നന്നായി പരിപാലിച്ചാല്‍ നട്ട് ആറ് മാസത്തില്‍ തന്നെ പൂവിടാന്‍ തുടങ്ങും ഡ്രാഗണ്‍ ഫ്രൂട്ട്...
നന്നായി പരിപാലിച്ചാല്‍ നട്ട് ആറ് മാസത്തില്‍ തന്നെ പൂവിടാന്‍ തുടങ്ങും ഡ്രാഗണ്‍ ഫ്രൂട്ട്...ഉഷ്ണമേഖലാ പ്രദേശമായ നമ്മുടെ നാട്ടില്‍ ഡ്രാഗണ്‍ ഫ്രൂട്ട് നന്നായി വളരും.
നല്ല ഉല്‍പ്പാദനവുമുണ്ടാകും. ഒരു മീറ്ററെങ്കിലും നീളമുള്ള തണ്ടുകള്‍ നടാന്‍ തെരഞ്ഞടുക്കാം. തീരെ ചെറിയ തണ്ടില്‍ നിന്ന് മുളച്ചുവരുന്ന തൈകള്‍ പടര്‍ന്നുകയറാന്‍ കാലതാമസമുണ്ടാകും. തൈകള്‍ തമ്മില്‍ 3 മീറ്റര്‍ അകലം വേണം. തൈകള്‍ പടര്‍ത്തുന്നതിന് കോണ്‍ക്രീറ്റ് തൂണുകള്‍, മരക്കാലുകള്‍ എന്നിവ ഉപയോഗിക്കാവുന്നതാണ്.
ചാണകപ്പൊടിയും കോഴികാഷ്ഠവും 3 കിലോഗ്രാം വീതം ചേര്‍ത്ത് അരകിലോഗ്രാം വീതം എല്ലുപൊടിയും വേപ്പിന്‍ പിണ്ണാക്കും കൂടി ചേര്‍ത്ത് 3 മാസത്തെ ഇടവേളകളില്‍ വളമായി നല്‍കാം. നല്ല ഉല്‍പ്പാദനത്തിന് അരകിലോഗ്രാം വീതം യൂറിയയും പൊട്ടാഷും ഒരു കിലോഗ്രാം രാജ്‌ഫോസും നാലുമാസത്തിലൊരിക്കല്‍ നല്‍കാവുന്നതാണ്. സൂക്ഷ്മവള മിശ്രിതം വര്‍ഷത്തില്‍ രണ്ട് തവണ ചേര്‍ത്ത് മണ്ണ് കൂട്ടണം.
സാധാരണഗതിയില്‍ മെയ് മുതല്‍ നവംബര്‍ വരെയാണ് പൂവിടല്‍ കാലം. പൂവിരിഞ്ഞാല്‍ ഒന്നര മാസത്തിനകം വിളവെടുക്കാം. ചെടിയില്‍ വേണ്ടതിലേറെ പൂക്കളുണ്ടെങ്കില്‍ കായ്കള്‍ ചെറുതാകും. ചെടിയുടെ ആരോഗ്യമനുസരിച്ച് മാത്രമേ പൂക്കള്‍ നിലനിര്‍ത്താവൂ. ശരിയായ പോഷണം നല്‍കുന്നതും പൂക്കളുടെ എണ്ണം കുറയ്ക്കുന്നതും കായ്കള്‍ വലുതാകാന്‍ സഹായിക്കും. പൂവിടലും വിളവെടുപ്പും സെപ്തംബര്‍ ഒക്ടോബര് മാസത്തോടെ പൂര്‍ത്തിയാകും.
ഡ്രാഗണ്‍ ഫ്രൂട്ട് നന്നായി പ്രൂണ്‍ ചെയ്യണം. എല്ലാ വര്‍ഷവും സെപ്തംബര്‍ ഒക്ടോബര് മാസങ്ങളില്‍ വിളവെടുപ്പിനുശേഷം അടിഭാഗത്തുളള മൂത്ത ശാഖകള്‍ മുറിച്ച് നീക്കുന്നത് പുതിയ ശാഖകളെ പ്രോത്സാഹിപ്പിക്കും.
"
https://www.facebook.com/Malayalivartha
