ഓണാട്ടുകരയുടെ മഹോത്സവമായ ചെട്ടികുളങ്ങര കുംഭഭരണി ഇന്ന്. ശിവരാത്രി നാള്‍ ആരംഭിച്ച കുത്തിയോട്ട വഴിപാടുകളും കെട്ടുകാഴ്ചകളും ഇന്ന് ചെട്ടികുളങ്ങര ഭഗവതിക്കു മുന്‍പില്‍ സമര്‍പ്പിക്കുകയും ചെയ്യും.

ഇത്തവണ 14 കുത്തിയോട്ട വഴിപാടുകണ് ഉള്ളത്. വഴിപാട് നടത്തുന്ന ഭവനങ്ങളില്‍ നിന്ന് കുത്തിയോട്ട ഘോഷയാത്ര നാളെ രാവിലെ ആരംഭിച്ച് ഉച്ചയ്ക്കു മുന്‍പായി ക്ഷേത്രത്തിലെത്തിച്ചേരും. ഉച്ചക്ക് ശേഷം രണ്ടരയോടെ 13 കരകളില്‍ നിന്നുള്ള കെട്ടുകാഴ്ച വരവ് ആരംഭിക്കും. കെട്ടുകാഴ്ചകള്‍ വൈകിട്ട് നാലരയോടെ ക്ഷേത്രത്തിലേക്ക് പ്രവേശിക്കുമെന്നാണ് കരുതുന്നത്. ഇവ കരക്രമത്തില്‍ ക്ഷേത്രത്തിനു മുന്‍പിലെ കാഴ്ചക്കണ്ടത്തില്‍ അണിനിരക്കും.

ഈരേഴതെക്ക്, ഈരേഴവടക്ക്, കൈതതെക്ക്, കൈതവടക്ക്, പേള, നടയ്ക്കാവ് കരക്കാര്‍ കുതിരയെയും കണ്ണമംഗലം തെക്ക്, കണ്ണമംഗലം വടക്ക്, കടവൂര്‍ ആഞ്ഞിലിപ്ര, മേനാമ്പള്ളി കരക്കാര്‍ തേരും, മറ്റം വടക്ക് ഭീമനെയും മറ്റം തെക്ക് പാഞ്ചാലീ സമേതനനായ ഹനുമാനെയുമാണ് ഒരുക്കുന്നത്.

നാളെ പുലര്‍ച്ചെ മൂന്നിന് ജീവതയില്‍ എഴുന്നെള്ളുന്ന ഭഗവതി തെക്കേമുറ്റത്തെ വേകളിയും കുളത്തില്‍ വേലകളിയും ദര്‍ശിച്ച് കരക്കാര്‍ സമര്‍പ്പിച്ച കെട്ടുകാഴ്ചകള്‍ക്കു മുന്‍പിലെത്തുകയും ചെയ്യും.