വരുന്ന ജി എസ് ടി കൗണ്സില് യോഗത്തില് ഹോട്ടല് വ്യവസായത്തെ രക്ഷിക്കാന് നടപടിയുണ്ടാകാന് സാധ്യത
കൂടുതല് പ്രശ്നങ്ങള് അഭിമുഖീകരിക്കുന്ന ഹോട്ടല്, ബിസ്കറ്റ് വ്യവസായങ്ങളെ രക്ഷിക്കാന് വെള്ളിയാഴ്ച ഗോവയിലാണ് ചേരുന്ന ജി എസ് ടി കൗണ്സില് ചരക്കുസേവനനികുതി (ജി എസ് ടി)യില് നടപടി ഉണ്ടാകുമെന്ന് സൂചന. പകരം പുകയില ഉത്പന്നങ്ങള്ക്ക് നികുതി വര്ദ്ധിപ്പിക്കുമെന്നാണ് കരുതപ്പെടുന്നത്. കാറുകള് അടക്കം വാഹനങ്ങള്ക്കും ഹോട്ടലുകള്ക്കും കണ്സ്യൂമര് ഉത്പന്നങ്ങള്ക്കും നികുതി ഇളവ് അനുവതിക്കാനായിരുന്നു ആദ്യ ആലോചന. എന്നാല് വാഹനങ്ങള്ക്ക് നികുതിയിളവ് നല്കാനിടയില്ല.
75,000 കോടി രൂപയുടെ നികുതി ഇളവാണ് ഉദ്ദേശിച്ചിരുന്നത്. ഇതു ബജറ്റിനെ ബാധിക്കാതിരിക്കാന് നിത്യോപയോഗ സാധനങ്ങളുടെ നികുതി അഞ്ചു ശതമാനത്തില് നിന്നും എട്ടു ശതമാനമായി കൂട്ടാനും നിര്ദേശമുണ്ടായിരുന്നു. ഇത് ജനരോഷമുണ്ടാക്കുകയും ഒപ്പം വിലക്കയറ്റം വര്ദ്ധിപ്പിക്കുകയും ചെയ്യും. അതിനാലാണ് ആ നിര്ദ്ദേശം മാറ്റിയത്. പുകയില ഉത്പന്നങ്ങള് അടക്കം നിലവില് അധികനികുതിയും സെസും ഉള്ള സാധനങ്ങളുടെ നികുതി വര്ദ്ധിപ്പിക്കാനാണ് ഇപ്പോള് ആലോചന.
ഹോട്ടല് വ്യവസായത്തിന് നികുതി ആശ്വാസം നല്കാനാവശ്യപ്പെട്ട് വിവിധ സംസ്ഥാന സര്ക്കാരുകള് രംഗത്തുണ്ട്. ടൂറിസം പ്രോത്സാഹനം ചൂണ്ടിക്കാട്ടിയാണ് ഹോട്ടലുകള്ക്ക് നികുതി കുറയ്ക്കാന് സംസ്ഥാനങ്ങള് ആവശ്യപ്പെടുന്നത്. നിലവില് 7500 രൂപ പ്രതിദിന വാടകയുള്ള മുറിക്ക് 28 ശതമാനമാണ് നികുതി. ഇത് 18 ശതമാനമായി താഴ്ത്തുകയോ 7500 രൂപ എന്നത് ഗണ്യമായി ഉയര്ത്തുകയോ ചെയ്യണമെന്നാണ് ആവശ്യം.
ജി എസ് ടി വരുംമുമ്പ് നികുതിവിമുക്തമായിരുന്ന ബിസ്കറ്റുകള്ക്ക് നിലവില് 18 ശതമാനമാണ് ജി എസ് ടി. ഇത് കിലോഗ്രാമിന് 100 രൂപയില് താഴെ വിലയുള്ളവയ്ക്ക് ജി എസ് ടി അഞ്ച് ശതമാനമായി കുറയ്ക്കണമെന്നാണ് ആവശ്യം. വാഹന നികുതി 28 ശതമാനത്തില് നിന്ന് 18 ശതമാനമായി കുറയ്ക്കാന് ആലോചന ഉണ്ടായിരുന്നു. എന്നാല് ഇത് പ്രതിവര്ഷം 60,000 കോടി രൂപയുടെ നികുതി നഷ്ടമുണ്ടാക്കുമന്നും ഇത് താങ്ങാവുന്നതല്ലെന്ന് ജി എസ് ടി ഫിറ്റ്മെന്റ് കമ്മിറ്റിയുടെ വിലയിരുത്തല്.
https://www.facebook.com/Malayalivartha