍ണ മെഡലുകള്‍ ചിത്ര കരസ്ഥമാക്കിയിട്ടുണ്ട് . സ്‌കൂള്‍ അത്‌ലറ്റിക് മീറ്റിലൂടെ കായികരംഗത്ത് ശ്രദ്ധനേടിയ ചിത്ര പടിപടിയായി അന്താരാഷ്ട്രതലത്തിലേക്ക് ഉയര്‍ന്നു. 1500 മീറ്റര്‍ ഓട്ടത്തില്‍ ഒളിമ്പിക്‌സ് യോഗ്യത നേടാനുള്ള കഠിന പരിശ്രമം ആരംഭിച്ചു കഴിഞ്ഞു. 2020 വരെ ചിത്രയുടെ ലക്ഷ്യം ഒളിമ്പിക്‌സ് മാത്രമാണ്. ഇരിങ്ങാലക്കുട ക്രൈസ്റ്റ് കോളേജിലെ രണ്ടാം വര്‍ഷ ബിരുദാനന്തര ബിരുദ വിദ്യാര്‍ഥിനിയാണ് . ചിത്രയ്ക്ക് പിന്തുണയുമായി അമ്മ വസന്തകുമാരിയും അച്ഛന്‍ ഉണ്ണികൃഷ്ണനും സഹോദരന്‍ കൃഷ്ണകുമാറും വഴികാട്ടിയായി കോച്ച് സിജിനും കൂടെയുണ്ട്.
"
https://www.facebook.com/Malayalivartha
