ടോക്യോ ഒളിമ്ബിക്‌സിലെ മോശം പെരുമാറ്റത്തെ തുടര്‍ന്ന് വനിതാ ഗുസ്തി താരം വിനേഷ് ഫോഗട്ടിനെ റെസ്ലിങ് ഫെഡറേഷന്‍ ഓഫ് ഇന്ത്യ സസ്‌പെന്‍ഡ് ചെയ്തു. ഹംഗറിയില്‍ നിന്നാണ് വിനേഷ് ടോക്യോയിലെത്തിയത്. മറ്റ് ഇന്ത്യന്‍ താരങ്ങളോടൊപ്പം പരിശീലനം നടത്താനും ഗെയിംസ് വില്ലേജില്‍ താമസിക്കാനും വിനേഷ് വിസമ്മതിച്ചിരുന്നു.

ഇന്ത്യയില്‍ നിന്നെത്തിയവരോടൊപ്പം കഴിഞ്ഞാല്‍ തനിക്ക് കൊവിഡ് വരാന്‍ സാധ്യതയുണ്ടെന്നായിരുന്നു വിനേഷിന്റെ നിലപാട്. ഒഫീഷ്യല്‍ സ്‌പോണ്‍സര്‍മാരുടെ പേര് പതിപ്പിച്ച ജഴ്‌സിക്ക് പകരം നൈക്കിയുടെ ജഴ്‌സി അണിഞ്ഞ് വിനേഷ് മത്സരങ്ങളില്‍ പങ്കെടുത്തതും നടപടിക്ക് കാരണമായി. സോനം മാലികിനും ഫെഡറേഷന്‍ നോട്ടീസ് അയച്ചു.