ഓഹരി സൂചികകളില്‍ നേട്ടം. വ്യാപാരം ആരംഭിച്ചയുടനെ നിഫ്റ്റി 15,300ന് മുകളിലെത്തി. സെന്‍സെക്‌സ് 507 പോയന്റ് നേട്ടത്തില്‍ 51,787ലും നിഫ്റ്റി 136 പോയന്റ് ഉയര്‍ന്ന് 15,310ലുമാണ് വ്യാപാരം ആരംഭിച്ചത്.

ബിഎസ്ഇയിലെ 1214 കമ്പനികളുടെ ഓഹരികള്‍ നേട്ടത്തിലും 197 ഓഹരികള്‍ നഷ്ടത്തിലുമാണ്. 97 ഓഹരികള്‍ക്ക് മാറ്റമില്ല. ഒഎന്‍ജിസി, എച്ച്ഡിഎഫ്‌സി ബാങ്ക്, ഐസിഐസിഐ ബാങ്ക്, എല്‍ആന്‍ഡ്ടി, ആക്‌സിസ് ബാങ്ക്, ഇന്‍ഫോസിസ്, ടൈറ്റാന്‍, ഇന്‍ഡസിന്‍ഡ് ബാങ്ക്, എസ്ബിഐ, ടെക് മഹീന്ദ്ര, എച്ച്‌സിഎല്‍ ടെക് തുടങ്ങിയ ഓഹരികളാണ് നേട്ടത്തില്‍.

നെസ് ലെ, ഹിന്ദുസ്ഥാന്‍ യുണിലിവര്‍, സണ്‍ ഫാര്‍മ, ബജാജ് ഓട്ടോ തുടങ്ങിയ ഓഹരികള്‍ നഷ്ടത്തിലുമാണ്. നിഫ്റ്റി സ്വകാര്യ ബാങ്ക് സൂചിക 1.3ശതമാനം ഉയര്‍ന്നു. ബിഎസ്ഇ മിഡ്ക്യാപ്, സ്‌മോള്‍ ക്യാപ് സൂചികകള്‍ യഥാക്രമം 0.6ശതമാനം, 0.8ശതമാനം നേട്ടത്തിലാണ്.

അതേസമയംപ്രമുഖ ജുവലറി ബ്രാന്‍ഡായ കല്യാണ്‍ ജുവലേഴ്‌സ് പ്രാഥമിക ഓഹരി വില്പന(ഐ.പി.ഒ)പ്രഖ്യാപിച്ചു. 1,175 കോടി രൂപ സമാഹരിക്കുകയാണ് ലക്ഷ്യം. ഒരു ഓഹരിക്ക് 8687 രൂപയാണ് നിശ്ചയിച്ചിട്ടുള്ളത്. മാര്‍ച്ച് 16 മുതല്‍ 18 വരെ ഐപിഒയ്ക്ക് അപേക്ഷിക്കാം. ഓഫര്‍ ഫോര്‍ സെയിലിലൂടെ 4.31 കോടി ഓഹരികള്‍ വിറ്റഴിച്ച് 375 കോടി രൂപയും പുതിയ ഓഹരി വില്പനയിലൂടെ 9.19 കോടി ഓഹരികള്‍വഴി 800 കോടി രൂപയുമാണ് സമാഹരിക്കാന്‍ ലക്ഷ്യമിടുന്നത്.

172 ഓഹരികളുടെ ഒരുലോട്ടായാണ് അപേക്ഷിക്കാനാകുക. ഇതുപ്രകാരം ഒരു ഓഹരിക്ക് 87 രൂപ നിരക്കില്‍ 14,964 രൂപയാണ് നിക്ഷേപിക്കാന്‍വേണ്ട മിനിമംതുക. രണ്ടുകോടി രൂപമൂല്യമുള്ള ഓഹരികള്‍ കമ്പനിയിലെ ജീവനക്കാര്‍ക്കായി നീക്കിവെയ്ക്കും. പ്രൊമോട്ടര്‍മാരായ ടി.എസ് കല്യാണരാമന്‍ 125 കോടി രൂപമൂല്യമുള്ള ഓഹരികളാണ് ഓഫര്‍ ഫോര്‍ സെയില്‍വഴി വില്‍ക്കുക.

ഹെയ്ഡല്‍ ഇന്‍വസെറ്റുമെന്റ്‌സ് 250 കോടി രൂപയുടെ ഓഹരിയും കൈമാറും. കല്യാണരാമനും ഹെയ്ഡല്‍ ഇന്‍വസെറ്റുമെന്റ്‌സിനും യഥാക്രമം 27.41ശതമാനവും 24ശതമാനവും ഓഹരികളാണ് ജുവല്ലറിയിലുള്ളത്. 2020 സാമ്പത്തികവര്‍ഷത്തില്‍ 142.28 കോടി രൂപയാണ് കമ്പനിയുടെ അറ്റാദായം. ഈകാലയളവില്‍ 10,100.92 കോടി രൂപ വരുമാനംവുംനേടി. 78.19ശതമാനംവരുമാനവും ഇന്ത്യയിലെ ജുവല്ലറി ഷോറൂമുകളില്‍നിന്നാണ്. 21.81ശതമാനവും മിഡില്‍ ഈസ്റ്റില്‍നിന്നുമാണ്.

2020 ജൂണിലെ കണക്കുപ്രകാരം രാജ്യത്ത് 107 ഷോറൂമുകളാണ് കല്യാണ്‍ ജുവലേഴ്‌സിനുള്ളത്. 30 എണ്ണം മിഡില്‍ ഈസ്റ്റിലുമുണ്ട്. രണ്ടുവര്‍ഷത്തെ വികസനത്തിന്റെ ഭാഗമായി പ്രവര്‍ത്തനമൂലധനം സമാഹരിക്കുകയെന്നതാണ് ഐപിഒയുടെ ലക്ഷ്യം. റീട്ടെയില്‍ വ്യാപാരരംഗത്ത് 45 വര്‍ഷത്തെ പ്രവര്‍ത്തനപരിചയമുള്ള ടി.എസ് കല്യാണരാമനാണ് ജുവല്ലറിയുടെ സ്ഥാപകന്‍. സ്വര്‍ണാഭരണ വ്യാപാരരംഗത്ത് 27വര്‍ഷത്തെ പ്രവര്‍ത്തനചരിത്രവും അദ്ദേഹത്തിനുണ്ട്.

ആക്‌സിസ് ക്യാപിറ്റല്‍, സിറ്റി ഗ്രൂപ്പ് ഗ്ലോബല്‍ മാര്‍ക്കറ്റ്‌സ് ഇന്ത്യ, ഐസിഐസിഐ സെക്യൂരിറ്റീസ്, എസ്ബിഐ ക്യാപിറ്റല്‍ മാര്‍ക്കറ്റസ് എന്നീ സ്ഥാപനങ്ങളാണ് ഐപിഒ നടപടികള്‍ക്ക് നേതൃത്വം നല്‍കുന്നത്.